Micah 7

Mossi MPBU (WẼNNAAM SEBRE 2014)

← Chapter 6 Jump to:

1Toog tara maam, bala, mam yaa wa ned sẽn wa n na n wob tɩ-biisi, sɩpaolg wẽnde, la wa ned sẽn wa reezẽ yiisgu, reezẽ wobr poore. Tɩ reezẽ gĩnd ba a ye ka be sẽn na n dɩ ye, la kankam-dẽems nins mam sẽn nongã ba a ye ka be ye.

2Sɩd soab ba a ye ka be tẽngã pʋg ye, la nin-tɩrg ba a ye ka be nebã sʋk ye, bãmb fãa sor n baood n daaga zɩɩm, ned kam fãa rɩgla bẽdg a saam-biig yĩnga.

3Bãmb sẽn mi yaa wẽng maaneg bala. Naab ka maand neer tɩ b ka reeg bũmb ye, Bʋ-kaoodã ka kaood bʋʋd t'a ka reeg kũun ye, Nin-kãsemsã wilgda b yão-beedã, la b naagd taab n tʋmd b tʋʋm-beedo.

4Bãmb sʋkã neb nins sẽn são-b b taabã yaa wa gõose. La bãmb sʋkã nin-tɩrsã wẽnda gõ-payãndse. Gũudbã sẽn dag n gomd daar ning yellã taame, yaa daar ning fo sẽn na n yals n togs f yɛlã fãa wã. Moasã, bãmb na n paama yãnde.

5Da-y kɩs-y sɩd ne a zoa ye, la y ra rɩk y teegr n teeg y taab ye. Baa ne pag ning sẽn gãe gãag a ye zug ne foomã taoore, bɩ y ra yaag y noor ye.

6Bala, bi-ribl paoogda a ba, tɩ bi-pugl zabd ne a ma, tɩ bi-pag zabd ne a sɩd ma. La ned kam fãa meng zak rãmb lebga a bɛɛba.

7La sã n yaa ne maam, mam na n gũu Sẽn-Ka-Saabo, mam na n yals n gũu Wẽnnaam sẽn yaa mam fãagrã. Mam Wẽnnaamã na n kelga maam.

8Mam bɛyã, ra maan sũ-noog mam wɛɛngẽ ye, bala, baa mam sã n lʋɩ, m yikdame. La baa mam sã n zĩ lik pʋgẽ, Sẽn-Ka-Saab yaa mam vẽenem.

9Mam sẽn beeg Sẽn-Ka-Saabã yĩnga, mam na n sak n deega b sũ-puugrã, hal tɩ b wa zab n sõng maam, n lebs maam m bʋʋmã. Bãmb na n talla maam n kẽng vẽenemẽ, la m na n yãnda bãmb tɩrlem tʋʋmã.

10Mam bɛ wã na n yãndame, la yãnd na n yõk-a lame. Bala, yẽnda rag n yetame: «Sẽn-Ka-Saab sẽn yaa fo Wẽnnaamã bee yɛ?» B na n taba bãmb wa sor zug begd tɩ mam yãnde.

11Daar ning b sẽn na n lebs n me y tẽngã lalsã, badaare, b na n yalga yãmb tẽngã todse.

12La badaare, neb na n yii sẽn sɩng ne Asiiri, la Ezɩpt tẽmsã, la sẽn sɩng ne Nill kʋɩlgã n tãag Efrat kʋɩlgã, la sẽn sɩng ne ko-kãsengã noor n tãag a to, sẽn sɩng ne tãng a yembr n tãag a to n wa fo nengẽ.

13La dũni wã fãa sẽn kellã na n sãamame, tẽngã nebã tʋʋm-wẽnsã yĩnga.

14Dɩk-y y dasaarã n tɛ y nebã, yãmb nebã yaa yãmb n so, Bãmb zĩ b yembr kãgrẽ, tɩ b pʋtã gũbg-ba. Tall-y-b wa pĩndã, n tɩ wãbneg Basan ne Galaad tẽmsã mo-maasẽ wã.

15Mam na n wilga bãmb tʋʋm-kãsemse, wa wakat ning mam sẽn dag n yiis bãmb Ezɩpt tẽngã.

16Buud a taabã baa ne b pãnga sẽn yaa to-to wã fãa, na n yãnda bõn-kãens tɩ yãnd yõk-ba. Bãmb na n pĩ b noyã, la b tʋbã ka na n leb n wʋm ye.

17Bãmb na n moga tẽngã tom wa wiisi, wa tẽngã bõn-vuuds buudã fãa, bãmb na n yii b pãng zĩisẽ wã ne rigbu, n wa yãmb a Sẽn-Ka-Saab sẽn yaa tõnd Wẽnnaamã nengẽ, la bãmb na n yɛɛsame n zoe yãmba.

18Wẽnnaam-bʋg n be n yaa wa yãmba, n kõt bu-kellã sẽn yaa yãmb dẽndã a beegr sugri, la a ka geelgd a kongrã? Yãmb sũ-yikrã ka paad wakat fãa ye. Bala, y sũur noomame tɩ wilg y sõmblem.

19Yãmb na n leb n zoee tõnd nimbãanega, la y ka na n leb n geelg tõnd kongrã ye. Yãmb na n loba tõnd yel-wẽnã fãa ko-kãsenga zĩ-zulums pʋga.

20Yãmb na n wilga a Zakoob yagensã y nonglem, la y wilg a Abrahaam yagensã y sõmblem, wa y sẽn dag n wẽen ne d yaab-rãmbã kʋdem-wẽndẽ wã.

← Chapter 6 Jump to: