Hosea 6

Mossi MPBU (WẼNNAAM SEBRE 2014)

← Chapter 5 Jump to: Chapter 7 →

1Dẽ, yãmb na n yeelame: «Wa-y tɩ d lebg n leb Sẽn-Ka-Saab nengẽ! Bala, bãmb n zendem tõndo, la bãmb n na n maag-do. Bãmb n pogl-do, la bãmb n na n tɩp d noadã.

2Rasem a yiib sã n paase, bãmb na n vʋʋg-d lame, la rasem a tãabẽ daarã, bãmb na n zẽk-d lame tɩ d zĩnd ne bãmba.

3Bɩ d bao ne d sũyã tɩ bãng Sẽn-Ka-Saab fãa, bala, bãmb na n waa wa zĩ-yẽegre, la b waoongã ka na n vaal ye. Bãmb na n waa wa saaga, B na n waa wa sigr saag sẽn bʋkd tẽn-gãongã.»

4Efrayiim nebã, mam na n maana yãmb bõe? Zʋʋda nebã, bõe la mam na n maan yãmba? Yãmb nonglmã wẽnda wa yibeoog sawaodgo, la wa yibeoog pĩnd meenem sẽn mesgd to-to wã.

5Rẽ n kɩt tɩ m tũnugd no-rɛɛsdbã n zabd ne-yã, la m kʋʋd-y ne m noorã goamã. Mam bʋ-kaoorã na n tãoosa wa vẽenem.

6Ka maoong n noogd mam sũur ye, yaa maan-neere. La ned sẽn mi Wẽnnaam nooma maam n yɩɩd maand sẽn yõogd bugum.

7Yãmb kɩɩsa kaoolã wa Ãdem tẽngã. Yaa beenẽ la yãmb zãmb maam.

8Galaad yaa nin-wẽns tẽnga. Bãmb sẽn pɩʋʋgẽ fãa, b raagda zɩɩm.

9Maan-kʋʋdbã yaa wa fãadb sẽn sor n gũud neda. Bãmb bee Sɩkɛm sorã zug n kʋʋd nebã. Yõwã yaa yel-beed meng-menga!

10Israyɛll tẽngã pʋga, mam yãnda yel-beedo! Yaa be la Efrayiim nebã maan yoobo, la be la Israyɛll nebã rẽgem b mense.

11La yãmb Zʋʋda nebã, mam segenda tigsg daar yãmb yĩnga, wakat ning mam sẽn na n lebs n maneg m nebã yellã.

← Chapter 5 Jump to: Chapter 7 →