Numbers 35

Lao Bible (ฉบับอักษรลาว)

← Chapter 34 Jump to: Chapter 36 →

1ຢຽມ ໂມອັບ ເດົາ-ແປ້ງ, ຈໍແດນ ດ້າຍ ເຮລນ, ເຢລີໂຄ ຕສີ້ງ ຕ໋ອຍ-ຫງ່ານ, ຕສ໊ຽວ ກ໊ອງ ບົ໋ວ ໂມເຊ,

2“ອ໋ອຍ ຕສຸ ພ້າຍ ອິສະລາເອນ ມ່ຽນ ຢຽມ ນິ່ນ ບົວ ຕຸ໊ ດສິບ ເຍີຍ ເດົາ ເຕສ໊າະ ເຕີ໋ຍ ຕສີ້ງ ຈິວ ປຸນ ເລວີ ມ່ຽນ ຢຽມ. ຢ່າ ອ໋ອຍ ຕສຸ ປຸນ ເຕີ໋ຍ ຮວີງ ກ໋ອມ ຕສີ້ງ ເຍີຍ ເມ້ຍ-ທສຢັ້ງ.

3ຮນັ້ງ ນ້າຍ ເລວີ ມ່ຽນ ຕສ່ຽວ ມ່າຍ ຕສີ້ງ ຢຽມ ຢ່າ ມ່າຍ ເມ້ຍ-ທສຢັ້ງ ຢູ໌ງ ນິ່ນ ບົວ ເຍີຍ ງົ່ງ, ຢູ້ງ ເຖສົາ ຫຍູ່ງໆ ແຊງ-ຄູ້.

4“ຈິວ ປຸນ ເລວີ ມ່ຽນ ວົ້ວ ເຕີ໋ຍ ຕສີ້ງ ອ໋ອຍ ຕສຸ ມ່າຍ ເມ້ຍ-ທສຢັ້ງ ຢຽມ ປູງໆ ຕສີ້ງ ຫລາດ ທສວດ ມີ່ງ ຢຽດ ທສິນ ເດາະ ໂກ.

5ຕສີ້ງ ກະເຫຍ່ຍ ອ໋ອຍ ຕສຸ ເດາະ ຕົງ ປູງ ອີ ທສິນ ເດາະ, ນ່າມ ປູງ ອີ ທສິນ ເດາະ, ໄຟ ປູງ ອີ ທສິນ ເດາະ, ປ໊ະ ປູງ ອີ ທສິນ ເດາະ, ປຸນ ຕສີ້ງ ຢຽມ ຕສຢັ໋ງ ບຸດົ໋ງ. ນິ່ນ ບົວ ຕສ່ຽວ ມ່າຍ ນ້າຍ ເຕີ໋ຍ ເດົາ ໂຕສ໋ວ ຕສີ້ງ ເຍີຍ ເມ້ຍ-ທສຢັ້ງ.

6“ເມີ່ຍ ບົວ ປຸນ ເລວີ ມ່ຽນ ເຍີຍ ຕສີ້ງ ອ໋ອຍ ຕສຸ ກັ້ນ ຖສະເຫລ່ງ ປຸນ ຈຸ໊ ນອມ ເຫວີ່ຍ ໂຕສ໋ວ ເສຍ ແໝ່ງ ຕສີ້ງ, ປຸນ ໄຕ໋ ມ່ຽນ ເຍີຍ ມ່ຽນ ເປຢົ໋າ ມີ່ງ ຢຽມ. ອ໋ອຍ ຕສຸ ແອ໋ງ ທສ້ຳ ເຝີຍ ຕສຽບ ເຫຍີ່ຍ ນອມ ຕສີ້ງ ຈິວ ປຸນ ນິ່ນ ບົວ.

7ຈິວ ປຸນ ເລວີ ມ່ຽນ ເຍີຍ ຕສີ້ງ ຢຽດ ຕສູ໊ງ ມ່າຍ ເຝີຍ ຕສຽບ ເປ໊ດ ນອມ, ລ່ຽມ ຕສີ້ງ ເຍີຍ ເມ້ຍ-ທສຢັ້ງ.

8ຕສິ໋ວ ຝີງໆ ອິສະລາເອນ ມ່ຽນ ດສິບ ເຍີຍ ປ່ວນ ອ໋ອຍ ຕສຸ ແມະ ເຕີ໋ຍ ປຸນ ເລວີ ມ່ຽນ. ຫາຍ ຝີງ ຕຸ໊ ທສ້ຳ ອ໋ອຍ ຕສຸ ປຸນ ທສ້ຳ. ຫາຍ ຝີງ ຕຸ໊ ໂຕສະ ອ໋ອຍ ຕສຸ ປຸນ ໂຕສະ.”

9ຕສ໊ຽວ ກ໊ອງ ບົ໋ວ ໂມເຊ,

10“ອ໋ອຍ ຕສຸ ກ໊ອງ ບົ໋ວ ອິສະລາເອນ ມ່ຽນ, ‘ເມີ່ຍ ບົວ ເຈ໋ຍ ວົ້ວ ຫງ່ານ ຕສິ ຈໍແດນ ດ້າຍ ເປັຍ ຄານາອັນ ເຕີ່ຍ-ປູງ,

11ອ໋ອຍ ຕສຸ ກິ໊ນ ເຕີ໋ຍ ຕສີ້ງ ໂຕສ໋ວ ເມີ່ຍ ບົວ ເສຍ ແໝ່ງ ຕສີ້ງ ເຫວີ່ຍ ປຸນ ທສະ-ໂປ່ວ ໄຕ໋ ມ່ຽນ ເຍີຍ ມ່ຽນ ເປຢົ໋າ ມີ່ງ ຢຽມ ວົ້ວ.

12ນ້າຍ ເຕີ໋ຍ ຕສີ້ງ ເຊ ໂຕສ໋ວ ເສຍ ແໝ່ງ ເຍີຍ ຕ໋ອງ ປຸນ ໄຕ໋ ມ່ຽນ ເຍີຍ ມ່ຽນ ເປຢົ໋າ ຈ໊າວ ມ່ຽນ ແໝ່ງ ວິນ ເຍີຍ ມ່ຽນ, ຕສ່ຽວ ໄມ້ ຕສຸ ໄຕ່ ດ່າງ ຕຸ໊ ຢຽມ ກັ໊ບ ຕສຸ໊ນ ເຍີຍ ມ່ຽນ ເຍີຍ ດສະຮມຽນ ຕສຸ ຊ້ຽມ.

13ເມີ່ຍ ບົວ ປຸນ ເຍີຍ ນ້າຍ ເຕີ໋ຍ ຈຸ໊ ນອມ ຕສີ້ງ ອ໋ອຍ ຕສຸ ໂຕສ໋ວ ເສຍ ແໝ່ງ ຕສີ້ງ.

14ຢຽມ ນ້າຍ ຈໍແດນ ດ້າຍ ຕົງ ປູງ ອ໋ອຍ ຕສຸ ເຕສ໊າະ ທສວດ ປົວ ນອມ. ຢຽມ ຄານາອັນ ເຕີ່ຍ-ປູງ ແອ໋ງ ເຕສ໊າະ ທສວດ ປົວ ນອມ.

15ນ້າຍ ເຕີ໋ຍ ຈຸ໊ ນອມ ຕສີ້ງ ຕສ່ຽວ ໂຕສ໋ວ ເສຍ ແໝ່ງ ເຍີຍ ຕ໋ອງ ເຫວີ່ຍ ປຸນ ອິສະລາເອນ ມ່ຽນ ໄຟ ກັ້ນ ຝີງ ມ່ຽນ, ໄມ້ ກຸ໊ນ ຢຽດ ລິ໌ວ ເຖສົາ ນິ່ນ ບົວ ຢຽມ ໄຟ ຢຽມ ໂຕ່ວ ປ໊າ ຮນັ້ງ, ຕະຟ່ານ ຫາຍ ເຕົ້າ ທສະ-ໂປ່ວ ໄຕ໋ ມ່ຽນ ໄຮ່ ເປຢົ໋າ ມີ່ງ ຢຽມ ວົ້ວ.

16“‘ເຊ ກ໊ອງ ມ່າຍ ຫາຍ ເຕົ້າ ຫລົ່ງ ເຮລັຍ ໂຕສ໋ວ ຕ້າຍ ເຍີຍ ກະນ້າຍ ເບ໊າະ ມ່ຽນ, ມ່ຽນ ຕສ່ຽວ ໄຕ່, ວົ້ວ ເຕົ້າ ເຊ ໂຕສ໋ວ ໄຕ໋ ມ່ຽນ ເຍີຍ ມ່ຽນ. ອ໋ອຍ ຕສຸ ໄຕ໋ ນິ່ນ ອ໊ະ.

17ໄຟ ເຊ ກ໊ອງ ຫາຍ ເຕົ້າ ຫລົ່ງ ໄຮ່ ເບ໊າະ ມ່ຽນ ໄຕ່ ເຍີຍ ຫລະເປຢີ໊ຍ ຕສົງ ມ່ຽນ, ມ່ຽນ ຕສ່ຽວ ໄຕ່, ວົ້ວ ເຕົ້າ ເຊ ໂຕສ໋ວ ໄຕ໋ ມ່ຽນ ເຍີຍ ມ່ຽນ. ອ໋ອຍ ຕສຸ ໄຕ໋ ນິ່ນ ອ໊ະ.

18ໄຟ ເຊ ກ໊ອງ ຫາຍ ເຕົ້າ ຫລົ່ງ ໄຮ່ ເບ໊າະ ມ່ຽນ ໄຕ່ ເຍີຍ ດຢັ໋ງ-ຈາ-ສີ່ ເບ໊າະ ມ່ຽນ, ມ່ຽນ ຕສ່ຽວ ໄຕ່, ວົ້ວ ເຕົ້າ ເຊ ໂຕສ໋ວ ໄຕ໋ ມ່ຽນ ເຍີຍ ມ່ຽນ. ອ໋ອຍ ຕສຸ ໄຕ໋ ນິ່ນ ອ໊ະ.

19ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ກັ້ນ ອ໋ອຍ ຕສຸ ໄຕ໋ ຕົ້ງ ໄຕ໋ ມ່ຽນ ວົ້ວ ເຕົ້າ. ຫາຍ ຕສັ່ນ ປວັດ ຕສ່ຽວ ໄຕ໋ ນິ່ນ ອ໊ະ.

20ຫາຍ ເຕົ້າ ຫັ່ນ ມ່ຽນ ຕສ່ຽວ ຟົ້ງ ນິ່ນ ໄຟ ປ່າໆ ຫລົ່ງ ກະນ້າຍ ຕສອຍ ນິ່ນ, ນິ່ນ ຕສ່ຽວ ໄຕ່,

21ໄຟ ຫລາຍ ມ່າຍ ວິນ ຫລົ່ງ ປົ໌ວ-ຈ້ວນ ເບ໊າະ ມ່ຽນ, ມ່ຽນ ຕສ່ຽວ ໄຕ່, ໄຕ໋ ມ່ຽນ ວົ້ວ ເຕົ້າ ຕສ່ຽວ ອ໋ອຍ ຕສຸ ໄຕ່ ອ໊ະ, ເຫວີ່ຍ ຕສຸ ນິ່ນ ເຊ ໄຕ໋ ມ່ຽນ ເຍີຍ ມ່ຽນ. ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ຫາຍ ຕສັ່ນ ປວັດ ອ໋ອຍ ຕສຸ ໄຕ໋ ນິ່ນ ອ໊ະ.

22“‘ຫາຍ ເຕົ້າ ໄມ້ ຫັ່ນ ມ່ຽນ ມປ່າ ທສະ-ໂປ່ວ ຟົ້ງ ຕສຸ ໄຟ ຕສອຍ ກະນ້າຍ ຕສົງ ຕສຸ ມ່ຽນ,

23ໄຟ ໝັ່ງ ໄມ້ ປວັດ ມ່ຽນ ຕສ່ຽວ ປູ໋ງ ໄຮ່ ເບ໊າະ ຕຸ໊ ມ່ຽນ ໄຕ່ ເຍີຍ ຫລະເປຢີ໊ຍ ແອ໋ງ ເບ໊າະ ຕສຸ ມ່ຽນ, ມ່ຽນ ຕສ່ຽວ ໄຕ່, ເຫວີ່ຍ ຕສຸ ເຖສົາ ຕສຸ ໄຕ່ ວົ້ວ ເຕົ້າ ໄມ້ ມ່າຍ ວິນ ຢ່າ ໄມ້ ມ່າຍ ໂຮຍ້ວ ຫ່ອຍ ນິ່ນ,

24ກັ໊ບ ຕສຸ໊ນ ເຍີຍ ມ່ຽນ ອ໋ອຍ ຕສຸ ຢຽມ ໄຕ໋ ມ່ຽນ ໄຕ່ ວົ້ວ ເຕົ້າ ເຖສົາ ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ບຸດົ໋ງ ຕສິ໋ວ ນ້າຍ ເຕີ໋ຍ ເລີ໌ຍ ຊ້ຽມ.

25ກັ໊ບ ຕສຸ໊ນ ເຍີຍ ຕສວັ໋ງ ມ່ຽນ ອ໋ອຍ ຕສຸ ໂອຈ໋ວ ໄຕ໋ ມ່ຽນ ວົ້ວ ເຕົ້າ ເປຢົ໋າ ດຸ໊ດ ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ເຍີຍ ປົ໌ວ-ເດ໊ຍ, ແອ໋ງ ຝູງ ນິ່ນ ດສ໋ວນ ນິ່ນ ເປຢົ໋າ ມີ່ງ ຢຽມ ວົ້ວ ນອມ ເສຍ ແໝ່ງ ຕສີ້ງ. ນິ່ນ ອ໋ອຍ ຕສຸ ຢຽມ ວົ້ວ ເຖົາ ຕົ້ງ ຫລົ່ງ ທສີງ-ເດສ່ງ ໂຢ້ວ ອອນ ຕ້າຍ ວົ້ວ ເຕົ້າ ຕົ້ມ ໄຊ ມ່ຽນ ເກວີຍ ເສີຍ.

26“‘ມປ່າ ເຊ ກ໊ອງ ໄຕ໋ ມ່ຽນ ວົ້ວ ເຕົ້າ, ໄມ້ ກຸ໊ນ ຫາຍ ຕສັ່ນ, ຕະຟ່ານ ທສວດ ນິ່ນ ເປຢົ໋າ ມີ່ງ ຢຽມ ວົ້ວ ນອມ ເສຍ ແໝ່ງ ຕສີ້ງ ກະເຫຍ່ຍ,

27ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ປວັດ ນິ່ນ ຢຽມ ຕສີ້ງ ກະເຫຍ່ຍ ຕສ່ຽວ ໄຕ໋, ຈ໊າວ ມ່ຽນ ແໝ່ງ ວິນ ວົ້ວ ເຕົ້າ ຢ່າ ໄມ້ ມ່າຍ ຕສຸ໌ຍ.

28ໄຕ໋ ມ່ຽນ ເຍີຍ ມ່ຽນ ອ໋ອຍ ຕສຸ ຢຽມ ນິ່ນ ເຍີຍ ເສຍ ແໝ່ງ ຕສີ້ງ ຕສົ໊ວ ຕົ້ມ ໄຊ ມ່ຽນ ເກວີຍ ເສີຍ, ອກະຮ້າ ດສ໋ວນ ນິ່ນ ກັ້ນ ເຍີຍ ເປຢົ໊າ ຕຸ໊ ອ໊ະ.

29“‘ໄມ້ ກຸ໊ນ ຢຽມ ຫາຍ, ນ້າຍ ເຊ ເມີ່ຍ ບົວ ຕ່ອຍ ເຈ໋ຍ ຕ່ອຍ ອ໋ອຍ ຕສຸ ກັນ ເຍີຍ ເລີ໌ຍ.

30“‘ຫາຍ ເຕົ້າ ໄຕ໋ ມ່ຽນ ອ໋ອຍ ຕສຸ ມ່າຍ ອີ ເຕສ໋ຍ ເຕົ້າ ໂຕສ໋ວ ຕສອງ-ເຕສ໋ງ ຖສີງ ໄຕ໋ ຕຸ໊ ວົ້ວ ເຕົ້າ ໄຕ໋ ມ່ຽນ ເຍີຍ ມ່ຽນ. ຂູງ ມ່າຍ ດຸ ເຕົ້າ ໂຕສ໋ວ ຕສອງ-ເຕສ໋ງ ຮນັ້ງ, ໄມ້ ຕູ໋ງ ໄຕ໋.

31“‘ຫລາຍ ໄຕ໋ ມ່ຽນ ຕ່ອງ ຕສຸ໌ຍ ຕສີ່ ຕຸ໊ ໄຕ່ ເຍີຍ ມ່ຽນ, ຕສູ໊ງ ອ໋ອຍ ຕສຸ ໄຕ່. ໄມ້ ຕູ໋ງ ຕສິ໊ບ ນິ່ນ ອ໋ອຍ ມ໌າຍ ແໝ່ງ ເຍີຍ ກະນ້າຍ.

32“‘ຢ່າ ໄມ້ ຕູ໋ງ ຕສິ໊ບ ເປຢົ໋າ ມີ່ງ ຢຽມ ເສຍ ແໝ່ງ ຕສີ້ງ ເຍີຍ ມ່ຽນ ອ໋ອຍ ຕສົວະ ແໝ່ງ ເຍີຍ ຍ່ານ ເຫວີ່ຍ ປຸນ ນິ່ນ ຕຸ໊ ດສ໋ວນ ກັ້ນ ເຍີຍ ເປຢົ໊າ, ໄມ້ ຕສົ໊ວ ຕົ້ມ ໄຊ ມ່ຽນ ເກວີຍ ເສີຍ ດ່າງ.

33“‘ໄມ້ ຕູ໋ງ ປຸນ ເມີ່ຍ ບົວ ຢຽມ ເຍີຍ ເຕີ່ຍ-ປູງ ມ່າຍ ຫວຸຍ. ຫລາຍ ໄຕ໋ ມ່ຽນ, ດສຢ໊າມ ຫລ່ຽວ ເອຈ່ຍ ເດົາ, ເຊ ປຸນ ເຕີ່ຍ-ປູງ ມ່າຍ ຫວຸຍ. ຢ່າ ໄມ້ ມ່າຍ ຫາຍ ຫຍູ່ງ ໄຮ່ ສາ ຕຸ໊ ເດສ່ງ ຫລ່ຽວ ທສວດ ເຍີຍ ດສຢ໊າມ ເຍີຍ ຫວຸຍ, ທສວດ ລິ໌ວ ປຸນ ດສຢ໊າມ ຫລ່ຽວ ທສວດ ວົ້ວ ເຕົ້າ ເຍີຍ ດສຢ໊າມ.

34ໄມ້ ຕູ໋ງ ປຸນ ເມີ່ຍ ບົວ ຢຽມ ຈ໊ຽນ ເຍີຍ ເຕີ່ຍ-ປູງ ມ່າຍ ຫວຸຍ. ເຊ ເຢຍ ຢຽມ ເຍີຍ ຕ໋ອງ, ເຫວີ່ຍ ຕສຸ ເຢຍ, ຕສ໊ຽວ, ຢຽມ ອິສະລາເອນ ມ່ຽນ ບຸດົ໋ງ.’”

← Chapter 34 Jump to: Chapter 36 →