Hebrews 13

Mazanderani GMB (گیله ماز)

← Chapter 12 Jump to:

1اَداشانه مُحبَت شیمی میَن بَرقرار هَبو.

2غریبه هانِ هَمرَه مهمان نوازی هَکوردَنِ جی قافِل نَبین، چون این کارِ هَمرَه، بعضیان بی اینکه بِدانَن فِرِشتگانِ جی پَذیرایی هَکُردَن.

3اوشانیکه زِندانِ دِلهِ دَرِن رِه شیمی یاد بِدارین، جوریکه اِنگار شُما هَم اوشانه هَمرَه زِندانِ دِلِه دَرِین؛ و اوشانیکه عذاب کَشِنَن رِه شیمی یاد بیارین، چون شُما هم تَنِ دِلِه عذاب کَشِنین.

4بَنین اِزدواج همه یه میَن حُرمت بِدارِه و زِنا مَردای یه رابطه پاک هَبو، چون خُدا بی عفتان و زَناکارانِ داوری کانه.

5شیمی زندگی رِه پولدوسی یه جی دور بِدارین، و اونچه که دارین رِه قانع هَبین، چون خُدا باَگوته: «هیچ وَخت تِرِه وِل نُکانَم، و تِرِه تنها نُزارنَم.»

6پَس اَما تانیم اطمینانِ هَمرَه باگوییم: «خداوند می یاورِ، نَتِرسِنَم. آدَمی تانِه می هَمرَه چه هَکونه؟»

7شیمی رَهبَرانِ شیمی یاد بِدارین، اوشان که خُدایِ کلامِ شِمِرِه باگُوتَن. اوشانه آخر عاقبتِ زِندگی یه رَوِشِ بَییشین و اوشانه ایمان جی سَرمَخش هَگیرین.

8عیسی مَسیح دیروز و اِمروز و تا اَبد هَمونِه.

9جورواجور و عجیب غریبِ تعلیم هایِ هَمرَه گُمراه نَبین؛ چون این خوبِ که آدَمی یه دِل فیضِ هَمرَه قُوَّت هَگیره، نه اون خُراکهایِ هَمرَه که اوشانی که اونه دُمّال شونِن، اوشانه وَسین منفعتی نِداره.

10اَما ایتاَ قُربانگاه داریم، که اون خیمِه یه پاکاران حَق نِدارَن اونه جی بُخارِن.

11کاهِنِ اعظم، حیوانانِ خونِ گُناه قربانی یه وَسین قُدوس الاَقداسِ دِلِه بَرنهِ، ولی اوشانه جِنازِه ها اُردوگاهِ دِرگا یه ور بَسوزانده بونَن.

12اینجوری، عیسی هَم شَهرِ دَروازِه یه دِرگایِ وَر عذاب بَکِشیِیَه تا خودشه خونِ طریق، مَردُمِ تَقدیس هَکونه.

13پَس بیئِین اَما هم این اُردوگاهِ جی دِرگا بیئیم و اونه ور بیشیم، و اونه نَنگ و عار دِلِه شَریک هَبیم.

14چون اَما ایجه ایتا شهر نِداریم که بِجا بُمانه، بلکِه شوقِ هَمرَه اون شهرِ انتظارِ کَشِنیم که هَنهِ.

15پَس بیئِین عیسی یِه طریق همینجور یِکسرِه شُکر هکُردنِ قُربانی رِه خُدای وَسین پیشکَش هَکُنیم. این قُربانی، اون تُکِ ثمرِئه که اونه اِسمِ اعتراف کانِه.

16خُوبی هَکُردَن جی و بَقیِه رِه شَریک هَکُردَن اونچه یه دِلِه که دارین جی کوتاهی نَکُنین، چون خُدا اینجور قربانیهایِ جی راضیه.

17شیمی رَهبَرانِ جی اِطاعَت هَکُنید و اوشانه تسلیم هَبین؛ چون اوشان شیمی جانِ جی مُحافظت کانَن، و بایِسّی حِساب پس هَدِن. بَنین این کارِ خُشحالی یه هَمرَه هَکُنَن نه آه و ناله یه هَمرَه، چون این شِیمی نفع نیِه.

18اَمَرِه دُعا هَکُنید، چون مطمئنم که اَمی وجدان پاکِ و خَنیم هر لحاظِ جی سَربُلن هَبیم.

19شیمی جی خَنَم بیشتر و بیشتر دُعا هَکُنید تا هر چه زودتر شیمی ور وَگِردَم.

20اَسِه که خُدای صُلح و سلامتی، اَمیِ خُداوند عیسی یعنی گوسِندِشانِ گَتِ گالِش اون اَبدی عهد خونِ هَمرَه، مُردِگانِ جی زندهِ هَکُردِه،

21همون خُدا شِمِره هر خُجیرِ چی یه هَمرَه مُجهز هَکونه، تا اونه ارادِه رِه بِجا بیارین. تا اونچه که خُدا رِه راضی کانه عیسی مَسیح طریق اَمی دِلِه انجام بَرِسانِه، همون عیسیِ مسیح که تا اَبد و تا اَبد اونه جلال هَبوه. آمین.

22اِی اَداشان، شیمی جی خَنَم می گَب که پَند و نصیحتِ هَمرَئِه تَحَمُل هَکُنید، چون خلاصه شِمِرِه بَنویشتِم.

23خَنَم بِدانید که اَمیِ اَداش تیموتائوس آزاد هَبا. اَگِه اون زود بیه، اونه هَمرَه شیمی بِدیِیَن وَسین هَنَم.

24تمام شیمی رَهبَران و تمام مُقَدَّسینِ وَسین سلام بَرسانید. اوشانی که ایتالیایِ جییَن، شِمِرِه سلام رِساندِنَن.

25فیض شیمی همه یه هَمرَه دَبو.

← Chapter 12 Jump to: