Galatians 2

Mossi Moore (KÃAB-PAALGÃ KOE-NOOGO)

← Chapter 1 Jump to: Chapter 3 →

1Rẽ poore, yʋʋm piig la a naas zugẽ, mam leb n kẽnga Zeruzalɛm la mam peega a Tit me.

2Yaa vẽnegr mam sẽn paam yĩng la mam kẽng be. Mam wilg-b la koe-noogã mam sẽn moond bu-zẽmsã. Yaa taoor dãmbã la m gom-ne, ka yɩ nebã fãa taoor ye. Bala, mam dag n zoeta tʋʋmdã m sẽn maan la m ket n maandẽ wã na n wa yɩ zaalem.

3La pʋs n ka yɩ tɩlɛ t'a Tit sẽn ya Gɛrk n be ne maamã kẽ bãong ye.

4Baoosgo, baa ne neb nins sẽn belg tɩ b yaa tõnd ba-biisã sẽn kẽ tõnd sʋk n na n gũus tõnd n ges lohorem ning tõnd sẽn tar d lagem-n-taar a Zezi Kiristã pʋgẽ wã, n dat n kẽes tõnd yembdẽ wã...

5La tõnd ka tũ b raabã baa bilf ye, sẽn na yɩlẽ tɩ koe-noogã sɩdã na kell n yals yãmb sʋka.

6La sã n yaa ne neb nins nebã sẽn dag n get wa taoor dãmbã, la b sẽn dag n ya bũmb ning pĩndã ka pak maam ye, Wẽnnaam ka welgd neb ye. Taoor dãmb kãens ka modg maam tɩ m maan baa fɩ ye.

7Ayo, b sẽn yã tɩ Wẽnnaam kõo maam koe-noogã neb nins sẽn ka-b Zuif rãmbã yĩnga, wa b sẽn kõ a Pɩyɛɛr Zuif rãmbã yĩngã,

8(bala, ned ning sẽn tʋm a Pɩyɛɛr pʋgẽ n kɩt t'a lebg Zuif rãmbã tẽn-tʋmdã, soab kõng me n tʋm mam pʋgẽ bu-zẽmsã yĩnga).

9La b sẽn bãng bark ning Wẽnnaam sẽn kõ maamã, a Zak ne a Sefas la a Zã, nebã sẽn get wa ra-lugsã yõga maam ne a Barnabas nus-rɩtgo, n wilg tɩ lagem-n-taar bee tõnd ne bãmb sʋka. Woto, tõnd na n teesa bu-zẽmsã sẽne, tɩ bãmb tees Zuif rãmbã sẽne.

10Tõnd togame bal n tẽeg naong rãmbã yelle, la mam maana rẽndã ne m sũur fãa.

11La a Sefas sẽn wa Ãntiyosã mam leng-a-la nebã taoore, bala, a dag n maana sẽn ka zemse.

12Sɩd me, sẽn deng neb kẽer sẽn yi a Zak nengẽ wã waoongo, a Sefas dag n dɩta ne bu-zẽmsã. La nin-kãens waoongã zugẽ, a welgame n ka le rɩt ne bu-zẽmsã ye, a sẽn zoet zũinsã yĩnga.

13Zuif-rãmb a taabã me dag n kuusd n maanda wa yẽ sẽn maanã, hal t'a Barnabas mengã tũ n kẽ b zãmbã pʋgẽ.

14La mam sẽn yã tɩ b ka kẽnd tɩrg wa sẽn zems koe-noogã sɩdã yĩnga, mam yeela a Sefas nebã fãa taoore yaa: Fo sẽn ya Zuifã, fo sã n maand wa bu-zẽmsã fo na n maana a wãn n modg bu-zẽmsã tɩ b sak Zuif rãmbã kaorengo?

15Tõnd yẽ dogame n ya Zuif-rãmba, la d ka yel-wẽn-maandb soolem dãmbã sʋk ye.

16Tõnd sẽn mi tɩ ka ne tõogã tʋʋm la ned yɩt tɩrga, la yaa ne tẽeb ne a Zezi Kiristã, tõnd me tẽe a Zezi Kiristã, tɩ tẽeb ne Kiristã na kɩt tɩ tõnd lebg tɩrse, la ka tõogã tʋʋm ye, bala, tõog tʋʋm kõn kɩt tɩ ned baa a yembr yɩ tɩrg ye.

17La tõnd sẽn baood tɩ Kirist kɩt tɩ tõnd yɩ tɩrsã, b sã n mik tɩ tõnd me yaa yel-wẽn maandb wa bu-zẽmsã, dẽ, Kirist yaa yel-wẽna tʋmtʋmd laa? Yaa vẽeneg tɩ ka a woto ye.

18Bala, bũmb nins mam sẽn yeel tɩ b ka sõngdã, mam sã n wẽnemd n yeel tɩ b sõngdame, rẽnd mam lebga m meng kɩɩsda.

19Sɩd me, sã n yaa ne tõogã wɛɛngẽ, mam yaa kũum tõogã maasem yĩnga, tɩ m tõe n vɩɩmd Wẽnnaam yĩnga.

20B kaa maam ne Kiristã, la ka maam n vɩ yɛs ye, yaa Kiristã n vɩ mam pʋgẽ. Mam sẽn vɩ m yĩngã pʋgẽ moasã wã, yaa tẽeb ne Wẽnnaam Bi-riblã, soab ning sẽn kõ a vɩɩm a toor mam yĩngã pʋgẽ la mam vɩ.

21Mam ka tõdgd Wẽnnaam barkã ye. Bala, sã n dag n yaa ne tõog la ned paamd tɩrlem, dẽnd Kiristã kii zaalem.

← Chapter 1 Jump to: Chapter 3 →