Hebrews 3

Mossi Moore (KÃAB-PAALGÃ KOE-NOOGO)

← Chapter 2 Jump to: Chapter 4 →

1Yaa woto yĩnga, m ba-biis sẽn welg toor Wẽnnaam yĩnga, la sẽn naag n paam Wẽnnaam boolgã, bɩ y ges a Zezi sẽn ya maan-kʋʋd kãsem Wẽnnaam sẽn tʋme, tõnd tẽebã tʋʋm pʋgẽ wã.

2Bãmb maana sɩd ne a soab ning sẽn yãk bãmbã, wa a Moyiis sẽn maan sɩd ne Wẽnnaam wẽnd-doogã pʋgẽ wã.

3Sɩd me, b gesame t'a Zezi toga ne ziir sẽn ya kãseng n yɩɩd a Moyiis dẽndã, wa ro-metã sẽn tog ne ziir n yɩɩd roogã mengã.

4Bala, roog fãa yaa ned n me, la soab ning sẽn me-a bũmb fãa wã yaa Wẽnnaam.

5Sã n yaa ne a Moyiisi, a maana sɩd ne bũmb fãa wẽnd-doogẽ wã, n yɩ tʋmtʋmda, n na n kɩs bũmb ning b sẽn pĩnd n togs a yellã kaseto.

6La a Zezi maanda sɩd ne wẽnd-doogã, bãmb sẽn ya Wẽnnaam Bi-riblã. Tõnd n ya bãmb roogã, sã n yaa tɩ tõnd kell n talla raoodo la saag-sõng ning tõnd sẽn yet tɩ d tarame wã kãenkãe hal tɩ ta wakat saabo.

7Rẽnda n kɩt t'a wa Sɩɩg-sõng sẽn yetã: Rũnna, yãmb sã n n wʋm bãmb koɛɛga,

8bɩ y ra keng y sũyã wa yãmb ba-rãmbã sẽn maan kɩɩsgã wakate, makrã wakat weoogẽ wã,

9zĩig ning bãmb sẽn mak maam n na n gese, zĩig ning b sẽn yã tʋʋm nins mam sẽn maanã yʋʋm pis-naasã ye.

10Rẽndã n kɩt tɩ mam sũur sãam ne zamaan kãng nebã, n yeel yaa: "Bãmb sũyã bʋdgda wakat fãa, la b ka bãng mam sẽn datã ye."

11La m sũ-puugrã pʋgẽ, mam wẽename n yeele: "Hakɩɩka, b ka na n paam vʋʋsg ning mam sẽn na n kõ-bã ye."

12Dẽ yĩngã, m ba-biisi, gũus y mens tɩ ned baa a yembr yãmb sʋkã da tall sũur sẽn ya wẽnga la sẽn ka tẽeda, hal t'a wa wẽnemd n bas Wẽnnaam sẽn vɩ wã ye.

13Ayo! Wakat ning tɛk ned sẽn tõe n yeel tɩ "rũnna", bɩ y sagl taaba, tɩ yel-wẽnã belgr da wa kɩt tɩ ned sũur riglim ye.

14Bala, b kɩtame tɩ tõnd lebg Kiristã tũud-n-taase, la yaa tõnd sẽn na n kell n tall d pipi pɛl-kɛgengã kãenkãe,

15wakat ning b sẽn yeel tɩ: Rũnna, yãmb sã n wʋm bãmb koɛɛga, bɩ y ra keng y sũyã wa yãmb ba-rãmba sẽn maan kɩɩsgã wakatã ye.

16Yãmb sẽn gesã, yaa ãnna rãmb n wʋm Wẽnnaam koɛɛgã la b kell n bao Wẽnnaam noore, sã n ka neb nins a Moyiis sẽn tall n yiis Eziptã?

17La ãnna rãmb la Wẽnnaam sũur sãam-ne yʋʋm pis-naasã, sã n ka b rãmb nins sẽn maan yel-wẽna, b rãmb kũum sẽn pa weoogẽ wã?

18La yaa ãnna rãmb la Wẽnnaam kãab n yeel tɩ b kõn paam vʋʋsg ning bãmb sẽn na n kõ wã, sã n ka b rãmb nins sẽn kɩɩsã?

19Woto, tõnd yãame tɩ b ka tõog n kẽ be, b ka-tẽebã yĩnga.

← Chapter 2 Jump to: Chapter 4 →