Hebrews 4

Mossi Moore (KÃAB-PAALGÃ KOE-NOOGO)

← Chapter 3 Jump to: Chapter 5 →

1Woto yĩnga, kãabg tɩ paam vʋʋsg ning bãmb sẽn na n kõ wã sẽn ket n be wã, bɩ d maan yɛɛsg tɩ neb kẽer na n wa bas tɩ sãam n sa tɩ b yaool n watẽ.

2Bala, koe-noogã b sẽn moonã, ya tõnd la bãmb me. La gomd ning b sẽn wʋmã ka zĩnd yõod ne-b ye, bala neb nins sẽn wʋm koɛɛgã ka reeg-a ne tẽeb ye.

3La tõnd dãmb sẽn tẽ wã, tõnd paamda vʋʋsg ning Wẽnnaam sẽn yeel tɩ: Mam sũ-puugrã pʋgẽ, mam wẽename n yeel tɩ hakɩɩka, b kõn paam vʋʋsg ning mam sẽn na n kõ wã ye. Wẽnnaam tʋʋmã yaool n da maanda hal dũni naaneg wakate.

4Bala, zĩig a yembre, Wẽnnaam goma yopoe daarã yell n yeele: La Wẽnnaam basa b tʋʋmã fãa yopoe daarã n vʋʋse.

5La zĩ-kãngã yɛsa, b leb n yeelame: Hakɩɩka, b ka na n paam vʋʋsg ning mam sẽn na n kõ wã ye.

6Woto, sẽn yaa tɩ ya neb kẽer n tar noor tɩ paam-a, tɩ neb nins sẽn yɩ-b pipi n deeg koe-noogã ka tõog n kẽ b ka-tẽebã yĩngã,

7Wẽnnaam leb n yãka daar a to yɛsa, sẽn ya dũnna, n tũnug a Daviid noor kaoosg pʋgẽ n yeel wa sẽn togs poorẽ wã yaa: Rũnna, yãmb sã n wʋm bãmb koɛɛgã, bɩ y da keng y sũyã ye.

8Sɩd me, a Zozoe sã n da tõogame n kõ nebã vʋʋsgã, Wẽnnaam dag n ka na n gom vʋʋsg daar a to yell ye.

9Woto yĩnga, vʋʋsg daar a to n be Wẽnnaam nebã yĩnga.

10Bala, ned ning sẽn deegd vʋʋsg ning Wẽnnaam sẽn kõta me basda a tʋʋmã n vʋʋsd wa Wẽnnaam sẽn bas b rẽnd n vʋʋsã.

11Bɩ d kẽ vʋʋs-kãng pʋgẽ tao-tao, tɩ ned baa a yen da wa tũ kɩɩsgã mamsg n lʋɩ ye.

12Bala, Wẽnnaam goamã vɩɩme, la a tara tõogre, n saas sõama wa zabr sʋʋg sẽn tar noey a yiibu. A kẽedame, hal n tõe n welg vɩɩm ne Sɩɩg n bake, n welg kõb-sũgds ne sɩɩlem toay-toayã n bake. A yaa ninsaal sũur manesem la tagsg bʋ-kaooda.

13Bõn-naandl baa a yen ka be Wẽnnaam sẽn ka ne ye. Bũmb fãa yaa vẽenes la bɛɛl ne soab ning tõnd sẽn na n yals a taoor n togs d yɛlã.

14Tõnd sẽn tar maan-kʋʋr kãsem sẽn pɩʋʋg saasẽ, Wẽnnaam Bi-riblã yĩnga, bɩ d tall tẽeb ning tõnd sẽn tarã kãenkãe.

15Bala, tõnd ka tar maan-kʋʋd kãsem sẽn ka tõe n wʋm tõnd pãn-komsmã võor ye. Bãmb paama makr ne bũmb fãa wa tõndo, la b ka maan yel-wẽnd ye.

16Woto yĩnga, bɩ d kolg bark soab a Wẽnnaam geerã ne pɛl-kɛgenga, tɩ d tõe n paam tɩ b zoe d nimbãanega, la d zĩnd bark bãmb nifẽ, tɩ d tõe n paam sõngr wakat ning d sẽn tog n paame.

← Chapter 3 Jump to: Chapter 5 →