Galatians 1

Mossi Moore (KÃAB-PAALGÃ KOE-NOOGO)

Jump to: Chapter 2 →

1Maam a Polle, mam yaa tẽn-tʋmda, la ka tẽn-tʋmda ninsaalb wall ned sẽn yãk ye. Yaa a Zezi Kirist la ba a Wẽnnaam, soab ning sẽn vʋʋg a Zezi tɩ b yi kũum sʋkã n yãk maam.

2Maam ne ba-biis nins fãa sẽn be ne maamã n gʋlsd wẽnd-dotã sẽn be Galasi wã.

3Bɩ tõnd ba a Wẽnnaam ne tõnd Zu-soab a Zezi Kirist bark yãmba, la b kõ-y bãane.

4Kirist yaa soab ning sẽn kõ b vɩɩm tõnd yel-wẽnã yiisg yĩnga, tɩ b tõe n fãag tõnd n yiis-d dũni kõngã wẽngã pʋgẽ, wa sẽn zems tõnd ba a Wẽnnaam daabã.

5Bɩ bãmb paam ziir wakat fãa, ãmina!

6Yãmb sẽn wẽnemd tao-tao n bas soab ning sẽn bool-a yãmb Kirist maasem yĩng n na n tũ koe-noog a to wã linga maam.

7Ka tɩ koe-noog a to n be ye, la neb n rãmbd yãmb n dat n teem Kirist koe-noogã.

8La tõnd mensã, wall arzãn malɛk sã n togs yãmb koe-noog sẽn ya toor ne koe-noog ning tõnd sẽn moon yãmbã, bɩ kãab-wẽng zĩnd a zugu.

9Tõnd yeela yãmb pĩnda, la mam leb n yetame: Ned sã n togs yãmb koe-noog sẽn ya toor ne koe-noog ning yãmb sẽn deegã, bɩ kãab-wẽng zĩnd a zugu.

10Dẽ wã, mam dat n taa nebã yam bii, bɩ Wẽnnaam yam? Dẽ yĩnga, mam baoodame tɩ maan sẽn noom nebã laa? Mam sã n da ket n maandẽ sẽn noom nebã, mam da kõn ya Kirist tʋmtʋmd ye.

11M ba-biisi, mam yeta yãmb tɩ koe-noog ning mam sẽn moonã ka yit ninsaal nengẽ ye.

12Bala, mam mengã ka reeg-a, wall m wʋm-a ned nengẽ ye, la yaa ne a Zezi Kirist vẽnegre.

13Sɩd me, yãmb wʋma mam yel-manesem sẽn yɩ to-to pĩnda, Zuif-rãmbã kaoreng pʋgẽ. Wakat kãnga, mam dag n namsda Wẽnnaam nin-tũusidsã, la m sãamd b roogã.

14Zuif rãmbã kaoreng pʋgẽ, mam dag n yɩɩda m rog-taasã wʋsg m buudã pʋga. Bala, mam dag n wɩngda ne m ba-rãmbã minindã sakr hal tɩ looge.

15La sẽn dag n welg-a maam toor tɩ m nan ket n be m ma pʋgẽ, la b maan nimbãan-zoeer n bool maamã

16sẽn wa n mik tɩ zemsame tɩ b puk b Bi-riblã ne maam, tɩ mam na moon b yellã bu-zẽmsã sʋkã, mam ka yals n sok ninsaal ye,

17la mam ka kẽng Zeruzalɛm n babs neb nins sẽn deng-b maam n ya tẽn-tʋmdbã ye. Mam kẽnga Arabi, la mam lebg n waa Damas.

18Yʋʋm a tãab rẽ zugẽ, mam kẽnga Zeruzalɛm n na n tɩ bao n bãng a Sefas, la mam zĩnda ne-a dasem piig la a nu.

19La mam ka yãnd tẽn-tʋmd a to baa a yen, sã n ka Zu-soabã ma-biig a Zak bala.

20Mam sẽn gʋlsd yãmb yõwã wã, mam yeta yãmb Wẽnnaam taoor tɩ m ka yagd ye.

21Dẽ poore, mam kẽnga Siiri ne Silisi soolmẽ.

22La Wẽnd-dot nins sẽn be a Kirist pʋgẽ Zude wã dag n ka mi maam ye.

23B dag n wʋmame bal tɩ b yetẽ tɩ "ned ning sẽn dag n namsd tõndã moonda tẽeb ning a sẽn dag n dat n sãamã koɛɛg mosã."

24La Wẽnd-do-kãens nebã dag n kõta Wẽnnaam waoogr mam wɛɛngẽ.

Jump to: Chapter 2 →