1 Thessalonians 3

Dutch Frisian

← Chapter 2 Jump to: Chapter 4 →

1Doawäajen, doa wie daut nijch lenja üthoole kunne, ha wie daut fe goot jehole, auleen enn Ateen tridj too bliewe,

2en wie schetjte Timotäus, onsem Brooda en Metoabeida Gottes bie de Vetjindjung de froohe Botschoft von Tjristus, omm jünt too stoatje en vemohne treeste enn jünem Gloowe,

3doamet tjeena wankent woat enn diese Bedrenjnise. Dan jie selfst weete, daut wie doatoo ennjesat send;

4dan uck aus wie bie jünt weare, säd wie jünt verhäa, daut wie woare bedrenjt woare, ausset uck passeat es en jie weete.

5Doawäajen uck, daut etj et nijch lenja üthoole kunn, schetjt etj, omm jünen Gloowe too erfoahre, auf nijch fleijcht de Veseatja jünt vesocht haft en onse Oabeit vejäfs jewäse es.

6Oba nü, doa Timotäus von jünt no ons jekohme es en ons de goode Botschoft von jünem Gloowe en jüne Leew jebrocht haft, en daut jie ons auletiet enn goodem Jedajchtniss ha, jünt bange, ons too seene, aus uck wie jünt;

7doawäajen Breeda, send wie enn aul onse Noot en Bedrenjnis äwa jünt jetreest worde derjch jünem Gloowe;

8dan weil nü läw wie, wann jie faust stohne em Harrn.

9Dan waut ver een Dank tje wie Gott fe jünt vejelte brinje fe aule Freid, met dee wie ons jünthaulwe freie ver onsem Gott;

10enn däm wie Nacht en Dach äwa aule Moot bedde, daut wie jun Aunjesejcht seene en trajcht brinje waut enn jünem Gloowe mangelt.

11Oba hee selfst, onsa Gott en Voda en onsa Harr Jesus mucht onsem Wajch no jünt ennrejchte.

12Oba jünt mucht de Harr wausse lohte en äwaritj moake enne Leew too eenaunda en too aule, aus uck wie Leew too jünt ha,

13omm jüne Hoate too stoatje, schultloos onnschuldijch enn Heilijchtjeit ver onsem Gott en Voda, biem Wadakohme von onsem Harrn Jesus met aule siene Heilje. [Amen]

← Chapter 2 Jump to: Chapter 4 →