Jeremiah 50 — Madurese Bible 1994 (ALKETAB E DHALEM BASA MADURA)

1Reya' pessenna PANGERAN ka sengko' parkara kottha Babil ban pandhudhu'na,

2“Pasang tandha, pas kabala ka sa-bangsa ja' Babil la gaggar! Ja' roseya'agi parkara jareya! Merodakh dibana la epaancor, ca-arcana se cemmer la bella ataltalan, ban la-brahalana la eya-seya parana.

3Badha bangsa se dhatengnga dhari dhaja nyerranga Babil sampe' nagara jareya daddi teggal se kajal. Manossa ban keban bakal buruwa, ban tadha' se endha' ennengnga e jadhiya pole.”

4PANGERAN adhabu', “E bakto jareya oreng Isra'il ban Yehuda bakal dhatengnga areng-bareng sambi nanges nyare'e Sengko', Allahna.

5Reng-oreng jareya bakal atanya'a jalanna ka Siyon, pas ajalan ka tojjuwan jareya. Reng-oreng jareya bakal mabadha'a parjanjiyan se langgeng bi' Sengko', ban bakal neptebbana janji jareya.

6Tang ommat marabut dumba se edina bi' reng-oreng ngowanna sampe' padha posang e pagunongan. Kabbi padha ajalan ta' etemmo tojjuwanna dhari gunong se settong ka settonganna ban ta' tao pole e dhimma bengkona.

7Tang ommat jareya eserrang bi' sakabbinna oreng se tatemmo bi' aba'na. So-mosona Tang ommat ngoca', ‘Se elakone sengko' ban ba'na reya ta' sala, sabab reng-oreng jareya la dusa ka PANGERAN. Bangatowana reng-oreng jareya parcaja ka PANGERAN, daddi reng-oreng jareya koduna teptep esto ka PANGERAN.’

8He ommat Isra'il, mara buru dhari Babil! Ba'na se kodu ondur kaadha', sopaja esosol bi' laenna.

9Sengko' madhatengnga bangsa se wat-kowat dhari dhaja sopaja nyerranga Babil. Sa-bangsa jareya bakal ngatora barisan, pas nyerranga sarta makala'a Babil. Sa-bangsa jareya ahli ngocol pana ban panana ta' tao lopot.

10Babil bakal erampasa, ban reng-oreng se arampas jareya bakal ngala'a sabarang se badha noro' sakarebba dibi'. Sengko', PANGERAN, la ngoca'.”

11PANGERAN adhabu, “He oreng Babil, ba'na arampok Tang ommat. Ba'na ca'-lonca'an kaperagan akantha jaran se aheyem, akantha sape se teppa'na ngamba.

12Tape ba'na bakal daddiya bangsa se paleng tadha' artena e antarana sakabbinna bangsa. Kotthana ba'na dibi' se raja rowa bakal eya'-seya'a ban epamalowa. Nagarana ba'na bakal daddiya ra-ara beddhi se kajal ban kerreng.

13Lantaran Sengko' peggel, Babil bakal daddiya jur-gujuran se tadha' orengnga sakale. Reng-oreng se lebat e jadhiya bakal takerjada ban arassa marenges kabbi.

14He kang-tokang pana! Ator barisanna se ngepponga ban nyerranga Babil. Aceddagi na-panana ba'na ka Babil, sabab Babil la dusa ka Sengko'.

15Era'agi cerrengnga paperrangan e sabingkerra kottha jareya! Sateya Babil la atellok. Dhung-geddhungnga la epagujur. Sengko' parappa'na ajalannagi babales ka Babil. Daddi lakonnagi ka bangsa jareya akantha se elakonnagi bangsa jareya ka reng-oreng laen.

16Jaga ja' sampe' badha oreng nabur ne-bine otabana molong hasella tana e nagara jareya. Reng-oreng manca se badha e nagara jareya bakal moleya kabbi ka nagarana, sabab padha tako' ka tantara se nyerranga.”

17PANGERAN adhabu, “Oreng Isra'il reya akantha dumba saambalan se eserser ban epabalessadan bi' macan. Dha'-adha'na eserrang bi' rato Asyur, saellana jareya Rato Nebukadnezar rato Babil agisgis lang-tolangnga.

18Daddi Sengko', PANGERAN Se Mahakobasa, Allahna Isra'il, ngokoma Rato Nebukadnezar ban nagarana, epapadha'a ban Sengko' se ngokom rato Asyur.

19Sengko' mabaliya oreng Isra'il ka nagarana. Oreng Isra'il bakal ngakana dhari hasella tana e Gunong Karmel ban dhaera Basan. Oreng Isra'il bakal kennyanga ban hasella tana dhaera Efraim ban Gileyad.

20E bakto jareya Isra'il ban Yehuda bakal berseya dhari dusa, sabab Sengko' nyapora'a reng-oreng se bi' Sengko' la epasalamet. Sengko', PANGERAN, la ngoca'.”

21PANGERAN adhabu ka settong bangsa dhari dhaja, “Serrang pandhudhu' Merata'im ban Pekod. Pate'e kabbi. Jalannagi Tang Parenta reya. Sengko', PANGERAN, la ngoca'.”

22Sowarana paperrangan agarudhu' e dhalem nagara, kabbi padha ancor.

23Dunnya bi' Babil etette ban tokol sampe' ancor, tape sateya tokol jareya potong ataltalan! Sa-bangsa padha takerjat kabbi ngedhing kadaddiyan se teba ka nagara jareya.

24Pangeran adhabu, “Babil, ba'na alaban ka Sengko', daddi sateya ba'na tajebbak e dhalem jira' se bi' Sengko' pajat epasang epajira'a ba'na, tape ba'na ta' apangrasa.

25Gudhangnga Tang sanjata bi' Sengko' la ebukka', Tang ate peggel ban Sengko' makalowar ta-sanjata jareya, sabab Sengko', Guste ALLAH Se Mahatenggi ban Mahakobasa kodu ajalannagi settong lalakon e Babil.

26Serrang Babil dhari man-dhimman, bungkar dhang-gudhangnga gandumma! Tompo' rang-barang rampasan pakantha se nompo' gandum! Pamosna nagara jareya! Ja' sampe' badha karena!

27Pate'e tantarana kabbi! Patompes kabbi! Palang bangsa Babil! La baktona bangsa jareya eokom!” (

28Reng-oreng se buru ka Yerusalim dhari Babil nyareta'-agi baramma babalessa PANGERAN, Guste Allah ka bangsa Babil polana apa se la elakone bangsa jareya ka Padalemman Socce.)

29PANGERAN adhabu, “Soro kang-tokang pana nyerrang Babil. Pakalowar sakabbinna oreng se penter manna. Keppong kottha jareya ja' sampe' badha settonga se lolos. Bales sakabbinna lalakonna, lakone bangsa jareya pakantha se elakone bangsa jareya ka oreng laen, sabab bangsa jareya korang ajar ka Sengko', Se Mahasocce, Allahna Isra'il.

30E are jareya ngangodhadanna bakal mateya e rong-lorongnga kottha, ban tantarana bakal epaancora kabbi. Sengko', PANGERAN, la ngoca'.

31Babil, ba'na ce' tenggina ate! Daddi, Sengko', Guste ALLAH Se Mahatenggi ban Se Mahakobasa, ngadhebbana ba'na. La baktona ba'na eokom.

32Bangsana ba'na se tenggi ate jareya bakal tatandhunga pas labu ka tana. Tadha' oreng settonga se nolongana majaga ba'na. Tha-kotthana ba'na bi' Sengko' eobbara, ban sabarang se badha e sabingkerra ba'na epamosna'a.”

33PANGERAN Se Mahakobasa adhabu, “Oreng Isra'il ban oreng Yehuda tatendhes ejaga ce' rapedda bi' reng-oreng se nawan, ban ta' kera eocol.

34Tape Sengko' se masalamet bangsa jareya kowat, Tang nyama PANGERAN Se Mahakobasa. Sengko' dibi' se ngorosa parkarana ban se madhatengnga kataremtemman ka bume. Tape ka Babil Sengko' madhatengnga baridhu ban katako'an.”

35PANGERAN adhabu, “Tompes Babil ban ra'yadda sarta pangrajana pamarentana ban reng-orengnga se ter-penter!

36Tompes bi-nabbina Babil, se lecegan ban budhu. Tompes tantarana Babil se parjuga! Saapa tako'na reng-oreng jareya!

37Ancor jaran ban kareta perrangnga! Tompes rit-parjurit sewa'anna! Saapa lo'lo'na reng-oreng jareya! Tompes dhi'-andhi'na Babil! Rampas dhi'-andhi'na!

38Pakerreng sakabbinna songay ban teggalla! Sabab Babil possa' ban la-brahala se nako'e, se magila reng-oreng se mojja la-brahala jareya.

39Lantaran jareya Babil bakal daddiya kennengnganna jin-ejjin ban roh-erroh se jahat sarta no'-mano' onta. Salanjangnga bakal tadha'a oreng se endha' enneng e nagara jareya.

40Akantha Sengko' se mamosna Sodom ban Gomora ban sa-disa e sabingkerra, kantha jareya keya Sengko' mamosna'a Babil. Tadha' oreng settonga se ennengnga e jadhiya pole. Sengko', PANGERAN, la ngoca'.

41Badha settong bangsa se kowat se teppa'na ajalan dhari nagarana se jau e bagiyan dhaja. Bangsa jareya dhateng abareng ban rato sabannya'na, aperranga.

42Bangsa jareya asanjata pana ban tombak; bengnges ban ta' andhi' ate bellas. Monyena garadabba jaranna se epaberka' maju nyerranga Babil agarudhu' akantha monyena tase' se raja omba'na.

43Ngedhing kabar jareya, rato Babil ta' bisa apa-rapa. Atena katako'an nanggung sake' akantha babine' se sake' tabu' rembi'a.

44Akantha macan se kalowar dhari alas raja e seddi'na Songay Yordan ban entar ka talon kennengnganna dumba ngamba, kantha jareya keya Sengko', PANGERAN, bakal dhatengnga ban andaddiyagiya oreng Babil daksakala buru dhari tha-kotthana. Saellana jareya Sengko' pas meleya settong pamimpin se epamarenta'a bangsa jareya. Sapa se ekenneng padha'agi bi' Sengko'? Sapa se bangal aparkara bi' Sengko'? Apa badha pamimpin se bisa amoso ban Sengko'?

45Daddi mara edhingngagi apa se la ekasajja Sengko' ka kottha Babil ban apa se eteba'agiya Sengko' ka pandhudhu'na. Maske na'-ana'na sakale eereda keya, sampe' oreng padha katako'an kabbi.

46Mon Babil la gaggar, oreng bakal ngedhinga baridhu se talebat sarana sampe' saantero dunnya gundhek kabbi; cerrengnga pandhudhu'na bakal ekaedhinga sa-bangsa laen.”