Ezekiel 30

Nuer Bible © Bible Society in South Sudan 1998,2012

← Chapter 29 Jump to: Chapter 31 →

1Kä cu ruac Kuɔth Nhial ben kä ɣä i̱,

2gat ran lat ruac go̱o̱kä, larɛ ɛn ɣöö mɛmɛ laarɛ Kuäär ni Kuoth Nhial wëë i̱, “Wieeɛ i̱, ‘Cäŋ däkä a bëëni!’

3Kɛ ɣöö ci cäŋ thia̱k, ci cäŋ luɔ̱k Kuɔth Nhial thia̱k. Bɛ la cäŋ mi tekɛ pua̱r, ɛ gua̱a̱th mi bi da̱k kɛ döör.

4Bi ko̱r ben kä I-jëp, kä bɛ la cäŋ rikä kä Kuc, mi waa ji̱ I-jëp wä näk, kä ba kuakɛ diaal naŋ, kä ba jɛ ba̱ny piny a cɛ da̱k.

5Kä Kuc kɛnɛ Put kɛ Lud kɛ wi̱i̱ Ä-rab-ya diaal kɛ Lib-ya amäni nɛy tin ca mat ruac la̱t kɛ I-jëp ba kɛn diaal näk ko̱o̱r.”

6Kä cu Kuoth Nhial mɛmɛ lar wëë i̱, “Nɛy tɔ̱ ba I-jëp luäk tɔ̱ bakɛ näk. Kä bi liak bumädɛ kɛɛliw thil. A känɛ nikä Mig-dol a wä nikä Thi-nim, ba kɛn diaal näk rɛydɛ kɛ ko̱r, ruac ni ɣän Kuäär ni Kuoth Nhial.

7Bakɛ päl ni baaŋ ce̱tkɛ wi̱i̱ tin kɔ̱ŋ, tin ca päl ni baaŋ a thil naath, kä bi ciëëŋkɛ te ni baaŋ, ce̱tkɛ ciëëŋ tin kɔ̱ŋ tin te ni baaŋ.

8Kä bikɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ I-jëp wä tɔ̱a̱ŋ kɛ mac, mi wa̱a̱ nɛy diaal tin lua̱kɛ jɛ wä dup.

9“Kɛ jɛn cäŋ ɛmɔ, bi ja̱a̱k jiɛɛn kä ɣä kɛ babuuri, kɛ ɣöö bikɛ Kuc in cieŋ malä wä jakä dual. Bikɛ dual kɛ cäŋ in wa I-jëp wä tɔ̱ŋ!”

10Kä cu Kuäär ni Kuoth Nhial wee i̱, “Ɣän bä ria̱ŋ I-jëp moc kɛ pek, kɛ tet Kua̱r Bɛ̈-bi-lɔn ni Nɛ-bu-kad-nɛ-dhar.

11Jɛn kɛnɛ nɛɛkɛ tin te kɛɛl kɛ jɛ, kɛn nɛy tin bɛc ni kɛn rɛy dööri, bikɛ ben ba wec ben däk. Kä bikɛ ko̱r ben tɛr kɛ I-jëp, bikɛ wec thiäŋ kɛ nɛy tin ca näk.

12Ɣän bä yiër jakä do̱n, kä bä wec cu kɔak kɛ tet nɛɛni tin la̱tkɛ jiäk. Kä bä mun jakä pa̱lkɛ, kɛnɛ tin diaal tin te thi̱n kɛ tet juri. Ɛ ɣän Kuoth Nhial lat jɛ mɔ.”

13Kä cu Kuäär ni Kuoth Nhial wee i̱, “Ɣän bä kuth guäyni däk, kä bä pua̱ny tin ca la̱t kä Mɛm-pith däk. Kä bɛ cu thil ram mi bi lɛ ruëc kä I-jëp. Kä bä mun I-jëp cu moc kɛ dual.

14Ɣän bä Path-roth jakä day, kä bä Dho-an waŋ, kä bä The-bɛth luk.

15Ɣän bä ŋɛ̈ɛ̈nydä jakä wä kä Thin, ɛn min la buɔ̱m I-jëp, kä bä ji̱ The-bɛth tin ŋuan ŋuɔk raar.

16Ɣän bä I-jëp tɔ̱a̱ŋ kɛ mac, kä bi Thin te rikä mi di̱i̱t. Kä ba päny The-bɛth da̱k piny, kä bi Mɛm-pith te rik ni ciaŋ.

17Kä ba ŋuɛ̈tni Ɔn kɛnɛ Pi-bɛ-thɛth näk ko̱o̱r. Kä ba duɔth nɛɛni tin kɔ̱ŋ naŋ ala pɛ̈ɛ̈c.

18Kä bi cäŋ a muuth kä Ta-pa-neth, mi wa̱a̱ buɔ̱m I-jëp wä woc, mi wa̱a̱ buɔ̱m liakädɛ moc kɛ pek. Kä ba wec kum ɛ pua̱a̱r, kä ba ji̱ wi̱i̱nikɛ naŋ ala pɛ̈ɛ̈c.

19Ɛ jɛn luk in bä luk ni I-jëp ɛnɔ. Ɛ jɛn bikɛn ɛ cu ŋa̱c ɛn ɣöö ɛ ɣän Kuoth Nhial.”

20Kɛ cäŋ kä bärɔw kä pay in jio̱l, kɛ wälkɛl runi mëë ta̱kɔ pɛɛcä, cu ruac Kuɔth Nhial ben kä ɣä wëë i̱,

21“Gat ran, ɣän cä wuɔ̱ɔ̱k kua̱r I-jëp ni Pɛro to̱l. Kä thilɛ ram mi ci jɛ yiɛn kɛ ɣöö bɛ gɔaa, kiɛ ram mi ci jɛ rith kɛ yieen buɔ̱ɔ̱tni, kɛ ɣöö bɛ buɔ̱m a bɛ thɛp luäŋ kɛ ka̱p ko̱o̱r.

22Kɛ kui̱ ɛmɔ ci Kuäär ni Kuoth Nhial mɛmɛ lar ɛn ɣöö ɣän gakä kɛ kuäär I-jëp ni Pɛro, bä wuɔ̱ɔ̱kɛ töl. Ɛn wuɔ̱ɔ̱k in gɔaa kɛnɛ wuɔ̱ɔ̱k ëë cä kɔŋ to̱l kɛ nhiam. Kä bä thɛp jakä pɛn tetädɛ.

23Ɣän bä ji̱ I-jëp cu riaw rɛy dööri diaal. Kä bäkɛ kiɛth rɛy ɣɔaa kɛɛliw.

24Ɣän bä wuɔ̱ɔ̱k kua̱r Bɛ̈-bi-lɔn jakä bum, kä bä thɛpdä la̱th tetädɛ, duundɛ ɣöö bä wuɔ̱ɔ̱k Pɛro töl. Kä bɛ cu wiee nhiam kua̱r Bɛ̈-bi-lɔn kɛ wiee raam mi ca moc kɛ buɔ̱t mi bɛc ɛlɔ̱ŋ.

25Bä kua̱r Bɛ̈-bi-lɔn moc kɛ buɔ̱m, duundɛ ɣöö bi Pɛro thil buɔ̱m. Kä bikɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ thɛpdä wä la̱th tetdä kua̱r Bɛ̈-bi-lɔn. Kä bɛ jɛ tɛr ko̱r kɛ mun I-jëp.

26Ɣän bä ji̱ I-jëp diaal cu riaw kä rɛy dööri, kä bäkɛ kiɛth rɛy wi̱i̱ni diaal. Kä bikɛ jɛ cu ŋa̱c ɛn ɣöö ɛ ɣän Kuoth Nhial.”

← Chapter 29 Jump to: Chapter 31 →