Judges 4

Nuer Bible © Bible Society in South Sudan 1998,2012

← Chapter 3 Jump to: Chapter 5 →

1Cu ji̱ I-thɛ-rɛl jiäk lɛni nyɔk kɛ lätni nhiam Kuɔth Nhial, mëë ci E-ɣud li̱w.

2Kä cu Kuoth Nhial kɛ la̱th tetdä Ya-bin kuäär Kɛ-naan min ruaac Ɣa-dhor. Kä bo̱o̱th rɛmdɛ mɔ Ci-cɛ-ra min ciɛŋ ni Ɣäro-cɛth-ɣa-go-yim.

3Ɛ jɛn cu ji̱ I-thɛ-rɛl wiee nhiam Kuɔth Nhial görkɛ luäk. Kɛ ɣöö te kuäär ɛ mɔ kɛ thurbiɛɛli ko̱o̱r ti kur bäŋuan, cuɛ ji̱ I-thɛ-rɛl ciɛŋ a bɛc kɛ run ti jiɛn da̱ŋ rɛw.

4/Täämɛ Dɛ-bo-ra ɛ ciek mi gök Kuɔth, kä cɔalkɛ cɔwdɛ i̱ Lap-pi-doth, kä ɛ jɛn ruaac I-thɛ-rɛl ɔ ɛn guäth ɛmɔ.

5Kä jɛn la nyuurɛ thäri nööri Dɛ-bo-ra kam Rama kɛnɛ Beth-ɛl wi̱i̱ni päämni Ɛ-pa-rim. Kä cu ji̱ I-thɛ-rɛl guk ruac ben go̱r kä jɛ.

6Cuɛ Ba-rak gat Ä-bi-no-am jäk kä raan kä Kɛ-dɛc wec Nap-ta-li. Kä cuɛ wee jiökɛ jɛ i̱, “Ci Kuoth Nhial Kuoth I-thɛ-rɛl, ji̱ jiök i̱, ‘Wër, käni nɛy ti bathdɔɔri ti jiath kɛl thok duëël Nap-ta-li kɛnɛ thok duëël Dhɛ-bu-lun, wiaa matdɛ rɔ pääm Ta-bor.

7Kä bä Ci-cɛ-ra, bo̱o̱th rɛmni Ya-bin in di̱i̱t jak kä wä raar, kä bɛ röm kɛ yɛ rɛy tɔ̱ɔ̱rä Ki-con kɛ thurbiɛɛlikɛ. Kä bä ji̱ ka̱m jucdiɛn.’ ”

8Kä cu Ba-rak ɛ loc i̱, “Mi bi wä kɛɛl kɛ ɣä, ɣän bä wä. Kä mi /ci bi wä kɛɛl kɛ ɣä, ɣän /cä bi wä.”

9Kä cu Dɛ-bo-ra wee, “Ɛ puc ɣän bä wä kɛɛl kɛ ji̱. Kɛ ɣöö ɛn duɔ̱ɔ̱p in bi ji̱ naŋ /ca bi liak ni ji̱, kɛ ɣöö Kuoth Nhial bɛ Ci-cɛ-ra la̱th tetdä ciek.” Ɛ jɛn cu Dɛ-bo-ra wä kɛnɛ Ba-rak kä Kɛ-dɛc.

10Kä cu Ba-rak Dhɛ-bu-lun kɛnɛ Nap-ta-li cɔal kä Kɛ-dɛc. Kä cu wutni ti bathdɔɔri da̱ŋ wäl jɛ guɔ̱ɔ̱r. Kä cu Dɛ-bo-ra wä kɛɛl kɛ jɛ.

11Kä ci Ɣɛ-bɛr raan Kɛɛn kuɛ̈ɛ̈ Ɣo-bab gua̱nthu Muthɛ rɔ koc kä ji̱ Kɛɛn, cɛ wä pua̱t ni kä Dhä-nä-nim thaar jiaath in di̱i̱t thiekä Kɛ-dɛc.

12Mëë ca Ci-cɛ-ra jiök i̱ ci Ba-rak gat Ä-bi-no-am wä wi̱i̱ pa̱a̱m Ta-bor,

13cuɛ thurbiɛɛli köörɛ ti kur bäŋuan ciööl raar kɛnɛ nɛy diaal tëë te kɛɛl kɛ jɛ, kä Ɣäro-cɛth-ɣa-go-yim wä kɛ rɛy tɔ̱ɔ̱rä Kir Ki-con.

14Cu Dɛ-bo-ra Ba-rak jiök i̱, “Jiɛc rɔ! Ɛ jɛn cäŋ in ci Kuoth Nhial Ci-cɛ-ra la̱th tetädu thi̱n ɛnɛ. Bi Kuoth Nhial ji̱ ka̱m jucdɛ” Cu Ba-rak jiɛɛn kɛnɛ nɛy ti bathdɔɔri da̱ŋ wäl wi̱i̱ pa̱a̱m Ta-bor.

15Kä cu Kuoth Nhial Ci-cɛ-ra jak kä yi̱c kɛnɛ nɛɛkɛ kɛ thurbiɛɛlikɛ diaal min cakɛ mak ɛ Ba-rak. Kä cu Ci-cɛ-ra käny piny rɛy thurbiɛɛlɛ kä cuɛ rɔ bar kɛ ciökɛ.

16Cu Ba-rak kɛ joc amäni Ɣäro-cɛth-ɣa-go-yim, cua rɛm Ci-cɛ-ra näk kɛn diaal. A cuɛ thil ram mi cu duɔth kɛ tëk.

17Duundɛ ɣöö ci Ci-cɛ-ra rɔ bar, cuɛ wä kä ciek Ɣɛ-bɛr, raan Kɛɛn mi cɔali Ya-el kɛ ciökɛ, kɛ ɣöö gɔaa kam Ya-bin kuäär Ɣa-dhor kɛnɛ dhɔr Ɣɛ-bɛr raan Kɛɛn.

18Cu Ya-el ben raar bëë Ci-cɛ-ra ben lor, kä cuɛ jiök i̱, “Ri̱i̱tni rɔ. Kuäärä, ti̱cni rɔ ɣä. Cu dual.” Ɛ jɛn cuɛ rɔ riet jɛ kä kɛmɛ, kä cuɛ jɛ kuɔ̱m piny.

19Kä cuɛ Ya-el jiök i̱, “Mi nhɔk i̱ jɛ, malä moc pi̱ ti maathä. Näk rɛw ɣä.” Ɛ Jɛn cuɛ jɛ moc cak kä cuɛ nyɔk kɛ kum piny.

20Kä cuɛ Ya-el nyɔk kɛ jio̱k i̱, “Cuŋni thok kɛmɛkä, mi wëë tekɛ ram thiec ji̱ i̱, ‘Tëë kɛ ram mia̱a̱ wa̱nɛ?’ Wër i̱, ‘Eey.’ ”

21Duundɛ ɣöö cu Ya-el ciek Ɣɛ-bɛr lo̱c kɛmɛkä ka̱n, kä cuɛ puɔ̱ɔ̱t ka̱n kä cuɛ wä kä jɛ a määth cuɛ lo̱c pua̱t raŋädɛ, min cɛ niɛɛn kɛ ɣöö cɛ cuuc, amäni min cɛ cop ni piny. Cuɛ cu li̱w.

22Kä nɛnɛ kɛ ɣöö guur Ba-rak Ci-cɛ-ra, cu Ya-el Ba-rak ben päth, kä cuɛ jiök i̱, “Bër ɛ ji̱ ba̱a̱ ben nyuɔ̱th ram in go̱o̱ri.” Cu Ba-rak wä rɛy kɛmɛkä ciek. Cuɛ Ci-cɛ-ra jek tɔ̱ɔ̱cä thi̱n cɛ li̱w a te lo̱c kɛmɛkä ni raŋdɛ.

23Ɛn cäŋ ɛ mɔ cu Kuoth Ya-bin kuäär Kɛ-naan ka̱m ji̱ I-thɛ-rɛl.

24Cukɛ Ya-bin kuäär Kɛ-naan kɛnɛ nɛɛkɛ ciɛŋ a jiäk ɛlɔ̱ŋ amäni mëë cikɛ kɛ däk.

← Chapter 3 Jump to: Chapter 5 →