Micah 4

Mossi MPBU (WẼNNAAM SEBRE 2014)

← Chapter 3 Jump to: Chapter 5 →

1Wakat n wate, tɩ tãng ning Sẽn-Ka-Saab roogã sẽn tilg a zugã na n lug n yɩɩg tãms taabã, la a na n zẽkame t'a zãntlmã yɩɩg kunkubã zãntlem, La nebã na n zoe n waa beenẽ.

2Buud wʋsg na n dabda beenẽ la b yetẽ: «Wa-y tɩ d rʋ Sẽn-Ka-Saab tãngã zugu, a Zakoob Wẽnnaamã roogẽ! Bãmb na n wilga tõnd b soayã, la tõnd na n tũu bãmb so-bugsã. Bala, bãmb tõogã na n yii Sɩyõ, la Sẽn-Ka-Saab gomdã na n yii Zeruzalɛm wa.

3Bãmb na n yɩɩ neb wʋsg bʋ-kaooda, bãmb na n yɩɩ buud nins sẽn tar pãngã zab-paasda, baa ne sẽn be-b zĩ-zãrsã. B na n dɩka b zabr sʋʋsã n kud wãgse, la b rɩk b kãnã n kud goeto. Buud kõn tol n leb n yik zabr ne a to ye, la b kõn leb n zãms zabr sẽn zabd to-to ye.

4Ned kam fãa na n zĩnda a reezẽ tɩɩg ne a kankang tẽngre, tɩ ned ka be n tõe n kẽes-b rabeem ye. Yaa Saasẽ-Pãng-Soabã meng noor n yeele.»

5Buud a taabã ned kam fãa kẽnda ne a wẽnnaam yʋʋre, la tõndo, tõnd kẽnda ne Sẽn-Ka-Saab daar fãa, la wakat sẽn ka sɛta.

6Sẽn-Ka-Saab yetame: «Badaare, mam na n tigma sẽn dag n keoosd-bã, la m tigim sẽn dag n sãeeg-bã, ne m sẽn dag n sɩbg-b rãmbã.

7Mam na n kɩtame tɩ sẽn keoosd-bã yɩ bu-kelle, la m kɩt tɩ sẽn sãeeg-bã yɩ buud sẽn tar pãnga. Sẽn-Ka-Saab na n yɩɩ bãmb rĩm Sɩyõ tãngã zugu, sẽn sɩng ne moasã, hal tɩ ta wakat sẽn ka sɛta.

8Foom, fo yaa gãsg piisã yĩnga. Sɩyõ tẽn-neer kunkubga, fo yaa pãng zĩiga. Fo na n leb n paama f pĩnd rĩungã. Zeruzalɛm, fo na n leb n lebga soolmã na-tẽnga.»

9Moasã, bõe yĩng tɩ f kelemdẽ? Fo ka leb n tar dĩm la? Fo sagendã kiime n bas-f tɩ toog tar-f wa pag sẽn kũmd dogem la?

10Zeruzalɛm tẽn-neere, yãbe, la f kũs wa pag sẽn kũmd dogem! Bala, moasã, fo na n yi n basa tẽngã, n tɩ zĩnd weoogẽ, la fo na n kẽnga hal Babilonde. Yaa beenẽ la b na fãag foom, yaa beenẽ la Sẽn-Ka-Saab na n deeg foom f bɛɛbã nugẽ.

11Ade, moasã, buud wʋsg tigma taab n na n zab ne foom. Bãmb yetame: «Bɩ Sɩyõ paam paoogre! Bɩ a yɩ bõn-gɛtl tõnd nifẽ!»

12Gese, nin-bãmbã ka mi Sẽn-Ka-Saab tagsgã ye, la b ka wʋmd b sẽn saagd n dat n maanã võor ye. Sẽn-Ka-Saab tigma bãmb wa b sẽn kals bɩle n ning zɛɛgẽ,

13Sɩyõ tẽn-neere! Yik n tab koodã! Ade, mam na n kɩtame tɩ f yɩɩlã lebg kut yɩɩla, la m kɩt tɩ f nao-bendã lebg zũud nao-bendo, fo na n taba buud wʋsg neb n bedse, n dɩk b zãmbã teed n kõ Sẽn-Ka-Saabo, la b arzegsã n kõ dũniyã fãa soaalã.

14Moasã, Zeruzalɛm dãmba, bog-y y yĩnsã! Bɛɛbã gũbga tõndo, la b na n wẽe Israyɛll bʋ-kaoodã yɛgdg ne dasaare.

← Chapter 3 Jump to: Chapter 5 →