Habakkuk 1

Nuer Bible © Bible Society in South Sudan 1998,2012

Jump to: Chapter 2 →

1Ruac Kuɔth ëë ci ben kä gök ni Ɣä-bɛ̈-kuk.

2A bi ku mäni nɛy, lö Kuoth Nhial, bä ji̱ thiec ɔ kɛ luäk, kä /ci ɣä liŋ? Kiɛ cɔalä ji̱ kɛ, “Ko̱r!” Kä /ci ɣä kän?

3Ɛŋu jak i̱ ɣä kä guɛcä jiäk kɛnɛ dueer ɔ? Kä te da̱k kɛnɛ ko̱r ni nhiamdä. Kä te ko̱o̱ri kɛnɛ gak gaakni gua̱th ni diaal.

4Kɛ kui̱c ɛmɔ ci ŋuɔ̱t kɛnɛ thuɔ̱k cu thil. Kɛ ɣöö ca ji̱ cuŋni go̱l ɛ ji̱ dueeri, kä /ca thuɔ̱k lɛ la̱t.

5Kä cu Kuoth ɛ loc i̱ guic döör, bi ga̱a̱c kɛ mɔ bi tuɔɔk kä kɛ mɔ. Ɣän bäkɛ lät kä mi /ci bi ŋäth, mi wa̱a̱ jɛ wä la̱r ji̱.

6Ɣän ka̱mä ji̱ wec Bɛ̈-bi-lɔn buɔ̱m, nɛy tin bɛ̈c bɛ̈ɛ̈c kä luɔ̱thkɛ, nɛy tin bä ni peek ɣɔaa kɛ ɣöö ba mun ben mac.

7Kɛ nɛy ti jakɛ naath kä dual, kä pua̱nykiɛn kɛ kɛn la ŋuɔ̱t tɔ̱ kɛ luthdiɛn.

8Kä puɔl ni jiöŋköörikiɛn kä kuac, kä luɔ̱thkɛ nikɛ kä ya̱a̱k wa̱r. Kä ji̱ jio̱o̱knikiɛn bäkɛ ni nɔ̱nä, kä wurkɛ kɛ pɛ̈th. Ri̱i̱ŋkɛ ce̱tnikɛ cuɔɔr mi ban mi̱eth.

9Bäkɛ kɛ ko̱r kɛn diaal, dual nɛy diaal kɛ bendiɛn. Kä ŋuan pɛ̈ɛ̈ckiɛn ce̱tkɛ liɛt.

10Kɛn yɔaŋkɛ kua̱r, kä dɔl kɛn ruëëc. Kä /ci wi̱i̱ tin buɔ̱m buɔ̱ɔ̱m kɛ dhal la kɛn kɛ a täth ko̱o̱tni, kä ba jɛ cu käp.

11Kɛn la bäkɛ ce̱tkɛ jiɔam kä wäkɛ kɛ wä, nɛy tin buɔ̱mdiɛn ɛ kuothdiɛn!

12Kä ciɛ ji̱n ɛn nëë te thi̱n ni wal inu lö Kuoth Nhial, ni Kuothdä min Rɛl Gɔɔydɛ rɔ? A kɔ /cakɔ li̱w. Kä lö Kuoth Nhial, ci ji̱ Bɛ̈-bi-lɔn kuany kɛ ɣöö ba naath kuk. Kä cikɛ mɛk kɛ ɣöö /ba naath duäc, lö Päm teekä.

13Kä waŋdu la guicɛ mi jiäk, kä ci lät kä ti jiäk nhɔk. Kɛ kui̱ ɛmɔ ɛŋu ku nɛy ti thil ŋa̱th lɛ päl ɔ? Kä ɛŋu bitdi mɔ guäth in ciɛŋ ji̱ nyuɔɔni ji̱ cuŋni a jiäk ɔ?

14Kä ci naath cak ce̱tkɛ rɛc yiëër ce̱tkɛ kɔ̱a̱m tin thil ruëëc.

15Ci gua̱n tɛ̈r kɛn diaal nööŋ kɛ gɔnɛ, cɛ kɛ yiööc raar kɛ cambakdɛ, ci lɔcdɛ tɛɛth kɛ ɣöö cɛ kɛ ma̱a̱t kɛ buɔyɛdɛ.

16Kɛ kui̱c ɛmɔ cɛ cambakdɛ thöp muc, cɛ buɔyɛdɛ wa̱ŋ wal tin kɔp. Kɛ kui̱diɛn cɛ tekɛ tëk mi gɔaa, tëë kɛ mi̱eth mi ro̱ŋ.

17Kä jɛn bɛ cambakdɛ la̱a̱t, a bɛ naath däk a thil pälikä?

Jump to: Chapter 2 →