2 Peter 3

Marwari Bible

← Chapter 2 Jump to:

1हे म्हारै प्यारौ भाइयो, अबै म्हैं थांनै आ दूजी चिठ्ठी लिखूं हूं, अर दोनूं मांय सुधि दिलान थौरे सुद्ध मन नै उभारू हूं।

2की थै उण बातां नै, जिकौ पवितर भविसयदाताओ पैला ऊं कही ही अर परभु, अर उद्धारकर्ता री उण आग्या नै याद करौ, जिकौ थौरे प्रेरितों रै जरियै दी गई ही।

3अर ओ पैला जांण लौ, की आखरी दिनां मांय हंसी ठटा करनै वाळा आवैला, जिकौ आपरी भूंडी इछा रै अनुसार चालैला।

4अर कैवैला, “यीसु मसीह रै आवण रौ वायदो कठै गियौ? क्यूंकै जद ऊं बापदादा सो ग्या हा, सैंग वैड़ौ इज है, ज्यौ जगत रै सरूआत ऊं हो?”

5वे तो जांण बूझनै ओ भुलग्यां, की परमेसर रै वचन रै दवारा आभौ पुराणै काल ऊं टिकियोड़ो है अर धरती भी पांणी मांय ऊं बणी अर पांणी मांय स्थिर है।

6इण पांणी रै खातर उण जुग रौ जगत पांणी मांय डूबनै नास होय ग्यौ।

7पण अबार इण वगत आभौ अर धरती उण वचन रै अनुसार इण वास्तै राख्या है, की बाळया जावै। अर वो बिना भगती रा मिनखौ रै न्याव अर नास होणै रै दिन तांई यूं ही राख्योड़ा रैला।

8हे म्हारै प्यारौ भाइयो, आ एक बात थौरे ऊं लुकयोड़ी नीं रैवै, की परभु रै उठै एक दिन हजार बरस रै बराबर है, अर हजार बरस एक दिन रै बराबर है।

9परभु आपरै वायदे रै बारै में मोड़ौ नीं करै, ज्यौ मोड़े नै किता लोग समझै है। पण थौरे बारै में धीरज धरै है, अर नीं चावै, की कोई नास हो। बल्कि ओ की सगळौ नै मन फिराव रौ मौकौ मिळै।

10पण परभु रौ दिन चोर री ज्यूं आ जावैला। उण दिन आभौ घणी हड़बड़ाहट रै आवाज ऊं जातौ रैला, अर घणी चीजों ही तापनै पिघळ जावैला, अर धरती अर उण माथला कांम बळ जावैला।

11जद की ऐ सगळी चीजों, इण रीत ऊं पिघळ नै वाळी है, तो थांनै पवितर जीवन अर चाल चलण अर भगती में चौखौ होणौ चाहीजै।

12अर परमेसर रै उण दिन री बाट कीण रीत ऊं जोवणी चाहीजै। अर उणरै वेगौ आवण रै खातर यत्‍न करणौ चाहीजै। जिणरै कारण आभौ अग्‍नि ऊं पिघळ जावैला, अर आभै रै गण घणा ही तपनै गळ जावैला।

13पण परमेसर रै वायदे रै अनुसार अपां एक नवो आभौ अर नवी धरती री आस देखौ हो जिणमे धारमिकता वास करैला।

14इण वास्तै, हे म्हारै प्यारौ भाइयो, जद की थै इण बातां री आस देखौ हो तो कोसीस करौ की थै सानति ऊं उणरै सांम्ही निसकलंक अर निरदोस ठैहरौ।

15अर म्हौरै परभु री धीरज नै उद्धार समझौ, ज्यौ म्हौरै परैमी भाई पौलुस भी उण ग्यांन रै अनुसार जिकौ उणनै परभु ऊं मिळियौ, थांनै लिख्यौ है।

16व्यौंही उणनै आपरी सगळी चिठ्ठियो मांय भी इण बातां री चरचा किनी है जिणमे किती बातां ऐड़ी है, जिणरौ समझणौ मुसकिल है, अर नासमझ अर भटकणवाळा लोग उणरै अरथ नै भी पवितर सास्तर री तरफ बातां री नाई खींच ताननै अपणै ही नास रौ कारण बणावै है।

17इण वास्तै हे म्हारै प्यारौ भाइयो, थै लोग पैला ही ऊं इण बातां नै जांणनै सावचेत रैवौ, ताकी अधरमियों रै भरम में फसने अपणी स्थिरता नै हाथ ऊं कठैई खौ नीं दो।

18पण म्हौरै परभु, अर उद्धारकर्ता यीसु मसीह रै अनुग्रह अर पिछांण मे बढ़ता रैवौ। उणरी महिमा अबै भी हो, अर युगानयुग होती रैवै। आमीन।

← Chapter 2 Jump to: