Hebrews 7

Mossi Moore (KÃAB-PAALGÃ KOE-NOOGO)

← Chapter 6 Jump to: Chapter 8 →

1A Melkisedɛk dag n yaa Salɛm dĩma, la saasẽ-saasẽ Wẽnnaamã maan-kʋʋda. A kẽngame n tɩ seg a Abraham sẽn tɩ tõog rĩm-dãmb n lebg n watẽ wã, n ning-a barka.

2Yaa yẽ la a Abraham kõ bũmb fãa piig-pʋɩɩre. La d sã n na n bilg a yʋʋrã võore, pipi a yaa tɩrlem dĩma, tɩ Salɛm rĩungã pʋgle, sẽn dat n togs tɩ laafɩ rĩma.

3A ka tar ba, a ka tar ma, n ka tar yaab roog ye. A ka tall sɩngre, la a vɩɩmã ka tall tɛk ye. B kɩtame t'a yɩ wa Wẽnnaam Bi-riblã, la a yaa maan-kʋʋd wakat sẽn ka sat yĩnga.

4Ges-y soab ninga tõnd yaab a Abraham mengã sẽn yãk zabrã te-zaeedem piig-pʋɩɩr n kõ wã, n bãng a sẽn ya kãseng to-to!

5A Levi yagens nins b sẽn kõ maan-kʋʋr tʋʋmdã, tõogã kõ-b-la noor tɩ b reeg piig-pʋɩɩr Israyɛl nebã sẽn ya bãmb ba-biisi la a Abraham yagensã nengẽ.

6A Melkisedɛk sẽn ka be a Levi yaab roogã pʋgẽ wã deega a Abraham piig-pʋɩɩre, a ninga soab ning sẽn paam kãabgã barka.

7Nokoeemd kae tɩ yaa sẽn yɩɩd-a wã n ningd sẽn ka ta-a yẽ wã zug barka.

8La ka wã, yaa nin-kiids n deegd piig-pʋɩɩrã, la be wã, yaa ned gʋls sõamyã sẽn kɩt kaset t'a vɩɩme.

9Moasã, a Levi sẽn deegd piig-pʋɩɩrã, a ra zoe n yaoo a piig-pʋɩɩre, a Abraham yaoodã pʋgẽ.

10Bala, wakat ning a Melkisedɛk sẽn tɩg n seg a Abrahamã, rẽ t'a Levi da ket n bee a Abraham zɩɩmẽ.

11Sã n yaa tɩ Levi rãmba maan-kʋʋrã tʋʋmd wata ne zemsgo, tõog ning Wẽnnaam sẽn kõ b nebã yẽbga maan-kʋʋrã tʋʋmd zugu. Bõe yĩng tɩ b leb n dat tɩ maan-kʋʋd sẽn ya wa a Melkisedɛk la ka wa a Aarõ wa?

12Bala, maan-kʋʋrã tʋʋmd sã n toeeme, yaa tɩlɛ tɩ tõogã me toeeme.

13Sɩd me, ned ning yell b sẽn gom woto wã yaa buud a to neda, la ned baa a yen buud kãng sʋk ka be tẽn-kugrã tʋʋmdẽ ye.

14Bala, yaa vẽeneg tɩ tõnd Zu-soabã yaa Zuda neda, la a Moyiis ka gom buud kãng yell n kẽes maan-kʋʋrã wɛɛngẽ ye.

15A yellã le yaa vẽeneg n yɩɩd wakat ning ned sẽn wa n ya wa a Melkisedɛkã

16n ya maan-kʋʋd a to wã. Ka ne ninsaalb tõog yãkr la a lebg maan-kʋʋdã ye, la yaa ne vɩɩm sẽn ka sãamd pãnga.

17Bala, b kɩsa a kaset n yeele: Fo yaa maan-kʋʋd wakat sẽn kõn sa yĩnga, wa a Melkisedɛke.

18Sɩd me, b kiisa tõog sẽn dag n be, a pãn-komsem la a ka-yõodã yĩnga,

19(bala tõogã ka tõog tɩ baa fɩ zems ye), la b waa ne saag-sõng sẽn ya sõama n yɩɩd pĩnd soabã. Saag-sõng kãng maasem yĩnga tõnd kolgda Wẽnnaam.

20La Wẽnnaam ka maan t'a Zezi yɩ maan-kʋʋd tɩ wẽeneg ka wẽen ye.

21Sɩda, ka yɩ ne wẽeneg la neb a taabã lebg maan-kʋʋdb ye. La a Zezi lebga maan-kʋʋd ne wẽenego, la yaa soab ning sẽn yeel tɩ: Zu-soabã wẽename, la b ka na n lebs b noor poorẽ ye. B yeelame yaa: Fo yaa maan-kʋʋd wakat sẽn kõn sa yĩnga.

22Woto kɩtame t'a Zezi lebg kaool sẽn ya sõama n yɩɩdã zãada.

23Sẽn paase, maan-kʋʋdb kãens sõor yɩɩ wʋsgo, tɩ bõe kũum da gɩdgda bãmb tɩ b ka tõe n kẽng taoor ne b tʋʋmã ye.

24La a Zezi sẽn paad wakat sẽn kõn sa wã yĩnga, bãmb maan-kʋʋrã yaa bũmb b sẽn ka tõe n deeg n kõ ned a to ye.

25Dẽ me n kɩt tɩ bãmb tõe n fãag neb nins sẽn tũnugd bãmb n kolgd Wẽnnaamã hal sõama, bala bãmb vɩɩ wakat fãa n yõkd sɛɛg b yĩnga.

26Yaa maan-kʋʋd kãsem a woto la tõnd sɩd tog n paame: Ned sẽn welg toor Wẽnnaam yĩnga, n ka tar yelle, ned sẽn ka rog-b ye, n bak ne yel-wẽn maandbã, la b zẽk-b lame n kẽng saasẽ.

27Ka tɩlɛ tɩ b maand maand daar fãa wa maan-kʋʋd kãsem-dãmbã sẽn dengd n maan maoong b mens yĩnga, n yaool n maan neb a taabã yĩngã ye. Bãmb maana maoong a yen tãa wakat fãa yĩnga, la yaa b meng la b tall n maan maoongã.

28Sɩd me, tõogã yãkda neb sẽn ya pãn-komsem dãmb tɩ b yɩ maan-kʋʋd kãsem-dãmba. La wẽeneg ning sẽn be sẽn deng tõogã waoongã yãka Wẽnnaam Bi-riblã tɩ b yɩ maan-kʋʋd kãsma, la bãmb zemsa zãng wakat sẽn ka sat ye.

← Chapter 6 Jump to: Chapter 8 →