1 Thessalonians 5

Dutch Frisian

← Chapter 4 Jump to:

1Oba waut de Tiede en de Stunde betrafft, Breeda, ha jie daut nijch needijch, daut jünt jeschräwe woat.

2Dan jie weete selfst jenau, daut de Dach daut Harrn soo aus enn Deef enne Nacht tjeemt.

3Wann see saje: Fräd en Sejchaheit dan tjeemt een platzlijchet Vedoawe äwa ahn, aus de Jeburtswee äwa dee em aundren Ommstend; en see woare nijch wajchrane.

4Oba jie Breeda, send nijch enn Diestaness, daut jünt de Dach aus een Deef äwarausche kaun;

5dan jie aula send Säns vom Lijcht en Säns vom Dach; wie send nijch vonne Nacht noch vonne Diestaness.

6Aulsoo, loht ons nijch schlope aus dee äwaje, sonda loht ons woake en nijchta senne.

7Dan dee doa schlope, schlope de Nacht, en dee bedrunke send, send de Nacht bedrunke.

8Oba wie, dee vom Dach send, loht ons nijchta senne, aunjetrocke daut Brostschilt vom Gloowe en de Leew en aus Helm de Hopninj de Seelijchtjeit opp Radung.

9Dan Gott haft ons nijch tom Oaja bestemmt, sonda de Seelijchtjeit Radung too erlange derjch onsem Harrn Jesus Tjristus,

10dee fe ons jestorwe es, doamet, auf wie woake oda schlope, wie met am toopläwe.

11Doawäajen ermuntat eenaunda en erbüt eena däm aundren, aus jie uck doone.

12Oba wie bedde jünt, Breeda, aunertjannt dee sich unja jünt bemäje oabeide, en jünt väastohne em Harrn en jünt vemohne trajchtwiese,

13en ahn gauns huag too hoole, äwa aule Moot enn Leew, wäajen äarem Woatj. Hoolt Fräd unja jünt.

14Oba wie vemohne jünt, Breeda: Wiest dee nijch onntlijche trajcht, treest dee mootloose tjlienmootje, neemt jünt de Schwacke aun, siet langmootijch jeduldijch met aule.

15Seeht too, daut tjeena Beeset met Beesem irjentwäm vejelt, sonda sträwt aulatiet däm Gooden no jäajen eenaunda aus uck jäajen aula.

16Freit jünt auletiet;

17hoolt aun em Jebäd;

18enn aulem dankt, dan dit es de Welle Gottes en Tjristus Jesus fe jünt.

19Däm Jeist lascht nijch üt;

20Veacht nijch dee profeetische Räde;

21Oba aules proowt, daut Goode behoolt.

22Von jiedre Beese Jestault hoolt jünt wajch.

23Oba hee, de Gott vom Fräd, heilijcht jünt vollstendijch derjch en derjch; en jun gaunsa Jeist en Seel en Lief woare strofloos bewoat biem Aunkohme Wadakohme von onsem Harrn Jesus Tjristus.

24Trü es, dee jünt roopt, dee woat daut uck doone.

25Breeda, bäd uck fe ons.

26Jreest aule Breeda met däm heiljen Kuss.

27Etj beschwäa jünt biem Harrn, daut de Breef aule Breeda väajeläst woat.

28De Jnod von onsem Harrn Jesus es met jünt!

← Chapter 4 Jump to: