2 Corinthians 8

mewari

← Chapter 7 Jump to: Chapter 9 →

1देको, हो विस्वासी भायाँ अबे माँ ओ छावाँ हाँ के, थाँ परमेसर की वीं दया का बारा में जाणो ज्यो मकिदुनिया का विस्वास्याँ की मण्डळ्याँ पे किदी गी ही।

2मारा केवा को ओ मतलब हे के, वणा मण्डळ्याँ का मनकाँ ने परक्या ग्या हा, तद्याँ भी वीं राजी हा अन वीं गरीब वेता तका भी वीं देबा का मामला में खुला मनऊँ दिदो।

3मूँ वाँका बारा में गवई दे सकूँ हूँ के, वीं जतरो भी वीं दे सकता हा वतरो वणा दिदो। अतरोकीस ने वणा आपणी सगतिऊँ भी बड़न आपणी मरजीऊँ हरदा ने खोलन दिदो।

4वीं मोटा बोज का हाते परमेसर का पुवितर मनकाँ की मदत करबा का मोका का वाते अरज करता रिया।

5अन जस्यान माँ वाँकाऊँ आस राकी ही, वणीऊँ हेलो वणा किदो। वणा पेल्याँ खुद ने परबू ने हूँप दिदा अन पछे परमेसर की मरजीऊँ वणा खुद ने माँने हूँप दिदा।

6ईं वाते माँ तीतूसऊँ अरज किदी के, जस्यान वणी आपणो काम चालूँ कर दिदो हे, वस्यानीस ईं दान भेळो करबा का काम ने थाँका वाते पूरो करे।

7अन थाँ हारी बाताँ धनवान हो, जस्यान के विस्वास में, बोली में, ग्यान में, नरई तरियाऊँ भलई करबा में अन जणी परेम की हिक माँ थाँने दिदी ही, वीं परेम में थाँ पाका हो वस्यानीस थाँ अणी दान देबा का काम में भी बड़ता जावो।

8आ बात में आग्या देन ने की, पण दूजाँ मनकाँ के खुला मनऊँ दान देबा की भावना का बारा में केन थाँका परेम का हाँच की परक करणो छारियो हूँ।

9काँके थाँ आपणाँ परबू ईसू मसी की दया ने तो जाणोइस हो अन थाँ ओ भी जाणो हो के, वीं अमीर वेता तका भी थाँका वाते गरीब बणग्या। जणीऊँ वाँकी गरीबीऊँ थाँ अमीर वे जावो।

10या बात थाँका वाते हव हे, अन ईं दान का काम में एक वरऊँ करबा मेंईस ने पण ईं बात ने मानबा में भी थाँ हाराऊँ आगे हो। ईं बात में मारी सला हे के,

11अबे थाँ अणी काम ने पूरो करो। ज्या मरजी थाँ किदी ही, वींने ज्यो कई थाँका नके हे वींमेंऊँ दान देन पुरी करो।

12काँके जस्यान देबा को मन वेवे हे वस्यानीस वींको दान गरेण किदो जावे हे। मारो केणो हे के, जतरोक वे वतरो दे दिज्यो वणीऊँ बड़न मती देज्यो।

13काँके मूँ ओ ने छावूँ हूँ के, थाँ परेसानी में पड़ जावो अन दूजाँ ने थाँकाऊँ नफो वे, पण माँ तो हाराई को भलो छावाँ हाँ।

14मारी मरजी हे के, वाँकी अणी घटती में थाँकी बढोतरी वाँकी जरूत पुरी करे, जणीऊँ कणी दन थाँकी घटती में वाँकी बढोतरी थाँकी जरूत पुरी कर सके, अस्यान हाराई बराबर वे जाई।

15जस्यान सास्तर में लिक्यो तको भी हे के, “जणी नरोई भेळो किदो वींके नके जरूतऊँ हेलो ने बच्यो, पण जणी थोड़ोकइस भेळा किदो वींके कईस कमी ने पड़ी।”

16परबू को धन्नेवाद वे, ज्यो तीतूस का हरदा में थाँकी चन्ता करबा का वाते वस्यानीस मरजी दिदी हे, जस्यान की मरजी मारा हरदा में हे।

17काँके वणी माँकी हाता-जोड़ीइस ने मानी अन वींके वाते वो मरजी भी राके हे, ईं वाते वो खुद की मरजीऊँ थाँका नके आबा वाते अटूऊँ हिक लेरियो हे।

18अन माँ तीतूस का हाते वणी भई ने भी खन्दारिया हा, जिंको हव हमच्यार का परच्यार करबाऊँ हारी मण्डळ्याँ में अन हारी जगाँ में वींको नाम फेलरियो हे।

19अन अतरोइस ने पण वो मण्डली का मनकाँ का क्या के, जस्यान मारा हाते जाबा का वाते वींने चुण्यो भी हे। ईं दान का काम वाते वो मारा हाते जावे अन माँ ओ सेवा को काम ईं वाते करिया हाँ जणीऊँ परबू की मेमा अन माँकी हरदा की मरजी हामे आवे।

20अन माँ ईं बात को ध्यान राका हाँ के, खुला मनऊँ दिदा तका हेला दान का काम ने माँ कररिया हाँ, वींका वाते कुई दोस ने लगा सके।

21काँके ज्यो बाताँ परबू की देकणी मेंईस ने पण मनकाँ की देकणी में भी सई हे, माँ वणा बाताँ की चन्ता कररिया हा।

22वाँका हाते माँ माकाँ एक ओरी भई ने खन्दारिया हाँ, जिंने माँ घणी बाताँ में अन घणी दाण भलई करबा का वाते त्यार देक्यो हे अन अबे वींने थाँका पे घणो विस्वास हे, जणीऊँ वींने थाँकी मदत करबा की मरजी घणी हेली वेगी हे।

23यद्याँ कुई मने तीतूस का बारा में पूछे, तो वो मारा हाते रेबावाळो अन थाँका नफा का वाते मारा हाते काम करबावाळो हे अन जटे तईं मारा भायाँ को सवाल हे तो, वीं मण्डळीऊँ खन्दाया तका अन मसी की मेमा का हे।

24ईं वाते थाँ वाँने परेम करन बताज्यो, माँ थाँका पे अतरो मेपणो काँ कराँ हाँ। ईं बात ने थाँ साबत करज्यो, जणीऊँ हारी मण्डली वींने देक सके।

← Chapter 7 Jump to: Chapter 9 →