1 Thessalonians 1

Mossi MPBU (WẼNNAAM SEBRE 2014)

Jump to: Chapter 2 →

1A Poll ne a Sɩlvẽ la a Tɩmote n gʋlsd Tesalonik-rãmb wẽnd doogã sẽn be ba a Wẽnnaam pʋgẽ, la Zu-soab a Zeezi Kiris pʋgẽ wã. Bɩ Wẽnnaam ning yãmb barka la b kõ yãmb bãane.

2Tõnd pʋʋsda Wẽnnaam bark yãmb yĩng n ka basdẽ ye, la tõnd pʋta yãmb yell d pʋʋsg pʋgẽ.

3Tõnd tẽegda yãmb tẽebã tʋʋmde, la yãmb nonglmã tʋʋmde, la y tẽeb ne tõnd Zu-soab a Zeezi Kirisã tẽeb‑pidsg gũudum sẽn ka vigsdã yelle, tõnd ba a Wẽnnaam taoor n ka basdẽ ye.

4D ba-biis Wẽnnaam sẽn nonge, tõnd miime tɩ Wẽnnaam tʋlsa yãmba.

5Bala, koe-noogã tõnd sẽn moona ka wa yãmb nengẽ ne no-goam bal ye. La yaa ne pãng me, ne Sɩɩg-sõngo, tɩ sãmbg baa bilf ka a pʋgẽ ye. Sɩd me, yãmb mii tõnd sẽn maan to-to yãmb sʋka, yãmb sõngr yĩnga.

6Yãmb sẽn deeg Wẽnnaam goamã yel-pakr wʋsg pʋgẽ, ne sũ-noog ning Sɩɩg-sõng sẽn kõtã, yãmb lebga tõnd togs-n-taase, la Zu-soabã togs-n-taas me.

7Woto, yãmb lebga mamsg tẽedbã fãa sẽn be Masedoan la Akayi wã yĩnga.

8Bala, Zu-soabã koɛɛgã yii yãmb nengẽ n sãage. Ka Masedoan la Akayi bal ye. Neb sẽn be zĩig fãa bãnga yãmb tẽeb ne Wẽnnaamã yelle, tɩ ka leb n yaa tɩlɛ tɩ tõnd leb n gom a yell ye.

9B gomda tõnd yell n wilgd tõnd sẽn paam n kẽ yãmb sʋk to-to, la yãmb sẽn kos sugr n tek yam to-to, n wẽnemd n bas wẽn-naandsã n sakd Wẽnnaam sẽn vɩ n yaa sɩd soabã,

10la y gũud tɩ bãmb bi-ribl a Zeezi yi yĩngr n wa, soab ning Wẽnnaam sẽn kɩt tɩ b vʋʋg n yi kũum sʋka, la b yolsd tõnd ne Wẽnnaam sũ-puugr sẽn watã.

Jump to: Chapter 2 →