2 Samuel 1

Nuer Bible © Bible Society in South Sudan 1998,2012

Jump to: Chapter 2 →

1Kɛ kɔr lieth Thɔɔl. Cu Dee-bid luny jɔk juc ji̱ Ä-ma-lek, kä cuɛ te kä Dhik-lag kɛ ni̱n da̱ŋ rɛw.

2Kɛ diɔ̱ɔ̱k ni̱ni, nɛnɛ, cu raan ben wi̱i̱ Thɔɔl kɛ bieyni ti ci rɛ̈t kä ci wi̱cdɛ thia̱a̱ŋ kɛ tuäk. Kä mëë cɛ ben kä Dee-bid cuɛ rɔ goŋ luthä nhiamdɛ.

3Kä cu Dee-bid ɛ thiec i̱, “Kä bi̱i̱ni kä?” Kä cuɛ loc i̱, “Barä rɔ wi̱c ji̱ I-thɛ-rɛl.”

4Kä cu Dee-bid ɛ jiök i̱, “Kä ɛŋu mi ci tuɔɔk? Läri jɛ ɣä.” Kä cuɛ jɛ loc i̱, “Ci naath rɔ bar ko̱o̱r, kä ca nɛy ti ŋuan näk. Amäni Thɔɔl kɛnɛ gatdɛ ni Jo-na-than caakɛ näk bä.”

5Kä cu Dee-bid ɛ jiök i̱, “Ŋäci jɛ i̱di Thɔɔl kɛnɛ gatdɛ ni Jo-na-than caakɛ näk?”

6Kä cu ŋuɛ̈t in lär jɛ ruac ɛ jiök i̱, “Cɛ tuɔɔk cä wä pääm Gil-bwä. Cua̱ Thɔɔl nɛn cɛ rɔ nhiɛt kɛ mutdɛ. Kä ci thurbiɛɛli ji̱ tɛ̈r kɛnɛ jiöŋkööri ku thuŋ cop kä jɛ.

7Kä min cɛ jɔkdɛ liɛc, cuɛ ɣä nɛn, kä cuɛ ɣä cɔl. Kä cua̱ jɛ loc i̱, ‘Ɣän ɛn.’

8Kä cuɛ ɣä thiec i̱, ‘Ɛ ji̱n ŋa?’ Kä cua̱ jɛ loc i̱, ‘Ɛ ɣän raan Ä-ma-lek.’

9Kä cuɛ ɣä jiök i̱, ‘Bër wa̱a̱ nɛmɛ kä näk ɣä. Ɣän ta̱a̱ kɛ buɔ̱t mi di̱i̱t, kä cä thia̱k kɛ lia̱a̱.’

10Kä cua̱ ben kuthdɛ, kä cua̱ jɛ näk, kɛ ɣöö cä ŋa̱c ɛn ɣöö /cɛ bi tëk min cɛ tɛɛth. Kä cua̱ kum kuäärä ka̱n wi̱i̱dɛ kɛnɛ thiaw in te tetädɛ, kä cua̱kɛ nöŋ kuäärä ɛn wa̱a̱ nɛmɛ.”

11Kä cu Dee-bid bieynikɛ rɛ̈t kɛ pa̱r. Kä cu nɛy diaal tin te kɛɛl kɛ jɛ bieynikiɛn rɛ̈t bä pärkɛ.

12Cukɛ pa̱r kä cukɛ wiee kä /kenkɛ mi̱th amäni thiaŋ, kɛ kui̱ Thɔɔl kɛnɛ gatdɛ ni Jo-na-than, kɛ kui̱ nɛɛni Kuɔth Nhial, kɛ kui̱ ji̱ I-thɛ-rɛl, kɛ ɣöö ca kɛ näk ko̱o̱r.

13Kä cu Dee-bid ŋuɛ̈t in lär jɛ ruac thiec i̱, “Bi̱i̱ nikä?” Kä cuɛ loc i̱, “Ɛ ɣän raan Ä-ma-lek mi cieŋ rɛy wecdun.”

14Kä cu Dee-bid Ɛ jiök i̱, “Ɛŋu /keni dual ɔ kɛ näk kua̱r mi ca kuany ɛ Kuoth Nhial ɔ?”

15Kä cu Dee-bid ŋuɛ̈t kɛl cɔl kä cuɛ jɛ jiök i̱, “Wër näk ɛ!” Kä cuɛ jɛ näk.

16Kä cu Dee-bid ɛ jiök i̱, “Ɛ riɛmdu te ni wi̱i̱du, kɛ ɣöö ci rɔ lat ni kärɔa kɛ thokdu, wi̱i̱ i̱, ‘Cä kuäär in ci Kuoth Nhial ɛ kuany näk.’ ”

17Kä cu Dee-bid diit pärä ti̱ti̱ lat kɛ kui̱ Thɔɔl kɛnɛ Jo-na-than gatdɛ.

18Kä cuɛ wee ba Dit Bäärä nɛmɛ ŋi̱i̱c ni ji̱ Juda. Kä nɛnɛ cua gɔ̱a̱r rɛy buɔk Ya-car. Wee i̱,

19“Wi̱i̱ pa̱a̱m I-thɛ-rɛl, ci bööthkɔ li̱w thi̱n ce̱tkɛ muc! Ci wäth kööra tëth!

20/Cuarɛ jɛ lat kä Gɛ̈th, kä a /ci wä raar duɔ̱pni kä Ac-kɛ-lon. Kɛ ɣöö ci nyier nɛɛni ti /ka̱n cuɛl lo̱ckiɛn dhil gɔaa.

21“Kä ji̱n päm Gil-bwä, /ci mal lɛ thil nhial kiɛ thec, kä bɛ thil mi do̱ny thi̱n! Kɛ ɣöö ɛn wi̱ni /ka̱n ko̱t wääthä luɔ̱th, ka̱n ko̱t Thɔɔl yi̱r kɛ liɛɛth.

22“Kä bäär Jo-na-than cɛ näk, kä thɛp Thɔɔl kenɛ luny jɔk baaŋ. Kä riɛm nɛɛni tin ca näk, kɛnɛ thio̱o̱l wäthni ko̱o̱r.

23“Thɔɔl kɛnɛ Jo-na-than, nhɔakɛ kɛ ɛ ji̱ I-thɛ-rɛl! Tekɛ kɛɛl teekä, kä /ken lia̱a̱ kɛ da̱a̱k. Puɔlikɛn kä cuɔr, kä bumnikɛn kä lony.

24“Kä yɛn nyier I-thɛ-rɛl, parɛ Thɔɔl, mëë kum yɛ kɛ bieyni ti dit kökdiɛn, kä cɛ yɛ moc kɛ da̱a̱p kɛn pääm ti läŋ.

25“Ci wäth kööra tëth däär ko̱o̱r ce̱tkɛ muc! Jo-na-than cɛ li̱w wi̱i̱ pa̱a̱m.

26“Ɣän tiɛmä ji̱, Jo-na-than dämaar. Kɛ gɔɔydu kɛ ɣä. Kɛ nhökdu min di̱i̱t kɛ ɣä, cuɛ lëny ni nhök ciëk.

27“Ci wäth kööra tëth ci yio̱w ko̱o̱r cu thil luɔt.”

Jump to: Chapter 2 →