Galatians 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Yãmb Galasi neb sẽn ka yam! Ãnna n belg yãmba, b bilga yãmb a Zezi Kirist b sẽn ka da-pɩk zugã yellã vẽenegã ãnna n belg yãmba?

2Ad bũmb ning bal mam sẽn dat tɩ yãmb leok maam: Yaa yãmb sẽn maan tõogã sẽn yeelã yĩng la yãmb deeg Sɩɩg-sõngã bii, bɩ yaa yãmb sẽn kelg koe-noogã ne tẽebã?

3Yãmb ka yamã taa a woto? Yãmb sẽn sɩng ne Sɩɩgã pãngã, yãmb na n baasa ne yĩng rẽnd mosã laa?

4Bũmb nins fãa yãmb sẽn yã wã yɩɩ zaalem laa? Sã n yaẽ la zaalem!

5Soab ning sẽn kõt yãmb Sɩɩgã la b maand bõn-bãn yãmb sʋkã, yaa yãmb sẽn sakd tõogã yĩng la b maand bii, bɩ yaa yãmb sẽn kelgd koe-noogã ne tẽebã yĩnga?

6La ne a Abraham, a tẽe Wẽnnaam, la Wẽnnaam ges-a-la wa nin-tɩrga, a tẽebã yĩnga.

7Dẽ wã, bɩ y reeg tɩ yaa neb nins sẽn tẽedã n ya a Abraham kamba.

8Woto, Wẽnnaam gʋls-sõamyã sẽn pĩnd n neẽ tɩ Wẽnnaam na n kɩtame tɩ bu-zẽmsã yɩ tɩrs tẽeb yĩngã, b pĩnd n togsa a Abraham koe-no-kãngã n yeele: Buud fãa na n paama bark fo yĩnga.

9Woto, neb nins sẽn tar tẽebã naaga ne tẽeb soab a Abraham n paam barka.

10Sɩd me, neb nins fãa sẽn teegd tõod tʋʋmã bee kãab-wẽng pʋgẽ, bala, b gʋlsame n yeele: Kãab-wẽng n be ned ning fãa sẽn ka sakd bũmb nins fãa sẽn gʋls seb-kãngã pʋgẽ, la a ka maand wa sẽn gʋlsã zugu.

11La yaa vẽeneg tɩ ned baa a yen kõn paam tɩrlem Wẽnnaam taoor tõog yĩng ye, tɩ bõe, nin-tɩrg na n vɩɩ ne tẽebo.

12Tõog yaool n ka yit tẽebẽ ye. La tõogã yetame tɩ ned ning sẽn na n maan-a wa sẽn gʋlsã, bõn-kãens na kɩt t'a vɩɩmde.

13Kirist yolsa tõnd ne kãab-wẽngã, bãmb sẽn lebg kãab-wẽng tõnd yĩngã yĩnga. Bala, b gʋlsame tɩ kãab-wẽng n be ned ning sẽn lulg raoog zugã zugu.

14Woto, a Abraham barkã na n zĩnda a Zezi Kirist pʋgẽ bu-zẽmsã yĩnga, la ne tẽebo, bɩ tõnd deeg Sɩɩgã Wẽnnaam sẽn kãabã.

15M ba-biisi, m dɩk ninsaalb mamsgo: Ned sã n gʋls sebr n wilg a sũur gomde, a sẽn dat tɩ yɩ to-to a kũum poore, baa ne sẽn ya ninsaal n gʋlsã, ned baa a yen ka kɩɩsd gomdã wall a paas-a bũmb ye.

16Kãabdã sẽn kãabã yaa a Abraham ne a yagengã. B ka yeel tɩ yagense, wa b yaa wʋsg ye. Yaa a yen tãa. B sẽn yeel tɩ "fo yagengã" dat n togsame tɩ Kirist.

17Ad mam gomdã võore: Yaa tɩ yam-yãkr ning Wẽnnaam sẽn yãke, n togs tɩ bu-zẽmsã, ka tõog sẽn yaool n wa yʋʋm kobs-naas la pis-tã rẽnda zugẽ wã n na n kiis-a, n kɩt tɩ kãabgã yɩ zaalem ye.

18Bala, rogem pʋɩɩrã sã n dag n yitẽ tõogã pʋgẽ, a dag n kõn leb n yi kãabgẽ ye. Yaool n yaa kãabg pʋgẽ la Wẽnnaam ning b barkã a Abraham zugu.

19La yaa bõe yĩng la b wa ne tõogã? Wẽnnaam yaool n waa ne tõogã n n a puk nebã beegre, hal tɩ yageng ning Wẽnnaam kãabgã sẽn be a zugã na wa. Malegs n moon kãab-kõngo, la b tũnuga sɛ-yõakda.

20Sã n yaool n ya nin-yend yelle, a ka baood sɛ-yõakd ye. La Wẽnnaam yaool n yaa b yembre.

21Dẽ wã, tõogã kɩɩsda Wẽnnaam kãabgã laa? Ayo! B sã n dag n kõẽ tõog sẽn tõe n kõ vɩɩm, tõogã dag n na n sɩd waa ne tɩrlem.

22Wẽnnaam gʋls-sõamyã yeelame tɩ dũni gill fãa bee yel-wẽn maaneg pʋgẽ. Woto, yaa neb nins sẽn tẽed a Zezi Kiristã n na n paam kũun ning Wẽnnaam sẽn kãabã, b sẽn tẽ wã yĩnga.

23Sẽn deng tẽebã waoongo, tõnd dag n bee tõogã yembdẽ n gũud tẽebã sẽn na n wa pukã.

24Woto, tõog yɩɩ tõnd gũuda n na n tɛ tõnd n taas Kirist nengẽ, tɩ ne tẽebo, tõnd na lebg tɩrse.

25Tẽebã sẽn wa wã, ka leb n ya gũud kõng n so tõnd yɛs ye.

26Bala, yãmb sẽn tẽed a Zezi Kiristã yãmb fãa yaa Wẽnnaam kamba.

27Yãmb sẽn deeg lisg Kirist pʋgẽ wã, Kirist luda yãmb wa fuugu.

28Ka leb n be tɩ m yaa Zuif bɩ Gɛrka, yamb bɩ burkĩna, dao bɩ pag ye, bala, yãmb fãa yaa yembr a Zezi Kirist pʋgẽ.

29La yãmb sã n yaa Kirist neba, dẽnd yãmb yaa a Abraham yagense, n ya pʋɩt-n-taas ne a rogem-pʋɩɩrã wa b sẽn kãabã.

← Chapter 2 Jump to: Chapter 4 →