2 Corinthians 9

Dutch Frisian

← Chapter 8 Jump to: Chapter 10 →

1Dan waut däm Deenst fe de Heilje betrafft, soo esset fe mie onnneedijch, jünt too schriewe.

2Dan etj tjann jüne Wellijchtjeit, met dee etj mie jünthaulwe dän Matsedoonean jäjenäwa riem, daut Achaja aul toojoah reed jewäse es; en jun Iewa haft väle aundre aunjespornt.

3Oba etj ha de Breeda jeschetjt, doamet nijch ons Rieme äwa jünt enn disem Deel emsonst wea, omm daut jie, aus etj säd, reed send,

4doamet nijch fleijcht, wann de Matsedoonea met mie kohme en jünt nijch reed finje, wie beschämt woare, doamet etj nijch saj, jie, send enn diese Loag.

5Aulsoo hilt etj daut fe needijch, de Breeda too vemohne, daut see no jünt verrop reisde en verhäa reed too moake, jünen verhäa vesproaknen Säajen, doamet dee reed es, aus een Säajen, en nijch aus eene Jietsgow.

6Oba dit saj etj: Wäa spoasaum seit, woat uck spoasaum arnte, en wäa säajensritj seit, woat uck säajensritj arnte.

7Enn jiedra, woo hee sich enn sienem Hoate väajenohme haft, nijch üt Truarijchtjeit oda Dwank, dan eenen frindlijchen Jäwa haft Gott leef.

8Oba daut kaun Gott, jiedre Jnod enn jünt tom Äwafluss brinje, doamet, jie enn aulem auletiet jenüach Ütkohme ha en äwaritj send too jiedrem goodem Woatj;

9aus jeschräwe steit: „Hee haft ütjestreit, hee haft de Oame jejäft; siene Jerajchtijchtjeit blift enn Eewijchtjeit". {Ps.112,9}

10Oba dee däm Seimaun daut Sot hanrätje en Broot tom Äte, woat jünt Sot hanrätje en vemeare en woat wausse lohte de Frucht juna Jerajchtijchtjeit,

11enn däm jie enn aulem ritj jeworde send too aula Friejäwijchtjeit, dee derjch ons, Gott, Dankboatjeit bewirtjt.

12Dan de Besorjnis omm disen Deenst es nijch bloos eene Erfellung aun Mangel de Heilje, sonda es uck aus äwaritj derjch väl Dank aun jäjenäwa Gott;

13enn däm see derjch de Bewearug enn disem Deenst Gott veharlijche wäajen de Unjaordninj enn jünem Betjantniss too de froohe Botschoft von Tjristus en wäajen de Friejäwijchtjeit emm Aundeelnäme fe ahn en fe aula;

14woobie uck see em Jebäd fe jünt, dee sich no jünt bange, wäajen dee äwaritje Jnod Gottes aun jünt.

15Gott sie Dank fe siene onnütspräatjende Gow.

← Chapter 8 Jump to: Chapter 10 →