2 Corinthians 9

mewari

← Chapter 8 Jump to: Chapter 10 →

1परमेसर का पुवितर मनकाँ का वाते ज्यो दान खन्दायो जारियो हे, ईंका बारा में मूँ थाँने ओरी हेलो लिकबा का वाते जरूरी ने हमजूँ हूँ।

2काँके मूँ जाणूँ हूँ, ईं काम ने करबा का वाते थाँ हमेस्यान त्यार रेवो हो अन ईं बात ने मकिदुनिया का मनकाँ का हामे केवाऊँ मेपणो वेई के, अखाया का मनक पालाँ साल ऊँइस त्यार वेग्या हा अन थाँका काम ने देकन नरई मनकाँ ने काम करबा की हिक मली हे।

3पण मूँ भायाँ ने थाँका नके ईं वाते खन्दारियो हूँ के, माँ थाँका वाते ज्यो मेपणो कररिया हा वो बेकार ने वे जावे अन ईं वाते भी के थाँ त्यार रेवो, जस्यान मूँ केतो भी आयो हूँ।

4यद्याँ अस्यान ने व्यो तो जद्याँ मकिदुनिया का मनक मारा हाते, थाँका नके आई अन वीं थाँने त्यार ने देकी तो, मारा वणी विस्वास की वजेऊँ ज्यो माँ थाँकामें बतायो हो, माँने हरमा मरणो पड़ी अन थाँने तो घणोइस हरमा मरणो पड़ी।

5ईं वाते मूँ भायाँऊँ अरज कररियो हूँ के, वीं पेल्याइस थाँका नके परा जावे अन थाँका नकेऊँ वीं दान जिंका बारा में थाँ पेल्याँईं बचन दिदो हो, वींने त्यार राको अन ओ मारा जोरऊँ ने हो, पण थाँकी हरदा की खुसी जस्यान वे।

6थाँने मूँ एक बात बताऊँ हूँ के, ज्यो थोड़ोक वावे हे वो थोड़ोकइस काटे हे अन ज्यो हेलो वावे हे, वो हेलो काटी।

7थाँ जतरो मन में होच्यो हे वतरोइस दान दो, ने तो वो दकऊँ अन ने किंका जोरऊँ, काँके परमेसर वणीऊँ परेम करे हे ज्यो हरदा की खुस वेन दान देवे हे।

8परमेसर हाराई तरियाँ का वरदान दे सके हे, जणीऊँ थाँकी हारी बाताँ अन हरेक टेम में, हारोई ज्यो थाँका वाते जरूरी हे, वो थाँका नके वेवे अन हाराई भला काम का वाते जरूतऊँ हेलो थाँका नके रेवे।

9जस्यान सास्तर में लिक्यो तको हे के, “वो खुला मनऊँ गरीबा ने देवे हे, अन वींको धरम कदी नास ने वेई।”

10परमेसरइस बीज बावावाळा ने बीज अन खाणो खाबावाळा ने रोटी देवे हे। वींइस थाँने बीज देई अन वींइस मोटा करी, वाँकाऊँईस थाँकी धरम की खेती फलती-फुलती रेई।

11थाँने हरेक तरियाँ धनवान बणाया जाई जणीऊँ थाँ आपणाँ हात ने खोळो राकन दे सको अन ईं दानऊँ जद्याँ माँ किंकी मदत कराँ तो ईं वजेऊँ वीं मनक परबू ने धन्नेवाद देई।

12दानकी पुवितर सेवाऊँ बेस परमेसर का पुवितर मनकाँ किइस जरूत पुरी ने वेवे हे पण परमेसर ने धन्नेवाद देबा को भाव भी मनकाँ में आवे हे।

13काँके थाँकी ईं सेवाऊँ वीं परमेसर ने मेमा देई, अन अणीऊँ ओ दिके हे के, थाँ मसी का हव हमच्यार ने मानन वींके गलेइस चालो हो अन वाँकी अन हाराई ने मदत करबा का वाते खुला मनऊँ दान देवो हो।

14वीं थाँका वाते परमेसरऊँ परातना करी, काँके वीं थाँकाऊँ गेरो परेम करे हे अन वीं जाणे हे परमेसर थाँ लोगाँ पे करती दया किदी हे।

15परमेसर का वणी वरदान का वाते वींको धन्नेवाद वे, जिंको बखाण ने करियो जा सके हे।

← Chapter 8 Jump to: Chapter 10 →