Amos 6

Mossi MPBU (WẼNNAAM SEBRE 2014)

← Chapter 5 Jump to: Chapter 7 →

1Sẽn vɩ-b Sɩyõ tẽngã pʋg ne bãanã na n paama toogo! Sẽn be-b Samaari tãngã zug tɩ b sũur keemẽ wã, ne tẽn-kãsengã nin-kãsems Israyɛll nebã sẽn kẽnd-b rãmb nengẽ wã na n paama toogo!

2Kẽng-y Kalne n tɩ gese, la y yi be n kẽng Hamat sẽn yaa tẽn-kãsengã, la y lebg n kẽ Gat sẽn yaa Filistẽ-dãmbã tẽngã n tɩ gese: Tẽn-bãmb sãoo soolem-kãensã bɩ? Bɩ b soolmã yɩɩda yãmb soolmã?

3Yãmb baood n targa toogã daar sẽn watã, la yaool n yaa wẽngã wakat la y kɩtd t'a pẽnegdẽ

4Yãmb gãee y gãasã sẽn nags ne wob-yẽnã zutu, ne y goeen-bʋgsã zutu, n wãbd pe-ra-poal ne nag-bi-nobds nemdo,

5la y wẽed y kʋla. Yãmb maana yʋʋm-teed wa a Davɩɩde

6Yãmb yũuda reezẽ rãam ne zɩɩm mesb laase, la y rɩkda dẽenem biis kaam n ningd y mens zutu, A Zozɛf buudã sãoong ka namsd bãmb ye!

7Woto yĩnga, bãmb n na n yɩ pipi b sẽn na n yõg n kẽes yembdo, la neb nins sẽn gãe b gãasẽ wã tig na n sɛɛme.

8Zu-soabã sẽn yaa Saasẽ-Pãng-Soabã wẽename n yeele: Mam kisa a Zakoob buudã sẽn wukd b mensã, la m kisa a na-yiyã. Mam na n basame tɩ bɛɛbã sãam Samaari tẽngã ne bũmb nins fãa sẽn be a pʋgẽ wã.

9La raop piig sã n kell zak a yembr pʋgẽ, b na n kiime.

10Ned sã n wa n na n wʋk a roagdb kũum n yi a roogẽ, n na n tɩ yõog bugum, la a wʋk a kõabã n na n yõog bugum, a na n soka ned ning sẽn be roogã yaangã yaa: Ned a to keta fo nengẽ bɩ? La sẽn be-a roogã yaangã na n leokame: Ned ba a yembr ka ket ye. La a na n leb n yeelame: Sĩnd la f ra pʋd Sẽn-Ka-Saab yʋʋr ye!

11Gese, Sẽn-Ka-Saab gomdame n yetẽ: Ro-bedr na n lebga raboogo, la ro-bil na n wãame.

12Wed-moos tõe n zoee pĩig kugr zug sɩda? Ned me tõe n koo ko-kãsengã pʋg ne niig sɩda? La yaa bõe tɩ yãmb tekd sɩd tɩ lebg zĩrẽ, la y tekd tɩrlem tɩ lebg wẽnga?

13Yãmb pẽgda y meng ne Lo-Dabaar sẽn yaa tẽn-bilã. Yãmb yetame: Ka ne tõnd meng pãng la d tõog n zab n deeg Karnayim sẽn yaa tẽng sẽn tar pãngã sɩda?

14Maam a Zu-soab a Wẽnnaam sẽn yaa Saasẽ-Pãng-Soabã yetame: Israyɛll nebã! Mam na n kɩtame tɩ buud a yembr yik zabr ne yãmba, n nams yãmb sẽn sɩng ne Hamat tẽngã rignoore, n tãag ko-zoetmã zĩ-koɛɛngã.

← Chapter 5 Jump to: Chapter 7 →