2 Corinthians 1

mewari

Jump to: Chapter 2 →

1यो कागद मूँ पोलुस ज्यो परबू ईसू मसी की मरजीऊँ खन्दायो तको चेलो हूँ अन भई तिमुतियुस कुरिन्तुस नगर की मण्डली ने अन अखाया का हाराई परमेसर का मनकाँ ने लिकरिया हाँ।

2आपणाँ बापू परमेसर अन परबू ईसू मसी का आड़ीऊँ थाँने दया अन सान्ती मले।

3आपणाँ परबू ईसू मसी का बापू परमेसर की बड़ई वेवे, वीं दया करबावाळा अन हिम्मत देबावाळा हे।

4अन जद्याँ आपाँ कळेस में वेवा हा तो परमेसरइस आपाँने हिम्मत देवे हे, ताँके आपाँ भी परमेसर की सान्तीऊँ वाँ मनकाँ ने हिम्मत दे सका ज्यो कळेस में पड़्या तका हे।

5काँके जस्यान आपाँ मसी का हाते दुक में हिस्सेदार हाँ, वस्यानीस आपाँ भी मसी की वजेऊँ परमेसर की हिम्मत में हिस्सेदार हाँ।

6अन यद्याँ माँ कळेस भोगा हाँ तो थाँकी हिम्मत अन थाँने बंचाबा का वाते भोगा हाँ अन माँ राजी हा काँके थाँ राजी हो अन थाँको राजी रेणोइस थाँने धीरज का हाते वणा कळेस ने भोगबा का वाते हिम्मत देवे हे ज्यो आपाँ भोगा हा।

7माँ थाँकाऊँ पाकी आस राका हाँ, काँके माँ जाणा हाँ के, जस्यान थाँ माकाँ कळेस में हिस्सेदार हो वस्यानीस माँकी हिम्मत में भी थाँ हिस्सेदार हो।

8हो विस्वासी भायाँ माँ ओ भी छावाँ हाँ के, ज्यो कळेस माँने एसिया में जेलणो पड़्यो हो वींके बारा में थाँ भी जाणो। वटे माँ माँकी सेनसगतीऊँ भी हेलो कळेस भोग्यो हो अन मरबा तईं की नोपत अईगी ही।

9अन माँ माकाँ हरदा में आ बात होचबा लागा के, माँने तो मोत को दण्ड मलग्यो हे, जणीऊँ माँ खुद पे हेलो भरोसो ने करन परमेसर पे भरोसो राका हा, ज्यो मरिया तका ने भी पाच्छा जीवता कर देवे हे।

10अन वणाईस माँने भी खतरनाक मोतऊँ बंचाया हा अन आगे भी बंचाता रेई, काँके माँ वींपेईस आस लगा मेली हे, वींइस माँने आगे भी बंचाई।

11अन यद्याँ थाँ भी थाँकी परातना में माँने आद करन मदत किदी तो जीं मनक माकाँ वाते अरज करे हे के, माकाँ पे परबू की दया वे, अन परमेसर ज्यो माकाँ वाते किदो हे वींका वाते वणा मनकाँ ने भी धन्नेवाद देबा को मोको मल जाई।

12माँ आ बात मेपणोऊँ अन साप हरदाऊँ के सका हाँ के, माँ ईं दनियाँ का हाते अन खासतोरऊँ थाँका हाते परमेसर की दया के जस्यान चाल्या हा अन हव तरियाऊँ अन हाँच का हाते चाल्या हा ज्यो परमेसर का आड़ीऊँ मले हे ईं दनियाँ की अकलऊँ ने मले हे।

13माँ थाँने अस्यो कई ने लिकरिया हाँ ज्यो थाँ ने भण सको अन ने हमज सको। मूँ आस करूँ के, थाँ अणी कागद की हारी बाताँ ने अंत पुरी तरियाऊँ हमज लेवो।

14जस्यान थोड़ागणा थाँ माँने हमज्या हो, थाँ मारा पे वस्यानीस मेपणो कर सको हो जस्यान के माँ थाँका पे वणी दन मेपणो कराँ जद्याँ आपणाँ ईसू मसी पाच्छा आई।

15अन ईं भरोसा की वजेऊँ मूँ थाँका नके पाछो आबा का वाते ते किदो हो, जणीऊँ मूँ थाँने दो दाण आसिरवाद ले सको।

16मूँ होचूँ हूँ के, जद्याँ मूँ मकिदुनिया जातो तको थाँकाऊँ मलूँ अन जद्याँ मकिदुनियाऊँ पाछो आऊँ तो थाँका नके अऊँ अन थाँईस मने यहूदियाँ जाबा वाते जरूत की चिजाँ देन हिक देवो।

17ईं वाते जद्याँ मूँ ईं बाताँ की मरजी किदी ही वाँ यूँई तो ने किदी अन में ज्यो मरजी किदी हे वाँ ईं दनियाँ का मनकाँ का जस्यान थोड़ी किदी हे। यद्याँ अस्यान करतो तो मूँ हाँ हाँ अन ने ने केतो।

18पण परमेसर विस्वास जोगा हे, ईं वाते माँ थाँने ज्यो हमच्यार हुणायो हे, वो हाँचो हे।

19काँके थाँका बचमें में अन सिलवानुस, तिमुतियुस परमेसर का बेटा ईसू मसी को ज्यो परच्यार किदो हो, वो हाँ अन ने में कोयने किदो हो पण वो ईसू मसी में हाँ मेंईस हो।

20काँके परमेसर ज्यो भी वादो किदो हे वो ईसू मसी में हाँ में पूरो किदो हे अन आपाँ भी ईं वजेऊँ केवाँ हाँ के, अस्यानीस वे(आमीन) अन ओ परमेसर की मेमा का वाते वेवे हे।

21अन ज्यो थाँने भी मारा हाते ईसू मसी की वजेऊँ जोड़े हे अन आपाँने चुण्या हे, वीं परमेसरइस हे।

22वींइस आपाँ पे छाप भी लगई हे अन आपणाँ मयने गारन्टी का रूप में पुवितर आत्मा दिदी हे, वीं आपणो वादो पूरो करी।

23गवई का रूप में परमेसरऊँ अरज करतो तका अन मारा जीवन का होगन खान कूँ हूँ के, मूँ पाछो कुरिन्तुस में ईं वाते ने आयो हो काँके मूँ थाँने दकऊँ बंचाणा छातो हो।

24अन ईंको ओ मतलब ने के, माँ थाँका विस्वास पे काबू पाणो छारिया हाँ। थाँ तो थाँका विस्वास में गाटा हो अन माँ तो थाँकी खुसी में थाँका हाते हाँ।

Jump to: Chapter 2 →