Nahum 2

Nepali 2012 (NNRV) New Revised Version (नेपाली नयाँ संशोधित संस्करण)

← Chapter 1 Jump to: Chapter 3 →

1हे निनवे, एउटा छापामार तेरो विरुद्धमा बढ्‌दैछ। किल्‍लाको सुरक्षा गर्, बाटो राम्ररी हेर्, कम्‍मर कस्, तेरो पूरा बल लगा।

2परमप्रभुले याकूबको गौरवलाई इस्राएलको श्रेष्‍ठताझैँ फेरि फर्काउनुहुनेछ, यद्यपि ध्‍वंसकहरूले तिनीहरूलाई उजाड़ पारेका छन्, र तिनीहरूका दाखका बोटहरू नष्‍ट पारेका छन्‌।

3त्‍यसका सिपाहीहरूका ढालहरू राता छन्‌। त्‍यसका योद्धाहरूले गाढ़ा लाल पोशाक पहिरेका छन्‌। ती तयारी पारिएको दिनमा रथहरूका धातु चम्‍कन्‍छन्, सल्‍लोका भालाहरू उजाइएका छन्‌।

4रथहरू सड़कमा खूब वेगसित हाँकिन्‍छन्, र चोकहरूमा तिनीहरू अगि-पछि गर्दै जोडले कुद्‌छन्‌। तिनीहरू जलिरहेका राँकाहरूजस्‍तै देखिन्‍छन्, तिनीहरू बिजुलीजस्‍तै वेगले कुद्‌छन्‌।

5त्‍यसले आफ्‍ना चुनिएका सेनाहरूलाई हाजिर गराउँछ, तापनि उनीहरू आफ्‍नो बाटोमा धरमरिन्‍छन्‌। उनीहरू आतुरीसाथ सहरको पर्खालतिर दगुर्छन्‌। रक्षा गर्ने ढाल त्‍यसकै ठाउँमा राखिन्‍छ।

6नदीका बाँधहरू खुला पारिन्‍छन्‌। दरबार ढल्‍छ।

7यो अवश्‍यम्‍भावी छ, सहर निर्वासनमा लगिनेछ। त्‍यसका दासीहरू छाती पिट्‌दै ढुकुरहरूझैँ विलाप गर्छन्‌।

8निनवेचाहिँ पानीको दहजस्‍तै छ, त्‍यसको पानी सुक्‍दैगइरहेछ। “पख्‌! पख्‌।” भनेर कराउँदा पनि कसैले पछि फर्केर हेर्दैन।

9चाँदी लुट! सुन लुट! त्‍यसका सबै धन-सम्‍पत्तिको केही टुङ्गै छैन।

10त्‍यो लूटपीट गरियो, लुटियो र नाङ्गो पारियो। हृदयहरू गल्‍छन्, घुँड़ाहरू काँप्‍छन्, र सारा शरीरमा पीडा छ, सबै चेहराहरू पहेँला-पहेँला हुन्‍छन्‌।

11साना-साना सिंहहरूलाई खुवाउने गुफा खोइ? जहाँ सिंह र सिंहनी डमरुहरूसमेत नडराई हिँड्‌दथे।

12आफ्‍ना डमरुहरूलाई प्रशस्‍त हुने गरी सिंहले शिकार मार्थ्‍यो, र त्‍यसकी सिंहनीको निम्‍ति पशुहरूलाई फहराउँथ्‍यो। त्‍यसले आफ्‍ना ओड़ारहरू शिकार गरेर ल्‍याएका पशुहरूले र आफ्‍ना गुफाहरू आफ्‍नो शिकारले भरपूर पार्दथ्‍यो।

13सर्वशक्तिमान्‌ परमप्रभु घोषणा गर्नुहुन्‍छ, “म तेरो विरुद्धमा छु। म तेरा रथहरू धूवैधूवाँ हुने गरी जलाइदिनेछु, र तेरा जवान सिंहहरू तरवारको गाँस हुनेछन्‌। म तेरो लागि शिकार छोड्‌नेछैनँ, र तेरा समाचारवाहकका शब्‍द अब उप्रान्‍त सुनिनेछैनन्‌।”

← Chapter 1 Jump to: Chapter 3 →