Amos 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1Ade, Sẽn-Ka-Saab yetame: Moaab nebã yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bãmb yõoga Edom dĩmã kõab bugum n maan goore.

2Woto yĩnga, mam na n kɩtame tɩ bugum sig Moaab tẽngã zugu, n dɩ a pãng zĩisã sẽn be Keriyotã, la Moaab nebã na n kii bʋr-kãseng pʋgẽ, ne zabrã bʋrg la bardã peebg pʋgẽ.

3La m na n menesa b rĩmã, la m kʋ nanambs nins fãa sẽn be ne yẽnda wã. Yaa Sẽn-Ka-Saab n yeele.

4Ade, Sẽn-Ka-Saab yetame: Zʋʋda nebã yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bala, bãmb zãgsa Sẽn-Ka-Saab tõodã, la b ka sak n deeg bãmb noyã ye. Zʋʋda nebã basame tɩ wẽn-naandsã kẽes-b moogo, yaa wẽn-naands nins bãmb yaab-rãmbã sẽn dag n pʋʋsdã.

5Mam na n kɩtame tɩ bugum sig Zʋʋda zugu, la m kɩt tɩ Zeruzalɛm pãng zĩisã rɩ bugum.

6Ade, Sẽn-Ka-Saab yetame: Israyɛll nebã yel-kɛg a tãabã yĩnga, m yeel tɩ naasẽ soabã yĩnga, mam sẽn yeelã ka na n vaal ye: Bala, bãmb koosa nin-tɩrg ligd yĩnga, la b koosa naong soabã neooda yĩnga.

7Bãmb fãada naong rãmbã paoongo, baa ne tom ning sẽn be b zutẽ wã. B mongda naong rãmb bʋʋm bʋʋd zĩigẽ. Biig ne a ba kẽeda ne pag a yembre, n paoogd mam yʋ-sõngã.

8Naong rãmbã sẽn gãneg fut nins ne bãmbã, B tara rẽ n tʋɩt tẽn-kugã fãa zĩisẽ n gãe, la b be b wẽn-naandgã roogẽ, n yũud reezẽ rãamã b sẽn yaoolg nebã tɩ b yao wã.

9Mam yaool n sãama Amoor-dãmbã bãmb nifẽ, Amoor-dãmbã rag n zẽk n taa sɛɛdr tɩɩs woglem, tɩ b pãngã tat sɛn tɩɩse. La mam sãama b sẽn wom biis ninsã, la m võ b yẽgã me.

10Mam yaool n yiisa yãmb Ezɩpte, n tɛ yãmb we-raoogã pʋgẽ yʋʋm pis-naase, tɩ yãmb tõe n soog Amoor nebã tẽnga.

11Mam yãka neb yãmb kom-dibli wã sʋka, n kɩt tɩ b yɩ Wẽnnaam no-rɛɛsdba, la m yãk neb yãmb kom-bɩɩsã sʋka, n kɩt tɩ b yɩ neb sẽn welg toor Wẽnnaam yĩnga. Israyɛll nebã, ka woto sɩda? Yaa maam a Sẽn-Ka-Saab n yeele.

12La yãmb kɩtame tɩ neb nins sẽn welg toorã yũ reezẽ rãam, la y yeel m no-rɛɛsdbã tɩ b ra leb n togs pĩnd-n-bãngr goam ye.

13Beneere, mam na n neema yãmb zĩig pʋgẽ, wa ned saar sẽn zɩlg ki sẽn tabd moodo.

14Sẽn tõe-a zoees ka na n paam zĩig n soond ye. Pãensã rãmb pãng na n lebga zaalem, la gãndaoog kõn tõog n fãag a meng ye

15Tãb-tãoodbã kõn tõog n yalse, sẽn tõe-a zoees kõn tõog n põs ye. La wed-rʋʋd kõn tõog n fãag a yõor ye.

16Baa sẽn tɩ yaa-a gãndaoog n yɩɩd fãa wã na n zoe n basa a zab-teed badaare. Yaa Sẽn-Ka-Saab n yeele.

← Chapter 1 Jump to: Chapter 3 →