1 Corinthians 12

Mossi Moore (KÃAB-PAALGÃ KOE-NOOGO)

← Chapter 11 Jump to: Chapter 13 →

1M ba-biisi, mam ka rat tɩ yãmb zĩnd zɩɩlem pʋgẽ Sɩɩg-sõng kũunã yell wɛɛngẽ ye.

2Yãmb mii yãmb sẽn dag n ket n ya nin-zaalse, tɩ yãmb sũyã loe ne wẽn-naands sẽn ya mugsi, tɩ y ka tõe n lak ne-bã.

3Yaa rẽ yĩng tɩ mam yet yãmb tɩ ned ka be, Wẽnnaam Sɩɩgã sẽn na n tus-a t'a yeel tɩ kãab wẽng n be a Zezi zug ye. La ned baa a yembr me ka tõe n yeel t'a Zezi yaa Zu-soaba, sã n ka Sɩɩg-sõng n kɩt t'a yeel ye.

4Kũunã yaa toay-toaya, la yaa Sɩɩg a yembr n kõte.

5Tʋʋmã sẽn tʋmd to-to wã yaa toay-toaya, la yaa Zu-soab a yembr yĩng la b tʋmda.

6Tʋʋmã yaa toay-toaya, la yaa Wẽnnaam a yembr n tʋmd fãa neba fãa pʋse.

7Sɩɩgã belem pukda ned kam fãa vɩɩmẽ, nebã fãa sõngr yĩnga.

8Sɩd me, Wẽnnaam Sɩɩgã kõta ned a yembr yam gomde, n kõ ned a to bãngr gomde, la yaa Sɩɩg a yembr n maand rẽ.

9Sɩ-kãng kõta ned a to tẽebo, n kõ ned a to maagr kũuni, la yaa Sɩɩg a yembre.

10Wẽnnaam Sɩɩgã kõta ned a to bõn-bãn maaneg kũuni, n kõ ned a to pĩnd-n-bãngr gomde, n kõ ned a to pãn-tõog tɩ bãng sɩɩsã n welg taaba, n kõ ned a to gom-zẽn buud toay-toaya, la ned a to gom-zẽn deesgo.

11Yaa Sɩɩg a yen tãa n maand bõn-kãensã fãa, n pʋɩt kũunã n kõt ned kam fãa wa b sẽn data.

12Sɩd me, a wa yĩng sẽn ya yembr n yaool n tar wil wʋsgã, la tɩ yĩngã wilã, baa ne b sẽn ya wʋsgã b yaa yĩng a yembr balã, Kirist me yaa a woto bala.

13Bala, yaa Sɩɩg a yembr pʋgẽ la b lis tõnd fãa, Zuif-rãmba, sẽn ka-b Zuif-rãmba, yemse, burkĩmba, tɩ d tõe n lebg yĩng a yembre. La tõnd fãa yũu Sɩɩg a yembr n yiis d ko-yũudu.

14Woto, yĩng ka will a yembr bal ye, yaa wil wʋsgo.

15Naoor sã n yeel tɩ yẽ sẽn ka nugã yĩnga, yẽ ka yĩngã willi, rẽ ka kɩted t'a ka yĩngã will ye.

16La tʋbr sã n yeel tɩ yẽ sẽn ka nifã yĩnga, yẽ ka yĩngã willi, rẽ ka kɩted t'a ka yĩngã will ye.

17Yĩngã tõr sã n dag n yaẽ nifu, tʋbr da na n bee yɛ? La fãa sã n dag n yaẽ tʋbre, yõor da na n bee yɛ?

18Ad Wẽnnaam ninga wilã yĩngã pʋgẽ wa b sẽn data.

19Yĩngã tõr sã n dag n yaẽ will a yembre, yĩngã meng da na n beẽ la yɛɛne?

20Woto wã, yĩngã wil yaa wʋsgo, la yaa yĩng a yembre.

21Nif ka tõe n yeel nug t'a ka rat a sõngr ye, la zug ka tõe n yeel nao t'a ka rat b sõngr ye.

22Ayo, ka woto ye, yĩngã wil nins sẽn wẽnda b pãngã ka ta b taabã, n tar yõod yĩngã pʋgẽ.

23La wil nins tõnd sẽn get tɩ b ka be waoogr n ta b taabã, tõnd waoogd-b lame n yɩɩda. Woto, yĩngã wil nins sẽn ka togd ne gesgã, tõnd geta b yell sõama,

24la wil nins sẽn sakd gesgã ka baood tɩ d ges b yell woto ye. Wẽnnaam sẽn ning yĩngã wilã to-to wã, b kɩtame tɩ wil nins sẽn ka tar waoogrã na paam waoogre,

25tɩ welgr da wa n zĩnd yĩngã pʋgẽ ye, la tɩ wilã me na ges taab yelle.

26Yĩngã will a yembr sã n namsdẽ, wil a taabã fãa naaga yẽnda n namsdẽ. La a yembr sã n paam waoogre, b fãa naagda yẽnda n kɩdemdẽ.

27Yãmb yaa Kiristã yĩnga, la yãmb ned kam fãa yaa bãmb yĩngã wila.

28Wẽnnaam ninga neb b roogẽ wã: pipi rãmb yaa tẽn-tʋmdbã, tɩ Wẽnnaam no-rɛɛsdbã ya yiib rãmba, tɩ karen-saam-dãmbã ya tãab rãmba. Rẽ poore, bõn-bãn maaneg kũun n be, tɩ maagr kũuni, sõngr kũuni, lʋɩ neb taoor kũuni, gom-zẽn buud toay-toay kũun n pʋgda.

29Dẽ yĩnga, neba fãa yaa tẽn-tʋmdb laa? B fãa yaa Wẽnnaam no-rɛɛsdb laa? B fãa yaa karen-saam-dãmb laa? B fãa maanda bõn-ban laa?

30B fãa tara maagr kũun laa? B fãa gomda gom-zẽn laa? B fãa reesda gom-zẽn laa?

31Bao-y kũun nins sẽn ya sõama n yɩɩdã. La mam na n wilga yãmb sor sẽn yɩɩd a taaba fãa.

← Chapter 11 Jump to: Chapter 13 →