Micah 3

Mossi MPBU (WẼNNAAM SEBRE 2014)

← Chapter 2 Jump to: Chapter 4 →

1Maam a Miise yetame: «A Zakoob yagensã taoor dãmba, Israyɛll buudã nanambse, m kot-y lame tɩ y kelge! Dẽ yĩnga, ka yãmb n dag n tog n bãng sẽn yaa tɩrg sɩda?

2Yãmb yaool n kisa sẽn yaa sõama, la y nong sẽn yaa wẽnga. Yãmb sɩɩda m nebã n yãgsd b gãndã, la y seend b yĩngã nemd n basd kõaba.

3Bãmb wãbda mam nebã, Bãmb puunda b gãndã, la b wõrd b kõabã. Bãmb beesd-b-la wa nemd sẽn be rʋkẽ, wa nemd sẽn be bugum dʋkẽ.

4Dẽ, bãmb na n wa kelem n boola Sẽn-Ka-Saabo, la b ka na n leok bãmb ye. Badaare, Sẽn-Ka-Saab na n solga b nengã ne bãmba, wẽng ning bãmb sẽn maanã yĩnga.»

5Ad Sẽn-Ka-Saab sẽn yet no-rɛɛsdb nins sẽn tudgd mam nebã: «B sã n kõ bãmb tɩ b rɩ, b yetame tɩ yell kae ye. La b sã n ka kõ bãmb tɩ b rɩ, bãmb yikda zabr ne a soabã.

6Bõn-kãng yĩng kɩtame, tɩ na n lebg wa yʋng yãmb yĩnga, la y ka na n leb n paam vẽnegr ye. Na n lebga lik bida yãmb yĩnga, tɩ y ka leb n tõe n paam yãab ye. Mam na n kɩtame tɩ zĩigã sobg no-rɛɛsdb-kãens yĩnga, la daarã na n lebga lik b yĩnga.

7Bãngdbã fãa na n paama yãnde, la bagbã na n paama paoogre, bãmb fãa na n luda b nemsã, yãndã yĩnga. Bala, Wẽnnaam ka na n leb n leokd-b ye.»

8La sã n yaa ne maam a Miise, Wẽnnaam Sɩɩgã pid-m-la ne pãnga, la tɩrlem, ne raoodo, tɩ m tõe n togs a Zakoob yagensã b kongrã, la m wilg Israyɛll nebã b yel-wẽnã.

9Zakoob yagensã taoor dãmba, Israyɛll buudã nanambse, m kot-y lame tɩ y kelge! Yãmb dãmb sẽn kis tɩrlem, la y golemd sẽn yaa tɩrgã!

10Yãmb daagda zɩɩm n met Sɩyõ, la y maand zãmb n met Zeruzalɛm.

11Zeruzalɛm nanambsã reegda kũun n yaool n kao bʋʋdo. Bãmb maan-kʋʋdbã zãmsda nebã n deegd yaoodo, la b no-rɛɛsdbã togsda pĩnd-n-bãngr goamã n deegd wanzuri. Bãmb yaool n tika Sẽn-Ka-Saab n yetẽ yaa: «Sẽn-Ka-Saab sẽn be tõnd sʋkã yĩnga, yel-beed kõn tol n paam-d ye.»

12Woto, yãmb yel-manesmã yĩng kɩtame, tɩ Sɩyõ na n lebg wa pʋʋg b sẽn gudgi. N-yẽe! Zeruzalɛm na n lebga raboogo, tɩ tãng ning Sẽn-Ka-Saab roogã sẽn be-a zugã lebg kãgre.

← Chapter 2 Jump to: Chapter 4 →