Judges 20 — Maasai 2020 (BIBLIA SINYATI)

1Nepuonu iltung'ana pooki le Israel, ebaiki Dan o metabaiki Beer-sheba te nebo enkop e Gilead; ore ina umata neiturrurro anaa oltung'ani obo te dukuya Olaitoriani te Mispa.

2Ore laiguanak le lelo tung'ana pooki, too loshon pooki le Israel neyau ate atua ilo turrur loo ltung'ana le Nkai, naa nkalifuni iip ong'uan apa iltung'ana oopuo too nkejek ooata lalema.

3Nening apa iltung'ana le Benchamen nchere eilepa iltung'ana le Israel aapuo Mispa. Nejo iltung'ana le Israel, “Entoliki iyiook, kaji apa eikununye ena torroni?”

4Ore ilo Lawi, ilo moruo apa le ina kitok nataraki metua, newal ajo, “Aewuo apa nanu Gibea, ina nara ene Benchamen, nanu o enkapiani ai, pee kirrag ina kewarie.

5Naadumakino nanu ilewa le Gibea, neman aang'adu ina aji natii kewarie; keyieu apa ninche naar nanu matua, neikony enkapiani ai, netua ninye.

6Naya nanu ina apiani ai nadung nanu aitaa ndung'udung'ot, nairriwaa nanu ninye aibulunye enkop pooki enjung'ore e Israel, amu etaasa apa ninche embae torrono naa olminong sapuk entorroni ti atua Israel.

7Eng'ura, intae iltung'ana le Israel, intae pooki, enchoru enkikoo inyi o eutaroto inyi tene.”

8Nedumunye iltung'ana pooki le Israel anaa oltung'ani obo, ejo, “Mikipuo iyiook hoo obo lang olng'obor lenye, nemeetae olalang orrinyo alo enkaji enye.

9Kake ore taata ena iyiook kintaas Gibea: eikipuo iyiook aarare ninye te oshoto e nkukuo,

10nikiya iltung'ana tomon te iip ti atua iloshon pooki le Israel, o iip ti atua enkalifu, o enkalifu too nkalifuni tomon, pee eyaki iltung'ana ndaiki, paa te nepuonu ninche netum aaitalaa Gibea e Benchamen elap, te ina taboi pooki entorroni nataasa ninche ti atua Israel.”

11Neaku eiturrurrote apa iltung'ana le Israel aaipirakinore ina anasa etaa oltung'ani obo.

12Neirriwaa iloshon le Israel iltung'ana meshomo atua olosho pooki le Benchamen, ejo, “Kaa torroni ena nataase ti atua intae?

13Ore naa taata entayu lelo tung'ana, lelo arruok le Gibea, pee kitum iyiook aataar ninche metuata, nikiwuang'ie entorroni te Israel.” Kake mening Ibenchamen oltoilo loo lalashera lenye, lelo tung'ana le Israel.

14Neiturrurrunye ile Benchamen te nebo aaipang'u too nkanas aapuonu Gibea, pee epuo olarrabal aarare iltung'ana le Israel.

15Neiturrurro ile Benchamen ina olong too nkanas enye iltung'ana nkalifuni tikitam o ile ooata lalema, te nebo lelo oomanya Gibea ooiturrurro iltung'ana iip naapishana gelunot.

16Ore ti atua kulo pooki netii iltung'ana iip naapishana gelunot kedienyiaa; laa keidim ake pooki lenye atanang'a oleinyuaa to soit le nkopito nemediak.

17Ore iltung'ana le Israel metii Benchamen neiturrur iltung'ana nkalifuni iip ong'uan oata ilalema; ore kulo pooki naa iltung'ana lo larrabal.

18Nedumunye iltung'ana le Israel neilep aapuo Betel, neikilikuanishore Enkai, “Kalo lang oituruk alo aarare ile Benchamen?” Nejoki Olaitoriani, “Yuda ong'as alo.”

19Nedumunye iltung'ana le Israel tadekenya nepuo aaitayu ilng'oborri te nkipirakinoto e Gibea.

20Neilep iltung'ana le Israel aapuo olarrabal aarare Benchamen; neitoluakino iltung'ana le Israel ninche te Gibea.

21Neipang ile Benchamen te Gibea neirragieki te nkop ina olong iltung'ana nkalifuni tikitam o are oo le Israel.

22Kake ore lelo tung'ana, lelo lewa le Israel eitagoluote, neitoki aaluaakino olarrabal te ine wueji netoluare te nkolong e dukuya.

23Nepuo iltung'ana le Israel aaishir te dukuya Olaitoriani o metaa teipa; neikilikuanishore Olaitoriani, “Eikingil iyiook aaluakino olarrabal aarare ilalashera lang lelo le Benchamen?” Nejo Olaitoriani, “Elepa enchom entaarare ninche.”

24Neigutu iltung'ana le Israel aapuonu aarare lelo le Benchamen te nkolong e are.

25Nelo Benchamen aarare ninche te Gibea te nkolong e are, nebatata te nkop iltung'ana nkalifuni tomon o isiet oo ltung'ana le Israel; ore kulo pooki naa iltung'ana loo lalema.

26Neitoki iltung'ana pooki le Israel, enjore pooki, aailep aapuo Betel neishir; netoni ninche te ine te dukuya Olaitoriani, neen ate aaitupukoo ina olong o metaa teipa, neitayu ilasarri oopejori o lasarri le seriani te dukuya Olaitoriani.

27Neikilikuanishore iltung'ana le Israel Olaitoriani (amu ore apa osanduku lo sotua le Nkai naa ine apa etii te nena olong'i,

28ore Finehas olayioni le Eliesa, olayioni le Aron, neisiaaisho te dukuya ilo sanduku apa te nena olong'i), ejo, “Eikingil iyiook aapuo olarrabal aarare lelo alashera lang lelo le Benchamen, anaa eikintirring'a?” Nejo Olaitoriani, “Elepa enchom; amu ore taisere kaishoru nanu ninche apik atua nkaik inyi.”

29Neaku eirriwayie Isiraeli iltung'ana meshomo aajing ilnukat aaman Gibea.

30Nepuo iltung'ana loo Siraeli aarare ile Benchamen te nkolong e uni, neitobirakino olarrabal pee earare Gibea, anaa enaikuna too nkulie katitin.

31Neipang iltung'ana le Benchamen aapuo aarare lelo tung'ana nerrumori aaitalam enkanasa. Ore anaa oshi too nkulie katitin neiteru aaoshisho near embata oo ltung'ana metuata, too nkoitoi, aa ore enkoitoi nabo nalala naa enailep alo Betel, nelo enkae Gibea. Ore te ina kisiajata near iltung'ana oobaya tomoni uni o are loo Siraeli.

32Nejo lelo tung'ana le Benchamen, “Ekueta ninche te dukuya iyiook anaa apa te dukuya.” Kake etejo iltung'ana loo Siraeli, “Maisika iyiook nikintalamaa ninche te nkanasa aarik nkoitoi kituaak.”

33Nedumunye iltung'ana pooki loo Siraeli too wuejitin enye, neitobirakino olarrabal te Baal-tamar; ore lelo tung'ana loo Siraeli ootii olnukata neisarrisar too wuejitin enye aapuo enkalo o loo ntoluo le Geba.

34Nepuonu aaimu enkalo e Gibea iltung'ana nkalifuni tomon oogeluno ti atua Israel pooki. Negolu olarrabal oleng. Neitu apa eyiolou iltung'ana le Benchamen aajo etataanikia ninche enkidaata.

35Nemir Olaitoriani Benchamen te dukuya Isirael. Neidaikie iltung'ana le Israel iltung'ana nkalifuni tikitam o imiet o iip nabo oo ltung'ana le Benchamen te ina olong; ore kulo pooki naa iltung'ana loo lalema.

36Neaku etoduaa ile Benchamen ina olong aajo etimiraki. Ekueta apa iltung'ana le Israel aailany ile Benchamen, amu eisiliga apa ninche lelo tung'ana ootii olnukata, otii embata e Gibea.

37Nedumunye lelo tung'ana apa ootii olnukata, neisarisaru aakuetiki Gibea, nepuo lelo tung'ana ootii olnukata aar enkanasa tenepi o lalam.

38Ore apa olmonekie otoning'oteki te rishata oo ltung'ana le Israel o ltung'ana ootii olnukata, naa nchere, teneitayu enkatampoi sapuk e mpuruo naailep shumata, te nkanasa,

39neibelekenyakino iltung'ana le Israel olarrabal. Neiterua apa Benchamen aar metuata iltung'ana loo Siraeli oobaya tomoni uni nejo ninche, “Esipa etooshoki ninche aanang'ie enkop te dukuya iyiook, anaa apa to larrabal le dukuya.”

40Kake ore pee eiter ailepu ilo monekie te nkanasa, te mpuruo nairrusha, neing'or ile Benchamen siadi, naa ng'ura, etaa duoo enkanasa pooki empuruo naijukujuku alo keper.

41Neibelekenyuni taa iltung'ana loo Siraeli, neidang iltung'ana le Benchamen, amu etoduaa ninche aajo etataanikia ninche enkidaata.

42Ore enkaraki ina neibelekenya ninche te dukuya iltung'ana le Israel aaipirri ong'ata; kake einepuaki ninche ore lelo ooipang'u ti atua nkanas nemut ninche te rishata enye.

43Nedung'oo iltung'ana le Benchamen, nemir aasujaa ninche neitunyoo ninche ebaiki Noha o meitabaiki enkipirakinoto Gibea te nkalo o loosaen.

44Nebatata ile Benchamen nkalifuni tomon o isiet, ore pooki naa iltung'ana yiolot.

45Neibelekenya ninche neisikaki enkalo e ong'ata aapuo endapidapoi e Rimon; neari metuata iltung'ana nkalifuni imiet too nkoitoi kituaak, neitirrishakini aasujaa o meitabaikini Gibom, nesesekuani iltung'ana nkalifuni are te ine.

46Neaku ore lelo pooki le Benchamen ootabatate te ina olong naa nkalifuni tikitam o imiet le lelo ooenita ilalema, ore pooki naa iltung'ana yiolot.

47Kake eibelekenyate iltung'ana iip ile neisik aapuo ong'ata enkalo e ndapidapoi e Rimon, nebik ninche te ina dapidapoi e Rimon ilapaitin oong'uan.

48Neitoki iltung'ana le Israel aaibelekenyakino iltung'ana le Benchamen neshurt ninche te nepi olalem, iltung'ana o ng'uesi o pooki naanoto ninche. Ore nkanas enye apa pooki naaitobira nepejoo te nkima.