1 Thessalonians 4

Mossi MPBU (WẼNNAAM SEBRE 2014)

← Chapter 3 Jump to: Chapter 5 →

1Yaoolem bũmbu, m ba-biisi, yaa tɩ yãmb zãmsa tõnd nengẽ n bãng y sẽn tog n kẽn to-to n ta Wẽnnaam yam, la y pʋs n maanda a woto. Moasã, tõnd kota yãmba, n bõosd yãmb ne Zu-soab a Zeezi yʋʋr tɩ y maan neer n yɩɩd a woto.

2Sɩd me, yãmb mii bũmb nins tõnd sẽn deeg Zu-soab a Zeezi nengẽ n wilg yãmb tɩ y maanã.

3Bũmb ning Wẽnnaam sẽn dat yaa tɩ yãmb na welg toor n yɩ bãmb dẽnda, la y yõk y mens n da maan rẽgd ye:

4Yaa tɩ yãmb ned kam fãa bãng tɩ tall a meng ne sõmblem la pʋ-peelem,

5la a ra bas tɩ ratem wẽng soog a sũurã wa nin-zaalsã sẽn ka mi Wẽnnaamã sẽn maandã ye.

6Tɩ ned da maan a to zãmb wall a wẽg-a yel-kãng pʋgẽ ye. Tõnd zoe n yeela yãmb tɩ Zu-soabã kaooda bõn-kãens bʋʋdo.

7Bala, Wẽnnaam ka bool tõnd tɩ d maan rẽgd ye, la yaa tɩ d na welg toor n yɩ bãmb dẽnda.

8Woto, ned ning sẽn kɩɩsd-a tõ-kãensã, ka ninsaal la a kɩɩsd ye, la yaa Wẽnnaam, soab ning sẽn kõ-a yãmb bãmb Sɩɩg-sõngã me la a kɩɩsda.

9Sã n yaa ne ba-biir nonglmã yelle, yãmb ka baood tɩ m gʋls yãmb n gom a yell ye. Bala, yãmb mensã paama zãmsg Wẽnnaam nengẽ tɩ nong taaba.

10Yãmb nonga ba-biisã fãa sẽn be Masedoan tõrã a woto. La tõnd sagenda yãmb sẽn yaa d ba-biisã tɩ y kẽng taoor n paase,

11la y vɩ ne taab ne laafɩ, la y ges y mens tʋʋmã yelle, la y tʋm ne y nus wa tõnd sẽn dag n yeel yãmbã, tɩ rẽnda na n yɩɩ yãmb waoogre.

12Maan-y-yã a woto tɩ y yel-manesem ne yɩng rãmbã zemse, la tɩ yãmb da zĩẽ n gũud ned sõngr ye.

13M ba-biisi, tõnd ka rat tɩ yãmb zɩ neb nins sẽn gõe wã yelle, tɩ yãmb sũyã da wa n sãam wa neb a taabã sẽn ka tar tẽeb ne beoog neerã ye.

14Sɩd me, tõnd sã n tẽed t'a Zeezi kiime la tɩ b leb n vʋʋgame, tõnd tẽedame me tɩ neb nins sẽn ki Kiris tũudum pʋgẽ wã, Wẽnnaam na n kɩtame tɩ Kiris vʋʋg-ba, n lagem bãmb ne a Zeezi n zẽke.

15Ad bũmb ning tõnd sẽn togsd yãmba, wa sẽn zems ne Zu-soabã gomde: Tõnd sẽn ket n vɩ Zu-soabã waoong daarã, tõnd ka na n deng neb nins sẽn gõe wã ye.

16Bala, koɛɛg n na n zẽke tɩ yɩ bãnde, tɩ b wʋm malegs naab a yembr koɛɛga, tɩ Wẽnnaam baorg peebe, tɩ Zu-soabã meng yi arzãn n sigi. La neb nins sẽn ki Kiris tũudma pʋgẽ wã n na n deng n vʋʋge.

17Sẽn pʋgda, b na n lagma tõnd sẽn ket vɩ wã ne bãmb n zẽk sawat pʋse, tɩ d seg Zu-soabã yĩngri. La woto, tõnd na n bee ne Zu-soabã daar fãa.

18Woto yĩnga, bɩ y bels taab sũy ne gom-kãense.

← Chapter 3 Jump to: Chapter 5 →