Hebrews 5

Mazanderani GMB (گیله ماز)

← Chapter 4 Jump to: Chapter 6 →

1چون هر کاهن اعظم، که آدَمان میَن جی اِنتخاب بونه، تعیین بونه تا اون کارایی که خدارِه ربط دارِه مَردمِ نمایندِه هَبو، تا گُناهانِ خاطری هَدیِه ها و قُربانیها خُدا رِه پیشکَش هَکونه.

2اون تانِه نادانان و گُمراهانِ هَمرَه نرمی یه هَمرَه رفتار هَکونه، چون اون خودِش ضَعف دارِه.

3اینه وَسین، اون بایِسّی خودشه گُناهانِ وَسین قُربانی هَدِه همونجور که مَردُمِ وَسین دَنه.

4و هیچکَس خودِش، نَتَّنِه این کاهنی یه افتخارِ خودِشِه هَدِه، بلکه این افتخار اون موقِه ایی که خُدا اونِه دُخواندِنِه اونه رَسِنه، همونجور که هارونِ بَرسیَه.

5مَسیح هَم خودِشِه جآر نَبِردِه تا کاهن اعظم هَبو، بلکه اونه طریق تعیین هَبا که اونه باَگوته: «تو می ریکا هیسی؛ اِمروز، مَن ترِه مولود هَکُردم.»

6همونجور که اون یِجا دیگَرَم گونِه: «تو تا اَبد کاهن هیسی، مِلْکیصِدِقِ رَدِه یه دِله.»

7اون روزانِی که عیسی جِسمِ دِلِه دَبا، بِرمِه ها و آرسو ها و شول و شیونِ هَمرَه اونه وَر که تانِسِّه اونه مَرگِ جی نِجات هَدِه، دُعا و اِلتماس هَکُردِه، و خودشه کامِلِ اطاعتِ خاطری، اونه دُعا مُستجاب هَبا.

8هر چَن که ریکا با، اون عذابایِ خاطری که بَکِشیِه، اِطاعَتِ یاد بِیته.

9و اون موقه که کامل هَبا، تمامِ اوشانیکه اونه جی اِطاعَت کانَن رِه، اَبدی نِجاتِ سرچشمِه هَبا،

10و خُدایِ طرفِ جی تعیین هَبا که کاهنِ اعظم هَبو، مِلْکیصِدِق رَدِه یه دِلِه.

11اینهِ باره خیلی چیزان داریم که باگوییم، وَلی اونِه توضی سَختِ، چونکه شیمی گوش سَنگین هَبا.

12چون هَر چَن که شُما تا اَلآن بایِسّی مُعلِم هَبین. احتیاج دارین یِنفر خُدایِ کلامِ اُصولِ اولیه رِه یِدَفِه دیگه شِمِره یاد هَدِه. شُما هَلَه شیر خَنید، نه سنگینِ غذا!

13چون هر کی شیرخوارِ، صالحی یه کلامِ دِلِه بی تَجربِئِه، چون هَلَه وَچِئه.

14وَلی سنگینِ غذا گَتِه آدمانِ وَسینِ، اوشانه وَسین که خودِشانِه قوه یه تشخیص رِه زیادی تمرین هَمرَه، جوری تربیت هَکُردَن کِه بَتِنِّن بَد و خوبِ تَشخیص هَدَن.

← Chapter 4 Jump to: Chapter 6 →