Amos 9

Mossi MPBU (WẼNNAAM SEBRE 2014)

← Chapter 8 Jump to:

1Mam yãnda Zu-soabã sẽn yas tẽn-kugrã taoor n yetẽ: Wẽ ra-lugdsã tɩ roogã miime, n lʋɩ n zãb nebã fãa! Mam na n kʋʋ bãmb yagensã ne zabr sʋʋga. Bãmb sʋkã ned ba a yembr ka na n paam n zoe, la sẽn zoet-bã ba a yembr ka na n tõog n põs ye.

2Bãmb sã n tɩ kẽ kɩɩm-kulgu, mam na n yiisa bãmb be. Bãmb sã n dʋ yĩngri, mam na n sika bãmb be.

3Bãmb sã n tɩ soond Karmell tãngã zugu, mam na n tɩ baoo bãmb be n yõg-ba, Bãmb sã n zoe n tɩ kẽ ko-kãsengã yaang n na n soonde, mam na n kɩtame tɩ wiis kɛ-ba

4Baa bãmb bɛɛbã sã n yõg-b n tɩ kẽes yembdo, mam na n kɩtame tɩ b kʋ bãmb ne zabr sʋʋga. Mam na n gũusa bãmba, la ka na n yɩ b manegr yĩng ye, na n yɩ b sãoong yĩnga.

5Zu-soab a Wẽnnaam sẽn yaa Saasẽ-Pãng-Soabã sɩɩsa tẽngã t'a rigimdi. Sũ-sãang paama neb nins fãa sẽn be a pʋgẽ wã A zẽkdame n lebgd n lʋɩtẽ, wa Ezɩpt Nill kʋɩlgã.

6Bãmb tilga b yir saasẽ, la b yɛdg b sa-gãongã tẽngã zugu, b kɩtdame tɩ koom yi ko-kãsengẽ wã, n pid tẽn-gãongã: Bãmb yʋʋr yaa Sẽn-Ka-Saabo.

7Sẽn-Ka-Saab yetame: Israyɛll nebã, yãmb yɩɩda Kuus nebã la? Ka maam n yiis Israyɛll nebã Ezɩpte, wa m sẽn yiis Filistẽ-dãmbã Kaftoore, la wa m sẽn yiis Siiri nebã Kiirã la?

8Maam a Zu-soab a Wẽnnaam geta yel-wẽn-maandbã soolem. M na n kɩtame t'a menem dũniyã zugu, la m ka na n sãam a Zakoob roogã zãng ye. Maam a Sẽn-Ka-Saab n yeele.

9Mam na n kõo bɛ wã noore, n yeel-a t'a miim Israyɛll buudã buud a taabã fãa sʋka, wa b sẽn tar goaadg n good koodo, la kugr ba a yembr ka na n lʋɩ tẽng ye.

10Yel-wẽn-maandb nins fãa sẽn be mam nebã sʋkã yetame: Ra kɩt-y tɩ toog pẽneg tõnd ye. Ra kɩt-y tɩ toog paam tõnd ye.

11Badaare, mam na n lebsa a Davɩɩd soolmã sẽn yaa wa roog sẽn dat n lʋɩ wã n me. Mam na n yẽda a võyã, n lebs n me a raboodã, Mam na n lebs n me-a lame, t'a leb n yɩ wa a sẽn dag n yaa-a soab pĩndã.

12Woto, bãmb na n sooga Edom neb nins sẽn kellã, la soolem nins fãa mam sẽn dag n so wã. Maam a Sẽn-Ka-Saab n maand bõn-kãens fãa. Yaa maam n yeele.

13Sẽn-Ka-Saab yetame: Wakat n wate, tɩ kẽer na n fẽrgdẽ tɩ kẽer pʋgd n tigsdẽ, tɩ kẽer na n send reezẽ tɩɩs tɩ kẽer pʋgd n wobda, tɩ reezẽ rã-paalg na n sodgd tãmsã zutu, la kunkubã fãa zutu.

14Mam na n lebsa Israyɛll sẽn yaa mam nebã b zĩigẽ. Bãmb na n lebs n me b tẽmsã sẽn sãamã, n kẽ be n zĩndi. Bãmb na n sela reezẽ tɩɩse, n yũ a reezẽ rãamã, Bãmb na n maana zẽed zĩisi, n dɩ a biisã.

15Mam na n zĩniga bãmb tẽms nins mam sẽn kõ bãmbã pʋse, la ned ka na n leb n tõog n yiis bãmb be ye. Sẽn-Ka-Saab sẽn yaa fo Wẽnnaamã n yeele.

← Chapter 8 Jump to: