Hosea 1

Mossi MPBU (WẼNNAAM SEBRE 2014)

Jump to: Chapter 2 →

1Ad koɛɛg Sẽn-Ka-Saab sẽn kõ a Beeri biig a Ooze, Zʋʋda rĩm-dãmb a Oozɩyaas ne a Yotam la a Akaaz ne a Ezekɩyaas wakate, la a Zoaas biig a Zeroboaam sẽn yaa Israyɛll dĩmã wakate.

2Ad goam nins Sẽn-Ka-Saab sẽn tũnug a Ooze n togsã sɩngre. Sẽn-Ka-Saab yeela a Ooze yaa: «Kẽng n tɩ peeg pʋg-yoodr n maan f paga, t'a rog yoodem kamba, Bala, tẽn-kãngã nebã basa maam a Sẽn-Ka-Saabo, wa pag sẽn bas a sɩd n kẽng yoobo.»

3Dẽ, a Ooze kẽngame n tɩ peeg a Diblayim bi-pugl a Gomeer n maan a paga. A Gomeer dɩka pʋg n dog bi-ribla.

4Sẽn-Ka-Saab yeela a Ooze yaa: «Pʋd biigã yʋʋr t'a Zɩzreyɛlle, bala, keta wakat bilfu, tɩ mam dok m sũur ne a Zehu roogã, bãmb sẽn daag zɩɩm Zɩzreyɛllã yĩnga. Mam na n kɩtame tɩ Israyɛll doogã rĩung sɛ.

5Badaare, mam na n kaooga Israyɛll tãpã, Zɩzreyɛll tẽn-nabdrẽ wã.»

6A Gomeer leb n dɩka pʋg n dog bi-pugla. B yeela yẽnda yaa: «Pʋd a yʋʋr t'a Lo-Ruhama, sẽn dat n togs tɩ b sẽn ka zoet-a soab nimbãanega. Bala, mam ka na n leb n zoe Israyɛll nebã nimbãanega, n kõ-b sugr yɛs ye.»

7La mam na n zoee Zʋʋda nebã nimbãanega. Maam a Sẽn-Ka-Saab sẽn yaa bãmb Wẽnnaamã na n fãag-b lame. La ka na n yɩ ne tãp wall zabr sʋʋga, wall ne zabr bɩ ne wiidi, wall ne saar-dãmba, la mam na n fãag bãmb ye.

8A Lo-Ruhama sẽn bas bĩisim, a Gomeer leb n dɩka pʋg n dog bi-ribla.

9La Sẽn-Ka-Saab yeela yẽnda yaa: «Pʋd a yʋʋr t'a Lo-Ami, Sẽn dat n togs tɩ ka m neb ye. Bala, yãmb ka mam neba, la mam me ka baa fɩ yãmb yĩng ye.»

Jump to: Chapter 2 →