1 Thessalonians 5

Mossi MPBU (WẼNNAAM SEBRE 2014)

← Chapter 4 Jump to:

1M ba-biisi, yãmb ka baood tɩ mam gʋls yãmb n wilg wakat la sasa ning bõn-kãens sẽn na n zĩndã ye.

2Bala, yãmb mens mii sõama tɩ Zu-soabã waoong na n yɩɩ wa wagdr sẽn wat yʋngo.

3Wakat ning ninsaalbã sẽn na n yeel tɩ yaa laafɩ la bãanã, wakat-kãng la sãoong na n ling bãmba. La na n yɩɩ wa rogem toog sẽn paamd pag sẽn tʋte, la b kõn põs ye.

4Mam ba-biisi, yãmb yẽ ka be lik pʋgẽ tɩ da-kãng na n wa ling yãmb wa wagdr ye.

5Yãmb fãa yaa vẽenem nebã, la wĩndg nebã. Tõnd ka yʋng neb wall lik neb ye.

6Dẽ yĩngã, bɩ d da gũs wa neb a taabã ye. Ayo, d neende, la d yɩ yõk-m-mens rãmba.

7Yaa yʋng la sẽn gõe-bã gõe, la yaa yʋng la nebã yũud rãam n tuumdẽ.

8La tõnd sẽn yaa wĩndg nebã, bɩ d yɩ yõk-m-mens rãmba: Tɩ d bob tẽeb la nonglem wa gãntika, la d fõgen fãagrã tẽeb pidsg gũudmã wa kut-pugla.

9Bala, Wẽnnaam ka yãk tõnd tɩ d na paam bãmb sũ-puugrã ye, la yaa tɩ tõnd na soog fãagrã tõnd Zu-soab a Zeezi Kiris maasem yĩnga,

10Soab ning sẽn ki tõnd yĩnga, tɩ tõnd sã n vɩ wall d sã n ki me, bɩ tõnd vɩ ne bãmba.

11Woto yĩnga, paas-y taab raoodo, la y bɩɩs taab tẽeb wa y sẽn zoe n maandẽ wã.

12D ba-biisi, tõnd kota yãmb tɩ y waoog neb nins sẽn tʋmd yãmb sʋka, n tɛt yãmb Zu-soabã pʋgẽ la b keoogd yãmbã.

13Wilg-y-b tɩ yãmb nand-b lame, nong-y-b wʋsgo, b tʋʋmdã yĩnga. Zĩnd-y ne taab ne laafɩ.

14D Ba-biisi, tõnd bõosda yãmb tɩ y keoog neb nins sẽn vɩ yaarã, la y paas neb nins raood sẽn boogã raoodo, la y tebel pãn-komsem dãmba, la y maan sũ-mar ne nebã fãa.

15Gũus-y y mense, tɩ ned da lebs a to wẽng wẽng yĩng ye. Mao-y tɩ maan neere, sã n yaa yãmb ne taaba, wall ne nebã fãa.

16Maan-y sũ-noog daar fãa.

17Pʋʋs-y n da bas ye.

18Pʋʋs-y Wẽnnaam bark bũmb fãa pʋgẽ, bala, Wẽnnaam raab la a woto a Zeezi Kiris pʋgẽ.

19Da kiis-y Sɩɩg-sõngã ye.

20Da paoog-y bãngr goamã ye.

21Bʋ-y bũmb fãa yelle, tɩ sẽn yaa sõama bɩ y reege,

22la y yõk y mens ne wẽng buudã fãa.

23Bɩ Wẽnnaam sẽn so laafɩ wã maneg yãmb yĩn-tõrã b toor tɩ yɩ sõama zãnga, tɩ tõnd Zu-soab a Zeezi Kiris waoongã daare, bɩ b mik tɩ rõdb ka be yãmb belmã pʋgẽ ye, sã n yaa y Sɩɩgã, wall y yĩngã pʋgẽ.

24Sẽn bool-a yãmbã yaa sɩd soaba, la yaa bãmb n na n maan a woto.

25D ba-biisi, pʋʋs-y Wẽnnaam tõnd yĩnga.

26Pʋʋs-y ba-biisã fãa ne mok-sõngo.

27Mam bõosda yãmb ne Zu-soabã yʋʋr tɩ y karem seb-kãngã tɩ ba-biisã fãa wʋme.

28Bɩ tõnd Zu-soab a Zeezi Kiris barkã zĩnd ne yãmba.

← Chapter 4 Jump to: