2 Samuel 24

Nuer Bible © Bible Society in South Sudan 1998,2012

← Chapter 23 Jump to:

1Kä cu kɛ̈c Kuɔth Nhial rɔ nyɔk kɛ ben kä ji̱ I-thɛ-rɛl, kä cuɛ Dee-bid kok, jiökɛ jɛ i̱, “Wër kuɛn ji̱ I-thɛ-rɛl, kɛnɛ ji̱ Juda.”

2Kä cu kuäär Yo-ab bo̱o̱th rɛ̈m min te kɛɛl kɛ jɛ jiök i̱, “Wiaa thuk duëli ji̱ I-thɛ-rɛl diaal, a känɛ ni kä Daan a wä ni kä Ber-cɛ-ba, kuɛn naath, kɛ ɣöö bä pekdiɛn ŋa̱c.”

3Kä cu Yo-ab kuäär loc i̱, “Ci Kuoth Nhial Kuothdu ji̱ I-thɛ-rɛl mal jak kä kur ti ŋuan nikɛn kä ta̱a̱diɛn ɛmɛ täämɛ, kä dëë kuäärä kɛ nɛn kɛ waŋdɛ. Kä kuɛ la ŋu go̱o̱r kuäärä ɣöö bɛ nɛmɛ la̱t ɔ?”

4Kä duundɛ ɣöö cua riet kua̱r luɔ̱th ɛ Yo-ab kɛnɛ bööth rɛ̈m. Kä cu Yo-ab kɛnɛ bööth rɛ̈m jiɛɛn kut kua̱r wa ji̱ I-thɛ-rɛl kuɛn.

5Cukɛ Jɔr-dɛn jiath kui̱c, kä cukɛ jɛ tok kä Ä-ro-er, wec in te rɛy lo̱o̱lä, a wä nikä Gad kɛnɛ Ya-dhɛr.

6Kä cukɛ ben kä Gil-yad, kɛnɛ Ka-dɛc muun Ɣɛ̈th. Kä cukɛ ben kä Daan, cukɛ jiɛɛn kä Daan wäkɛ kä Dhi-don.

7Kä cukɛ ben wi̱i̱ni Dhor tin buɔ̱m buɔ̱ɔ̱m, kɛnɛ wi̱i̱ ji̱ Iwi diaal, kɛ wi̱i̱ ji̱ Kɛ-naan. Kä cukɛ wä kä Nɛ-gɛb Juda kä Ber-cɛ-ba.

8Mëë cikɛ wi̱i̱ thuk kɛn diaal, cukɛ ben kä Jɛ-ru-tha-lɛm kɛ kɔr päthni da̱ŋ bäŋuan wi̱cdɛ ni̱n ti jiɛɛn da̱ŋ rɛw.

9Kä cu Yo-ab pek nath ka̱m kuäär. Kä I-thɛ-rɛl cu ka nɛy ti bathdɔɔri ti kur bädäk ti lua̱ŋ kɛ ko̱r, kä cu ji̱ Juda a nɛy ti bathdɔɔri ti kur dhieec ti lua̱ŋ kɛ ko̱r.

10Kä cu lɔc Dee-bid jiath min cɛ pek nath nɛn. Kä cuɛ Kuoth Nhial jiök i̱, “Cä duer ɛlɔ̱ŋ kɛ mi cä la̱t ɛ. Kä täämɛ lö Kuoth Nhial kua̱ läŋ ni ji̱, ku duer jäŋädu woc. Kɛ ɣöö cä la̱t ni duŋ dɔ̱ɔ̱rä.”

11Kä mëë ci Dee-bid rɔ jiɛc kɛ runwaŋ, cu ruac Kuɔth Nhial ben kä gök ni Gad ti̱et Dee-bid wëë i̱,

12“Wër jio̱kni Dee-bid i̱, ‘Nɛmɛ ɛ min ca lar ɛ Kuoth Nhial ɛn ɣöö cä ji̱ ka̱m diɔ̱k. Moc rɔ kɛ kɛl mi bä lät kä ji̱.’ ”

13Kä cu Gad ɛ ben la̱t Dee-bid, jio̱kɛ jɛ i̱, “Ɛ mi̱th bi ka̱n ɔ? Run bärɔw kɛ buɔth wi̱i̱du, kiɛ päth da̱ŋ diɔ̱k ti juɔckɛ ji̱ thi̱n ɛ ji̱ tɛ̈ru, kiɛ juey mi bɛc kɛ ni̱n da̱ŋ diɔ̱k wi̱i̱du? Täämɛ carkɛ, ɛ luɔc in mi̱th, bä luɔ̱c ram in jäk ɣä mɔ.”

14Kä cu Dee-bid Gad loc i̱, “Ta̱a̱ rikä mi di̱i̱t. Jak ni Kuoth Nhial kä duääckɔ ɛ jɛn, kɛ ɣöö tëë pälikä mi di̱i̱t. Kä /cu ɣä jak kä pɛn tetni nath.”

15Inɔ cu Kuoth Nhial juey jäk kä ji̱ I-thɛ-rɛl nikɛ runwaŋ cu mäni gua̱a̱th in ca lar. Kä cu nɛy tin ci li̱w a känɛ nikä Daan amäni Ber-cɛ-ba a nɛy ti bathdɔɔri ti jiɛɛn bärɔw.

16Kä min ɛ jääk Kuɔth i̱ bɛ Jɛ-ru-tha-lɛm däk, cu Kuɔth Nhial wi̱cdɛ car kɛ lätni kä mi jiäk, kä cuɛ jääk in näk naath jiök i̱, “Cɛ ro̱ŋ. Ku tetdu ka̱p cuɔ̱ŋ.” Kä ɛn jääk Kuɔth Nhial tëë cuŋä guäth kɔ̱mä bɛɛl wutdä mi cɔali Ä-raw-naa raan Yɛ-buth.

17Kä cu Dee-bid ruac kɛ Kuoth Nhial min cɛ jääk Kuɔth in näk naath nɛn, wëë i̱, “Ɣän cä duer, ɣän cä lät a jiäk. Kä kɛn det ti̱ti̱ cikɛ ŋu lɛl? Näk ni ɣä kɔnɛ dhɔr gua̱a̱r.”

18Kä cu Gad ben kä Dee-bid ɛn cäŋ ɛmɔ, kä cuɛ jɛ jiök i̱, “Wër täthni Kuoth Nhial yi̱k guäth kɔ̱mä bɛɛl wutdä mi cɔali Ä-raw-naa raan Yɛ-buth.”

19Kä cu Dee-bid wä ce̱tnikɛ riet Gad min ci Kuoth Nhial ɛ la̱r jɛ.

20Kä min ci Ä-raw-naa guic cuɛ kuäär nɛn kɛnɛ ji̱ kɔarɛ bäkɛ kä jɛ. Cu Ä-raw-naa kuäär wä goŋ luthä.

21Kä cuɛ wee i̱, “Ɛŋu ci Kuäärä ben kä ɣä mɔ?” Kä cu Dee-bid ɛ loc i̱, “Ɛ ɣöö bä gua̱a̱th kɔ̱mä bɛɛlku ben kɔk, kɛ ɣöö dëë Kuoth Nhial ta̱th yi̱k thi̱n, kä dɔ̱ŋ dëë juey cu jiɛɛn kä naath.”

22Kä cu Ä-raw-naa Dee-bid loc i̱, “Kuäärä käni mɔ guici gɔaa ɔ, kä tho̱p ni jɛ. Thääk ti̱n kɛ kui̱ mucä mi waŋkɛ, kä kɔ̱ɔ̱mni bɛɛl kɛnɛ gäkni thääkni bi ka jiɛɛn maac.

23Kɛn ti diaal ti̱ti̱ cä kɛ ka̱m kuäär.” Kä cu Ä-raw-naa kuäär jiök i̱, “Bi Kuoth Nhial ni Kuothdu ji̱ nhɔk.”

24Duundɛ ɣöö cu kuäär Ä-raw-naa loc i̱, “Ëëy, ɣän bä kɔk kä ji̱ kɛ yio̱w. Ɣän cä Kuoth Nhial Kuothdä bi thöp muc mi /ka̱n kɔk.” Inɔ cu Dee-bid gua̱a̱th kɔ̱mä bɛɛl kɛnɛ thääk kɔk kɛ yio̱w ti jiɛɛn dhieec.

25Kä cu Dee-bid Kuoth Nhial ta̱th yi̱k ɛn wi̱ni, kä cuɛ muc tin waŋkɛ kɛnɛ muc malä thöp. Kä cu Kuoth Nhial palɛ loc kɛ kui̱ muɔ̱n, kä cu juey cu cuɔ̱ŋ kä I-thɛ-rɛl.

← Chapter 23 Jump to: