1 Corinthians 4

Mossi Moore (KÃAB-PAALGÃ KOE-NOOGO)

← Chapter 3 Jump to: Chapter 5 →

1Woto yĩnga, ges-y tõnd wa Kirist tʋmtʋmdba, Wẽnnaam sẽn ning b yel-soalmã yell b nusẽ.

2B sẽn dat bũmb ning yel-gɛtb nengẽ bala, yaa tɩ b yã tɩ b maanda sɩd ne b tʋʋmde.

3Ne maam, ka yell ne maam tɩ yãmba, wall dũni bʋ-kaoodb bʋ mam bʋʋd ye. Mam me ka kaood n meng bʋʋd ye, bala, bũmb ka zɩsg mam sũurã ye.

4La ka rẽnda yĩng la mam zemsɩ ye. Sẽn kaood-a mam bʋʋd yaa Zu-soabã.

5Woto yĩnga, da kao-y bũmb baa fɩ bʋʋd tɩ wakatã nan ka ta ye, tɩ Zu-soabã waoong nan ka ta ye. Bãmb sã n wa, b na n puka bũmb ning sẽn solg lik pʋgẽ wã, la b na n kɩtame tɩ bũmb nins nebã sẽn dag n saag b sũyã pʋsẽ wã pugsi. Wakat kãnga, Wẽnnaam n na n pẽg ned kam fãa.

6M ba-biisi, mam dɩka mams kãens n bilg maam ne a Apolos yellã, yãmb wʋmb yĩnga. Woto, tõnd yĩnga, yãmb na zãms n bãnge, n da wa n maan tɩ yõsg bũmb ning sẽn gʋlsã ye, la yãmb ned baa a yen ka na n tong ned a yen poore, n wa waoog a menga, n paoog ned a to wã ye.

7Bala, bõe n welgd foo ne f taabã? Bõe la fo tar tɩ ka ned n kõ foom? La sã n yaa tɩ yaa ned n kõ foom, bõe tɩ f waoogd f meng wa f ka reeg-a ned nengẽ?

8Yãmb zoee n tɩgame, yãmb zoee n yaa arzegs rãmba, yãmb sɩngame n dɩt naam tɩ tõnd kaẽ ye. Wẽnd na kɩt tɩ y sɩd rɩ naam, tɩ tõnd me tõe n naag yãmb n dɩ naamã.

9Bala, mam tẽedame tɩ Wẽnnaam kɩtame tɩ tõnd sẽn ya tʋmtʋmdba yɩ neba fãa zʋʋre, la neb bʋʋd sẽn kao tɩ b zems kũum, b sẽn kɩt tɩ tõnd lebg bõn-gets dũni rãmb yĩnga, la malegs yĩnga, la ninsaalb yĩngã yĩnga.

10Kirist yĩnga, tõnd yaa yalemba, la yãmb yaa yam dãmb Kirist pʋgẽ, tõnd yaa pãn-komsem dãmba, la yãmb tara pãnga. Yãmb bee waoogre, la tõnd paamda paoogre.

11Hal tɩ ta moasã, kom la ko-yũudu, la naongo, la pãbre, la yeebg tara tõndo.

12Tõnd tʋmda ne d nus n yaadẽ. Nebã tʋʋda tõndo, la tõnd ningd-b la barka. Neb namsda tõndo, la tõnd sakda rẽnda.

13Hal tɩ ta moasã neb kãnegda tõndo, la tõnd belsda neba. Tõnd lebga wa sagd dũni neb nifẽ, ned baa a yen sẽn ka rata.

14Mam ka gʋlsd yãmb yõwã n na n ning yãmb yãnd ye. Mam keoogda yãmba, yãmb sẽn ya m kom-nongdsã yĩnga.

15Sɩd me, ba yãmb sã n paam tɛtb tus piig Kirist pʋgẽ, yãmb ka tar ba-rãmb wʋsg ye. Bala, yaa maam n dog yãmb Kirist Zezi pʋgẽ, koe-noogã maasem yĩnga.

16Woto yĩnga, mam sagenda yãmba: Yɩ-y mam togs-n-taase.

17Bõn-kãng yĩnga, mam tʋma m bi-nongr a Tɩmote sẽn maand sɩd Zu-soabã pʋgẽ wã yãmb nengẽ. Yẽ na n tẽega yãmb so-tũuds nins sẽn be Kirist pʋgẽ tɩ mam zãmsd nebã, zĩig fãa, wẽnd-dota fãa pʋsã.

18Neb kẽer wuka b mense, wa mam sã n da ka tog n wa yãmb nengẽ ye.

19La sã n taa Zu-soabã raabo, bilf sã n paase, mam na n waa yãmb nengẽ. Mam na n gesa wuk-m-mens rãmb kãens pãnga, la ka b goama yell ye.

20Bala, Wẽnnaam soolma ka goam ye, la yaa pãnga.

21Bõe la y rata? Y ratame tɩ m wa y nengẽ ne sãbsg bii, bɩ ne nonglem la ne sũ-bʋgsem yam?

← Chapter 3 Jump to: Chapter 5 →