Ezekiel 28

Nuer Bible © Bible Society in South Sudan 1998,2012

← Chapter 27 Jump to: Chapter 29 →

1Kä cu ruac Kuɔth Nhial ben kä ɣä wëë i̱,

2gat ran ruacni kɛ ruëëc Dhor, ɛn ɣöö mɛmɛ ɛ min lär Kuäär ni Kuoth Nhial ɛ jɛ wëë i̱, “Kɛ ɣöö ci rɔɔdu liak, kä ci ruac wi̱i̱ i̱, ‘Ɛ ɣän kuoth, ɣän cä nyuur wi̱i̱ kɔam kuthni tin te rɛy bar,’ kä ŋotdɛ ɛ ji̱n raan ɛ /ci la kuoth, a cäŋ pääri cärku kɛ cär kuɔth.

3Ɛ puc ji̱n pɛl ni ji̱n kä Da-ni-yel, thilɛ tɛ̱̈ɛ̱̈ mi kui̱ci.

4Kɛ pɛlu kɛnɛ ŋäc ŋɔaanidu, ci rɔɔdu duɔ̱l ria̱ŋ, ci rɔɔdu duɔ̱l da̱a̱p kɛnɛ ciɛk in bo̱r.

5Kä kɛ pɛlu min di̱i̱t kɛ lät ko̱kä, ji̱n ci ria̱ŋdu rep ɛlɔ̱ŋ, kä ci rɔ cu liak kɛ ŋuan kuakniku.”

6Kɛ kui̱ ɛmɔ ci Kuäär ni Kuoth mɛmɛ lar wëë i̱, “Kɛ ɣöö ci ca̱ru ca̱a̱t kɛ ca̱r kuɔth,

7kɛ kui̱ ɛmɔ, ɣän bä ji̱ nöŋ nɛy ti jur, nɛy tin jiäk ni kɛn kä döör diaal. Bikɛ thɛpnikiɛn guath kɛ lo̱k gɔɔyä palädu kä bikɛ wuɔ̱tdu ya̱r.

8Bikɛ ji̱ ɣɔak rɛy puɔ̱ɔ̱l, kä bi cu li̱w kɛ lia̱a̱ mi jiääk däär yiëër.

9Ji̱n bi ŋot ruaci i̱, ‘Ɛ ɣän kuoth,’ nhiam nɛɛni tin na̱kɛ ji̱, ci bia̱ ni raan a /ci mɔ a kuoth tetni nɛɛni tin ca ji̱ moc kɛ buɔ̱ɔ̱t?

10Ji̱n bi li̱w nikɛ lia̱a̱ raam mi /ci mɔ a raan I-thɛ-rɛl, tetni nɛɛni ti jur. kɛ ɣöö ruac ni ɣän, Kuäär ni Kuoth Nhial.”

11Kä cu ruac Kuɔth Nhial ben kä ɣä wëë i̱,

12gat ran kɛt dit pärä kɛ kui̱ kua̱r Dhor, läri jɛ ɣöö mɛmɛ larɛ Kuäär ni Kuoth Nhial wëë i̱, “Ci kɔŋ a nyuuth mi thuɔ̱k, mi thiäŋ kɛ pɛl, kä ro̱ŋ gɔɔydu.

13Ti rɛy E-dɛn in la kak Kuɔth. Kä ci rɔ kum kɛ pääm diaal tin di̱t kökdiɛn, min määl kɛnɛ mi tëë maan mi gɔaa, kɛ mi tok kɛnɛ mi gui̱i̱r kɛ mi tɔ̱c kɛnɛ mi riaw riaw, kɛ mi thiäŋ kɛnɛ mi dɛ̈ɛ̈r kɛ mi yian. Kuak pua̱a̱nydu diaal kɛ da̱a̱p cakɛ rialikä ni mëë /ka̱n ji̱ ni cak.

14Kä cua̱ ji̱ lɛy ala gääŋ kɛ kui̱ kä ɣöö bi naath gaŋ, kä curi cu te ni wi̱i̱ pa̱a̱mdä min rɛl rɔ, kä curi ja̱l kɛ rɛy päämni tin di̱t kökdiɛn.

15Kä curi thil bɛ̈l rɛy duɔ̱pniku nikɛ cäŋ ëë cakɛ ni ji̱, cu mäni mëë ca duer jek kä ji̱.

16Rɛy kuakni ko̱kädu tin ŋuan cu thia̱a̱ŋ ni ji̱n kɛ liak kä curi cu duer. Kä cua̱ ji̱ cu yäk ce̱tkɛ mi ci jiääk wi̱i̱ pa̱a̱mdä, kä cu jääk in gääŋ ji̱ tuɔ̱k raar rɛy päämni tin di̱t kökdiɛn.

17Ji̱n curi rɔ liak kɛ gɔɔydu, kä curi pɛlu nyon kɛ kui̱ wutädu. Inɔ, ɣän cä ji̱ yuɔr piny, kä cua̱ ji̱ lɛ̈p piny nhiam kua̱ri, kɛ ɣöö bikɛ ji̱ nɛn.

18Kä kɛ ŋuan dueeriku, kɛnɛ thil gɔɔyä lät ko̱kädu, curi lueek paliku ya̱r. Inɔ, cua̱ mac nööŋ raar rɛydu, kä cuɛ ji̱ waŋ, kä cua̱ ji̱ jakä ŋɛ̈th wi̱i̱ muɔ̱ɔ̱n, nhiam nɛɛni diaal tin ba ji̱ guic.

19Kä nɛy diaal tëë ŋa̱ckɛ ji̱ rɛy dööri cikɛ ga̱a̱c kɛ ji̱, kɛ ɣöö ci ben guutdä mi jiääk, kä bi thil amäni cäŋ kɛl.”

20Kä cu ruac Kuɔth Nhial ben kä ɣä i̱

21gat ran ri̱tni wi̱cdu peek Dhi-don, kä lat ruac go̱o̱kä mi jiääk kɛ kui̱dɛ,

22jio̱k ni jɛ Kuäär ni Kuoth Nhial wee i̱, “Ɣän gakä kɛ ji̱ ji̱n Dhi-don, kä ɣän bä liak jek rɛydu. Kä bikɛ jɛ ŋa̱c ɛn ɣöö ɛ ɣän Kuoth Nhial, mi wa̱a̱ luk wä lat rɛydɛ, kä bä gɔɔydä min rɛl rɔ nyoth rɛydɛ.

23Kɛ ɣöö bä jɛ jäkä juey, kä bä riɛm jakä lo̱ny rɛy duɔ̱pnikɛ. Kä bi naath li̱w rɛydɛ, kä ba jɛ mak pekni diaal. Kä bi kɛn ɛ cu ŋa̱c ɛn ɣöö ɛ ɣän Kuoth Nhial.”

24Kä cu Kuoth Nhial wee i̱, “Jɛn thok duëël I-thɛ-rɛl /cɛ rɔ bi nyɔk kɛ mi tëëkɛ ji̱ thieekä ti bakɛ ciɛŋ a jiäk ce̱tkɛ thil kɛnɛ kuiy. Kä bi kɛn ɛ cu ŋa̱c ɛn ɣöö ɛ ɣän Kuäär ni Kuoth Nhial.”

25Kä cu Kuäär ni Kuoth Nhial mɛmɛ lar wëë i̱, “Mi wa̱a̱ ji̱ thuɔk duëël I-thɛ-rɛl wä ruɔl guäth kɛl rɛy dööri diaal tëë cäkɛ kiɛth thi̱n, kä bä gɔɔydä min rɛl rɔ nyoth rɛydiɛn, nhiam dööri diaal, ɛn wanɔ bikɛ cu nyuur muun ëë cä ka̱m ja̱ŋdä ni Je-kɔb.

26Bikɛ cu cieŋ kɛ mal rɛydɛ, bikɛ ti̱ec la̱t kä bikɛ ka̱a̱k wal kɛ kui̱ kɔaŋ pith. Bikɛ cieŋ kɛ mal, mi wa̱a̱ ji̱ thieekädiɛn diaal tëë cikɛ ciɛŋ ɛ jiäk luk. Kä bi kɛn ɛ cu ŋa̱c ɛn ɣöö ɛ ɣän Kuoth Nhial ni Kuothdiɛn.”

← Chapter 27 Jump to: Chapter 29 →