1 Corinthians 5

Mossi Moore (KÃAB-PAALGÃ KOE-NOOGO)

← Chapter 4 Jump to: Chapter 6 →

1Wakat fãa, d wʋmdame tɩ b gomd dẽgd sẽn maand yãmb sʋkã yelle. Tʋʋm-dẽgd ning sẽn maand yãmb sʋkã, ned pʋs n pa yãt a buud bu-zemsã meng sʋk ye. Yaa woto hal tɩ baa yãmb ned a yembr tara a ba paga.

2Tɩ yãmb yaool n wuk y mense. Yãmb ka maan sũ-sãoong wa kũum yĩnga, tɩ b tõe n yiis ned ning sẽn maan a woto wã yãmb sʋk ye.

3Sã yaa ne maam, baa mam yĩngã sẽn ka be be ne yãmbã, la yaa m tagsgã n be ne yãmbã, mam zoee n kaoo ned ning sẽn maan-a yell kãngã wã bʋʋdo, wa m sã n da bee be.

4Bala, Zu-soab a Zezi yʋʋrã yĩnga, yãmb ne mam tagsgã naaga taaba, ne tõnd Zu-soab a Zezi pãnga.

5Bɩ b bas ned a woto a Sʋtãan nugẽ, t'a yĩngã na sãame, t'a sɩɩgã na paam fãagr Zu-soab a Zezi daarã.

6Bũmb ning yãmb sẽn dɩkd n waoogd y mensã ka neer ye. Yãmb ka mi tɩ rã-bɩll bilf bal kɩtedame tɩ zom-nagd tõr wuk laa?

7Yiis-y rã-bɩl-kʋdgã n bas y mens n lebg yɩlma, tɩ y tõe n yɩ zom-nagd-paalga, rã-bɩll sẽn ka be yãmb pʋgẽ wã yĩnga. Bala, b kʋʋ Kirist sẽn ya tõnd zʋʋg-n-basã maoongo.

8Woto yĩnga, bɩ d maan kibsã, la da yɩ ne rã-bɩl-kʋdgo, wall ne zãmb la pʋ-toog rã-bɩll ye. Bɩ yɩ ne pʋ-peelem la sɩd bur sẽn ka rã-bɩlle.

9Mam gʋlsa yãmb m sebrã pʋgẽ n yeel-y tɩ y da paam lagem-n-taar ne tʋʋm-dẽgd maandbã ye.

10M ka yet tɩ y lak y mens zãng fasɩ ne dũni kãnga tʋʋm-dẽgd maandbã, wall ne yão-be-nebã, la kãag n kõ m meng rãmba, wall wẽnd-naands pʋʋsdbã ye. Sã n yaa rẽ, na n yɩ tɩlɛ tɩ y yi n bas dũni.

11Mam sẽn gʋls yãmb bũmb ning moasã n yetẽ wã, yaa tɩ y ra paam lagem-n-taar ne ned ning sẽn yet t'a yaa yãmb ba-biiga, n yaool n maand tʋʋm-dẽgdo, wall a ya yão-be-neda, wall wẽnd-naands pʋʋsda, wall nin-tʋʋda, wall ned neng sẽn yilimd ne rãam, wall kãag n kõ m meng soab ye. Bɩ y pʋs n da naag ned a woto n dɩ ye.

12Bõe tɩ m na n kao kɛɛng neb bʋʋdo? Ka neb nins sẽn be ne yãmbã bʋʋd la yãmb kaood sɩda?

13Wẽnnaam n na n kao kɛɛng nebã bʋʋdo. Gʋls-sõmyã yetame tɩ: Dig-y nin-wẽngã n yiis y sʋka.

← Chapter 4 Jump to: Chapter 6 →