1 Peter 3

Dutch Frisian

← Chapter 2 Jump to: Chapter 4 →

1Kratjt soo jie Frües, siet jüne eajne Manna unjadon, doamet, wann uck atelje däm Wuat nijch jehorjche jleewe, see derjch dän Waundel de Frües ohne Wuat jewonne woare,

2enn däm see jünen enn Ferjcht reinem Waundel beobacht ha;

3dee äa Schmuck nijch de ütwendja es derjch de Hoa flajchte en Ommhenje von Gold oda Auntratje von Tjleeda,

4sonda de vestoakna Mensch em Hoate enn däm onnveweslijchet Schmuck vom saunften en stellen Jeist, dee ver Gott sea kostboa es.

5Dan soo nämlijch muake sich uck schmock eenst de heilje Frües, dee äare Hopninj opp Gott sade, enn däm see äare eajne Manna unjadon weare;

6aus Sara däm Obraum jehorjcht en am Harr nand, äare Tjinja send jie jeworde, wann jie Goodet doone en tjeen Schratj ferjchte.

7Jie Manna kratjt soo, wohnt bie met ahn no Ertjantnis Ennsejcht, aus bie eenem schwakren Jefäss, däm früesjeschlajcht, ahn Ea jäwe, aus dee uck Metoawe de Jnod vom Läwe send, omm daut jüne Jebäde nijch vehindat woare.

8Oba endlijch siet aula jlitj jesennt, metliedijch, voll brooda Leew, boarmhoatijch, deemütijch,

9en vejelt nijch Beeset met Beesem, oda Schellwuat met Schellwuat, sonda em Jäjendeel säajent, wiel jie doatoo send beroope worde, daut jie Säajen oawe.

10“Dan wäa daut Läwe leewe en goode Doag seene well, dee helt siene Tung vom Beesen, en siene Leppe, daut see nijch Faulsch räde;

11hee drei sich wajch vom Beesen en doo Goodet; hee seatjt Fräd en joag am no;

12dan de Uage vom Harrn send opp de Jerajchte jerejcht, en siene Uhre opp äa Jebäd; oba daut Aunjesejcht vom Harrn es jäajen dee, de Beeset doone. {Ps.34,13-17}

13En wäa es, dee uck Beeset doone woat, wann jie fe daut Goode iewrijch jeworde send?

14Oba wann jie uck liede sulle omm de Jerajchtijchtjeit welle, seelijch send jie! Oba jie änjst jünt nijch wann see jünt änjste, en loht jünt nijch vewerre,

15sonda heilijcht Tjristus, däm Harrn, en jüne Hoate. {Jes.8,12-13} Oba siet jieda Tiet reed too Veauntwuadunk jäajen jiedrem, de Räatjenschoft von jünt fodat äwa de Hopninj, dee enn jünt es;

16oba met Saunftmoot en Ferjcht; enn däm jie een goodet Jewesse ha, doamet, enn däm see jäajen jünt aus Iebel doonende räde, de too Schaunde woare, dee jünen gooden Waundel enn Tjristus vespotte.

17Dan daut es bäta, wann de Welle Gottes daut well, fe Gootsdoone too liede, aus fe Beeset doone.

18Dan uck Tjristus haft eenmol fe de Sind jeläde, de Jerajchta fe de Onnjerajchte, doamet hee ons too Gott feaht, zwoa doot jemoakt no däm Fleesch, oba läwendijch jemoakt no däm Jeist,

19enn däm hee uck hanjintj en vetjindijd [daut Heil] de Jeista, dee em Jefentjniss send,

20dee eenst onnjehuarsom weare, aus de Langmoot Gottes jeduldijch lüad enn de Doag Noah, aus de Arche jebut wort, enn dee weinje, daut es acht Seele, derjch daut Wota jerat worde,

21waut fe Jäajenbild uck jünt nü rade woat, daut es de Taufe, nijch een Auflaje de Onnreinijchtjeit vom Fleesch, sonda de Bedd too Gott omm een goodet Jewesse, derjch de Oppstohninj Jesus Tjristus,

22dee, enn dän Himmel jegohne, too Rajche Gottes es, enn däm Enjel en Jewaulte en Machte am unjadon send.

← Chapter 2 Jump to: Chapter 4 →