1 John 3

Dutch Frisian

← Chapter 2 Jump to: Chapter 4 →

1Tjitjt, waut fe eene groote Leew ons de Voda jejeeft haft, daut wie Tjinja Gottes heete selle! Doawäajen ertjant ons de Welt nijch, wiel see am nijch ertjant haft.

2Jeleefte, nü send wie Tjinja Gottes, en daut es noch nijch openboa jeworde, waut wie senne woare; wie weete, daut, wann daut woat openboa woare, {Kol.3,4} wie am jlitj senne woare, dan wie woare am seene, aus hee es.

3En jiedra, dee dise Hopninj opp too am haft, reinijcht sich selfst, soo aus hee rein es.

4Jiedra, dee de Sind deit, deit uck de Jesatzloosijchtjeit, en de Sind es de Jesatzloosijchtjeit.

5En jie weete, daut hee jeopenboat jeworde es, doamet hee onse Sinde wajchnehmt; en Sind es nijch enn am.

6Jiedra, dee enn am blift, sindijcht nijch; jiedra, dee sindijcht, haft am nijch jeseehne noch am ertjant.

7Tjinja, daut tjeena jünt vefeat! Wäa de Jerajchtijchtjeit deit, es jerajcht, soo aus hee jerajcht es.

8Wäa de Sind deit, es vom Diewel, dan de Diewel sindijcht vom Aunfank. Doatoo es de Sän Gottes jeopenboat worde, omm daut hee de Woatje von däm Diewel venijcht oppleest.

9Jiedra, dee üt Gott jebuare es, deit nijch Sinde, dan sien Some blift enn am; en hee kaun nijch sindje, wiel hee üt Gott jebuare es.

10Doarenn send openboa de Tjinja Gottes en de Tjinja vom Diewel. Jiedra, dee nijch Jerajchtijchtjeit deit, es nijch üt Gott, en wäa nijch sienen Brooda leeft.

11Dan dit es de Botschoft, dee jie von Aunfang jeheat ha, daut wie eenaunda leewe selle;

12nijch aus Kain üt däm Beesen wea en sienen Brooda ommbrocht; en wäaje waut brocht hee am omm? Wiel siene Woatje bees weare, oba dee Woatje von sienem Brooda jerajcht.

13Wundat jünt nijch, Breeda, wann de Welt jünt hausst.

14Wie weete, daut wie üt däm Doot enn daut Läwe äwajegohne send, wiel wie de Breeda leewe; wäa dän Brooda nijch leeft, blift enn däm Doot.

15Jiedra, dee sienen Brooda hausst, es een Menschemerda, en jie weete, daut tjeen Menschemerda eewijet Läwe enn sich bliewend haft.

16Doarenn ha wie de Leew ertjant, daut hee fe ons sien Läwe ennjesat haft; uck wie send schuldijch, fe de Breeda daut Läwe enntosate.

17Oba wäa dän Läwesunjahault de Welt haft en sitt sienen Brooda Mangel liede en veschlit sien Hoat ver am, woo blift de Leew Gottes en am?

18Tjinja, loht ons nijch met Wead leewe, noch met de Tung, sonda enne Dod en Woahrheit.

19En doaraun woa wie ertjane, daut wie üt de Woahrheit send, en woare ver am onse Hoate berüje äwazeije,

20Daut, wann ons Hoat ons veüadeelt, Gott jrata es aus ons Hoat en weet aules.

21Jeleefte, wann ons Hoat ons nijch veüadeelt, soo ha wie Friemootijchtjeit froohem Toogang too Gott,

22en waut wie bedde, emfang wie von am, wiel wie siene Jeboote hoole en daut ver am wooljefaulje doone.

23En dit es sien Jeboot, daut wie aun dän Nome von sienem Sän Jesus Tjristus jleewe en eenaunda leewe, soo aus hee ons een Jeboot jejäft haft.

24En wäa siene Jeboote helt, blift enn am, en hee enn am; en doaraun ertjan wie, daut hee enn ons blift, aun derjch däm Jeist, däm hee ons jejäft haft.

← Chapter 2 Jump to: Chapter 4 →