1 Kings 8 — Maasai 2018 (BIBLIA SINYATI TE NKUTUK OO LMAASAI NATISIRAKI ENG'EJUK NAATA MBUKUI E DITROKANONI)

1Neitoki Solomon aiturrur ilpayiani loo Siraeli o larikok pooki loo loshon, lelo arikok loo nkajijik oo loo menye, loo ltung'ana loo Siraeli, meetu dukuya olaiguanani Solomon te Yerusalem, pee eyau osanduku lo lning'o lo Laitoriani aaitung'uaa enkanasa e Daudi, aa taa Sion.

2Neiturrurrokino ilewa pooki loo Siraeli olaiguanani Solomon to sirua to lapa le Etamin, laa ninye olapa liopishana.

3Nepuonu ilpayiani pooki loo Siraeli, nedumu ilapolosak ilo sanduku.

4Neyau ninche ilo sanduku lo Laitoriani, oilo ng'obor, o nena tokiting pooki naasinya apa naatii atua ilo ng'obor, neyau ilapolosak o Lawi nena pooki.

5Ore olaiguanani Solomon o eumata pooki oo Siraeli, apa naiturrurre te dukuya ninye, netii tenebo ninye te dukuya ilo sanduku, nepolos inkerra kumok oleng o lmong'i lemeikenayu te nkumoi.

6Neitoki ilapolosak aayau ilo sanduku lo lning'o lo Laitoriani ewueji enye, tiatua ilo gilata liatua le nkaji, tiatua ine nesinya aisul. Tiabori inaipuko oo lkerubi.

7Amu kelak apa lelo kerubi inaipuko enye aaitushur ilo sanduku o nkeek enyena.

8Naa kaadoru apa nena keek oleng ometaa kelioo ineeiting'ie te wueji sinyati eton eitu ejing'i ine wueji sinyati e atua. Kake melioo te boo; netii ninche ine o taata.

9Metii apa toki atua ilo sanduku meteleku ake inapa soito are dapashi naatipika Musa ine te Horeb, teine apa neitobirie Olaitoriani olning'o o ltung'ana loo Siraeli, apa pee epuku aaing'uaa enkop e Misiri.

10Ore ake pee eipang'u ilapolosak aaing'uaa ine wueji sinyati, neiput enkatampoi enkaji Olaitoriani.

11Ore te nkaraki ina, neaku meidim ilapolosak aaitasho aaisiaaisho te nkaraki ina atampoi, amu eiputa enkitoo o laitoriani enkaji o Laitoriani.

12Neitoki Solomon ajo, “Etipika Olaitoriani enkolong keper, kake etejo ninye keton ninye te naimin namisimis.

13Aateshetaka nanu iyie Enkaji sidai, ewueji nimany iyie ntarasi.”

14Neitoki olaiguanani aibelekenya aing'or olorere, nemayian ina umata pooki oo ltung'ana loo Siraeli. Neitashe ina kata eumata pooki oo ltung'ana loo Siraeli.

15Nejo ninye, “Meisisi Olaitoriani loo Siraeli, laa ninye oitabayie te nkaina enye ina apa naisiligie te nkutuk enye Daudi papaai lai, ajo,

16‘Ore ebaiki enkolong nayawua iltung'ana laainei loo Siraeli aitung'uaa Misiri, eitu nanu agelu enkanasa too loshon pooki loo Siraeli naa ninye ashetie enkaji, pee etum enkarna ai ataa ketii ine; kake ategelua nanu Daudi pee eaku oloitore iltung'ana laainei Isiraeli.’

17Etii apa atua oltau le Daudi papaai lai pee eshet enkaji te nkaraki enkarna o Laitoriani, Enkai oo Siraeli.

18Kake etiaaka apa Olaitoriani Daudi papa, ‘Ore amu etii apa oltau lino pee ishet enkaji te nkaraki enkarna ai, itaasa iyie embae sidai amu ketii apa ena atua oltau lino.

19Kake ore ake eyia mishet iyie ina aji, olayioni lino likiikini ninye olo ashet ina aji te nkaraki enkarna ai.’

20Ore taata eitabayie Olaitoriani enkisiligata enye apa naisiligishore, amu atijing'a nanu erishata e Daudi papaai lai, naton to lorika le nkitoo le Israel, anaa apa enaisiligishore Olaitoriani, natesheta nanu enkaji te nkaraki enkarna Olaitoriani, Enkai e Israel.

21Ore teina naishorua nanu ewueji nepiki osanduku le Nkai, laa ninye etii atua olning'o lo Laitoriani, apa oitobira tenebo loo papa, apa pee eyau ninche aaitung'uaa enkop e Misiri.”

22Neitoki Solomon aitashe te dukuya olperere lo lasar lo Laitoriani te dukuya ina umata pooki oo Siraeli, neitorio inkaik enyena pokira are ailepie shumata;

23nejo ninye Olaitoriani, Enkai e Israel, meetae Enkai nikinyaanyukie, te shumata o te keper, aashu tiabori te nkop. Imbung olning'o nintodolu enyorrata nauno too sinkan linono, oopuo te dukuya iyie too ltauja lenye pooki;

24iyie apa oibung'a te papaai Daudi ina nimbalunye te ninye; ee iroro iyie te nkutuk ino, te nkarna ino nintabaya ina ena olong.

25Ore naa taata Olaitoriani, Enkai, e Israel, mbung'a to sinka lino Daudi, te papaai lai; ina apa nisiligie ninye ijo, ‘Melai aekata te iyie oltung'ani oitashe te dukuya nanu, pee etonie olorika le nkitoo le Israel, teneing'or ake duoo ninye ilayiok linono inkoitoi enye, nepuo te dukuya nanu anaa apa enishomo te dukuya nanu.’

26Ore naa taata na Ai e Israel, nchoo ilo rorei lino meitabari apa lirorie osinka lino Daudi, papaai lai.

27“Kake amaa, kemany Enkai enkop? Mikiishaa iyie shumata o keper nalakua; kebaa naa enkitisho ena aji natesheta nanu!

28Ore ake eyia itishilayie iyie enkomono o sinka lino o esayiata enye. Olaitoriani Enkai ai, toning'o enkishirata o enkomono naomon osinka lino te dukuya iyie ena olong;

29pee etum inkonyek inono aataboloto dama o kewarie aaing'ura ena aji, ene wueji nitejo iyie, ‘Keaku keton enkarna ai teine.’ Pee itum iyie atoning'o ena omono naomon osinka lino te nkaraki ene wueji.

30Nining iyie enkomono o esayiata o sinka lino oltung'ana linono Isiraeli, teneomon ninche eing'or ene wueji, ee toning'o iyie itii keper ina manyisho ino; tenining, nipalaki iyiook.

31“Teneas oltung'ani eng'oki tialo olelatia enye neinosieki ninye olmumai, nelotu ninye anya olmumai te dukuya olperere lino lo lasar tiatua ena aji,

32nining naa iyie te keper, niaas embae, nguanare iyie isinkan linono, nidung'oki enkiguana ilo arruoni, ayau enkarruoisho enye shumata endukuya enye makewan, nimbalunye ilo asipani alaaki ninye te risioroto e supatisho enye.

33“Te nemir ilmang'ati iltung'ana linono le Israel, te nkaraki nataasa eng'oki tialo iyie,

34te nikimbelekenyakino ninche, neibalunye enkarna ino, neomon aasaisho te dukuya iyie tiatua ena aji; nining iyie te keper, nipalaki ing'ok oo ltung'ana linono. Torrinyu ninche ina kop ninchoo loo menye.

35“Teneikeno keper neaku meetae enchan, te nkaraki nataasa ninche eng'oki tialo iyie, teneomon ninche eing'or ene wueji, neibalunye enkarna ino, neibelekenya aaing'uaa ing'ok enye ina kata intamio iyie ninche.

36Toning'o naa iyie te keper, nipalaki eng'oki oo sinkan linono, Isiraeli, te ninteng'en iyie ninche enkoitoi napuo aaim, nincho iyie ninche enchan, naa ninye inchoo iltung'ana linono metaa ninye enjungore.

37“Tenelotu olameyu enkop, anaa olmeitai, anaa enkidaaroto oo ndaiki, anaa olmaati aashu olkurto; teneman aamuat ninche ilmang'ati lenye tiae anasa nabo oo nkanas enye; to lmeitai ake ninye pooki, o te muoyian ake ninye naba anaa enatii;

38Teneomon te nkomono ake pooki, o te sayiata ake pooki nasaisho pooki tung'ani aashu iltung'ana linono loo Siraeli pooki, eyiolo ake oltung'ani emion o ltau lenye makewan, neilepie inkaik enyena aipirie ena aji,

39nining naa iyie te keper teina manyisho ino, nipalaki ninche, niaas embae, nincho ake pooki tung'ani te risioroto oo nkoitoi enyena pooki, amu iyie ake, iyie ake, openy oyiolo iltauja too nkera pooki e tung'ani.

40Pee kitum ninche aatureita nkolong'i pooki naaishu teinakop apa ninchoo iyie loo menye.

41“Ore tenebo nena, tenelotu oltung'ani loo loreren, leme o loo ltung'ana linono Isiraeli, oing'uaa enkop nalakua, nelotu te nkaraki enkarna ino,

42(amu kening'oo ninche enkarna ino kitok, o enkarna ino magilani, o enkaina ino naitoriori) tenelotu ninye neomon eing'or ena aji.

43Toning'o iyie te keper, teina manyisho ino, niaas te risioroto e nena naaomonu ilo tung'ani loo loreren te iyie; pee etum iloreren pooki le nkop aataiyiolo enkarna ino nikiureyu iyie, anaa enatiu iltung'ana linono loo Siraeli, netum sii aatayiolo nchere ore ena aji natesheta nanu naa enkarna ino eipotieki.

44“Teneipang iltung'ana linono aapuo olarrabal aagilunore ilmang'ati lenye, te nkoitoi ake ninye naba anaa enirriwayie ninche meima, neomon ninche Olaitoriani eing'or ina anasa nitegelua iyie o enkaji natesheta nanu te nkaraki enkarna ino,

45toning'o naa iyie itii keper enkomono o esayiata enye, nincho ninche meisula.

46“Teneas ninche eng'oki tialo iyie - amu meetae oltung'ani lemeas eng'oki, nigorokino iyie ninche, nincho iyie ninche ilmang'ati lenye, neaku ewaki ninche aaraya enkop oo lmang'ati lenye, elakua o etaana.

47Kake tenepik ninche iltauja lenye teinakop apa nataarayioki aaya, neirridu ninche, nikisai ninche iyie teinakop oo lmang'ati lenye apa ooibung'a ninche nejo, ‘Kitaasa iyiook eng'oki, kitogolong'utua nikitaasa entorroni’.

48Teneirridu ninche too ndamunot enye pooki o too ltauja lenye pooki tiatua ina kop oo lmang'ati lenye, apa oowaita ninche aaraya, nikiomon ninche eing'orita enkop enye, apa ninchoo iyie loo menye, ina anasa nitegelua iyie, o ina aji natesheta nanu te nkaraki enkarna ino;

49toning'o naa iyie ninche te keper teina manyisho ino, enkomono enye o esayiata enye. Nchoo ninche meisula.

50Tapalaki lelo tung'ana linono ootaasa eng'oki tialo iyie, tapalaki nkitarruorrot enye pooki naataasa tialo iyie. Nchoo ninche olng'ur too nkonyek e lelo ooibung'a aaraya ninche pee etum aaing'urrie ninche.

51(Amu iltung'ana linono ninche, naa enjung'ore ino ninche apa niyaua iyie aitung'uaa Misiri, aitung'uaa atua olmoti le nkima loo sekenke).

52Nchoo nkonyek inono metoduaa esayiata o sinka lino o esayiata oo sinkan linono Isiraeli, nining ninche enkata naba anaa enikimpot iyie.

53Amu inteng'ela iyie ninche too loreren pooki le nkop, pee eaku enjung'ore ino, anaa apa enimbalunye te Musa, osinka lino, apa pee iyau iyie Olaitoriani Enkai loo papa aitung'uaa Misiri.”

54Ore ake pee eidip Solomon atoomono nesai Olaitoriani, neinyototo ninye aing'uaa dukuya olperere lo lasar lo Laitoriani, te wueji duoo netigilie kung neilepie inkaik enyena aing'orie keper.

55Neitashe ninye nemayian eumata pooki oo ltung'ana loo Siraeli to ltoilo kitok, nejo,

56“Meisisi Olaitoriani laa ninye oishoo enkiyeng'iyeng iltung'ana lenyena loo Siraeli, te risioroto e nena pooki apa naaisiligishore ninye. Meetae ninye ororei obo otong'oro too nkisiligat enyena sidain, naatolikio apa ninye Musa osinka lenye.

57Metaa Olaitoriani Enkai ang tenebo iyiook anaa apa enatii tenebo loo papa; metaa meing'uaa ninye iyiook nemeiturraa iyiook.

58Pee etum aitonyorra iltauja lang kewan enye pee kipuo too nkoitoi enyena pooki, nikimbung inkitanapat enyena, o nkikoot enyena, o nkiguanat enyena, apa naaitanapa ninye loo papa.

59Nchoo kulo rorei laainei, laa ninche atasaishore te dukuya Olaitoriani, etaaniki Olaitoriani Enkai ang dama o kewarie, naa nchoo ninye meisula osinka lenye, neisulu iltung'ana lenyena, Isiraeli, anaa ake enaishiaakino te pooki olong.

60Pee etum iloreren pooki le nkop aatayiolo nchere Olaitoriani ninye Enkai. Meetae likae.

61Enchoo naa iltauja linyi eitoriori te dukuya Olaitoriani Enkai, nipuopuo too nkiguanat enyena, nimbung'ubung'u nkitanapat enyena anaa eninkuna ena olong.”

62Neitoki olaiguanani, o Siraeli pooki ootii tenebo, aaitayu olasar te dukuya Olaitoriani.

63Neishooyo Solomon anaa ilasarri le seriani to Laitoriani ilmong'i nkalifuni tikitam oaare o nkerra nkalifuni iip nabo o tikitam. Neaku eitisinya olaiguanani o iltung'ana pooki loo Siraeli enkaji Olaitoriani.

64Ore ake teina olong nemayian olaiguanani empolos e ndung'oroto apa natii dukuya enkaji o Laitoriani. Amu teine eitayio olasar opejori o lasar le ntapa o rubat naapir o lasar le seriani, amu ore apa ilo perere lo lasar lo suyai otii ine naa aikiti oleng, tenepiki olasar opejori o lasar le ntapa, o rubat naapir o lasar le seriani.

65Neaku keeta apa Solomon osirua teina kata, o Siraeli pooki tenebo ninye, eumata kitok nabaiki enejing'ieki Hamat o metabaiki oerata le Misiri, te dukuya Olaitoriani Enkai ang, inkolong'i naapishana.

66Ore te nkolong e isiet neisho Solomon iltung'ana meshomo, nemayian lelo tung'ana olaiguanani, nepuo taa inkang'itie enye eng'ida neshipa too ltauja te nkaraki esupatisho pooki naitoduaa Olaitoriani Daudi osinka lenye o Siraeli lelo tung'ana lenyena.