Habakkuk 3

Nuer Bible © Bible Society in South Sudan 1998,2012

← Chapter 2 Jump to:

1Nɛmɛ ɛ pal go̱kä ni Ɣä-bɛ̈-kuk mëë palɛ kɛ thuɔmni.

2Aɣ Kuoth Nhial, ɣän cä kɛ̈kdu liŋ, kä ɣän cä dual kɛ lätku lö Kuoth Nhial. Kä nyɔk kɛ kɛ lätni rɛy ni̱ni kɔ, jak nikɛ kä ŋa̱ckɛ rɛyda kä a pälidu ikä te thi̱n a cäŋ gaki.

3Kuoth bëë wi̱c Te-man, ɛn min Rɛl Gɔɔydɛ rɔ bëë Pääm Pa-ran. Kum wuɔ̱tdɛ pua̱a̱r, kä thiääŋ liakdɛ wi̱c muɔ̱ɔ̱n.

4Kä riaw riaawdɛ ce̱tdɛ nikɛ buay ca̱ŋ, kä te buay tetkädɛ, guäth in te buɔ̱mdɛ thi̱n.

5Te juey nhiamdɛ, kä guɔ̱ɔ̱rkɛ jɛ ɛ liaw.

6Mi cɛ cuɔ̱ŋ lathɛ piny, kä mi cɛ liɛɛc dual döör. Kä pääm tëë wal, ci kɛ thia̱y piny. Kä dupkɛ thilɛ kɛ pek.

7Kä cä kɛmɛni ji̱ Kuc nɛn tekɛ rikä, kä gua̱th ciɛŋni ji̱ Mid-yan tekɛ cucä.

8A ku gaak kɛ yiër inu, lö Kuoth Nhial? Kiɛ gaki kɛ tɔ̱a̱ri, min gɛɛri thurbiɛɛliku, min kɔtdi jiöŋkööriku tin la joci naath?

9Kä curi bääru ka̱m raar rɛy go̱kädɛ, kä curi kuen kueeni ti ŋuan cɔl. Kä curi piny rɛ̈t kɛ yiër.

10Mëë ci pääm ji̱ nɛn cukɛ ka̱c, kä cu pi̱w wuɔ̱w min dɛmkɛ nhial. Kä cu pi̱ piɛny muɔ̱ɔ̱n wuɔ̱w, cukɛ tekɛ muaŋ mi di̱i̱t.

11Kä cu cäŋ kɛnɛ pay cuɔ̱ŋ gua̱thnikiɛn kɛ räŋ bäärädu, kɛnɛ riaw riaaw muɔ̱tdu.

12Curi ja̱l wi̱i̱ muɔ̱ɔ̱n kɛ ŋɛ̈ɛ̈ny, kä curi döör nor kɛ gakdu.

13Kä curi ben kɛ ɣöö bi nɛɛku ben kän, kɛ ɣöö bi kuääru min ci mɛk kän. Kä curi bo̱o̱th nɛɛni tin ji̱ dueeri dup, curi jɛ riac ni ciöknikɛ cu mäni wi̱cdɛ.

14Kä curi wi̱cdɛ yiɛth kɛ mutdɛ, mëë ci rɛmdɛ ben ce̱tkɛ thul, ba nɛy ben riaw kä dɔɔr, liakɛ rɔ̱ ce̱tkɛ nɛy ti ci can näk kɛ tɛ̱̈ɛ̱̈.

15Curi yiër jäl kɛ jiöŋkööriku ɛn buɔ̱n pi̱i̱ni ti ŋuan.

16Ɣän mëë cä liŋ, cu lɔcdä jiath, cuɛ lɛpdä lath kɛ ruac, kä cuɛ cɔ̱wkä ko̱k kä cuɛ ciökä lath, /cä ja̱l luäŋ. Ɣän bä cäŋ däkä min bi ben lip bitkä min bä kä nɛy tin ca wecda mac.

17A cäŋ ni mɔ /ken jiath ŋɔ̱a̱p kuer ɔ, kä thilɛ ŋɔa̱a̱r dɛy, kä /ken jiath Ɔ-lip kuer kä /ken ka̱a̱k ciɛk, kä thil dët ti te rɛy käli kä thilɛ ɣɔ̱k lueekni,

18ŋotdɛ ɣän bä Kuoth Nhial la̱t tɛ̈th lɔaac, bi lɔcdä tɛɛth kɛ Kuoth känädä.

19Kɛ ɣöö Kuäär ni Kuoth ɛ buɔ̱mdä, cɛ ciökä jak kä ce̱tkɛ ciök kɛwä, cɛ ɣä jak kä wä wuɔ̱thni päämni. Kɛ ɣöö bo̱o̱th pua̱a̱t thuɔmni, tëë kɛ thuɔmnikä.

← Chapter 2 Jump to: