Leviticus 1

Nuer Bible © Bible Society in South Sudan 1998,2012

Jump to: Chapter 2 →

1Cu Kuoth Nhial Muthɛ cɔl, kä cuɛ ruac kɛ jɛ nhiam kɛmɛkä ro̱mä kɛ Kuoth Nhial, laarɛ jɛ,

2jiök ni ji̱ I-thɛ-rɛl i̱, “Mi wä raan mucdɛ wä thöp ɣän Kuoth Nhial kä yɛ, a jɛ nööŋɛ rɛy ɣɔ̱ɔ̱kɛ kiɛ deetkɛ.

3“Kä mi wee nööŋ ni luur mi waŋkɛ rɛy ɣɔ̱ɔ̱kɛ, a jɛ nööŋ ni ruath tha̱a̱k mi thil diw kɛ ɣöö dëë Kuoth Nhial ɛ cu nhɔk.

4Kä a jɛ bukɛ ɛn mucɔ waŋ ɛ mɔ, kɛ ɣöö dëë Kuoth Nhial ɛ cu nhɔk kä jɛ, ala muc mi luɛlɛ ni rɔ.

5Kä bɛ jɛ cu näk ɛn wani, kä bi gaat Ä-ron riɛmdɛ ŋuëŋ Kuoth, kä bikɛ jɛ cu kiɛth kui̱ni wi̱ni känyä diaal min te thok kɛmɛkä ro̱mä kɛ Kuoth Nhial.

6Kä bɛ le̱y ɛmɔ cu jiaŋ, kä bɛ jɛ cu ŋuɔ̱k ala muc mi waŋkɛ.

7Kä bi bööth palä ni gaat Ä-ron mac jiɛɛn rialikä wi̱i̱ yi̱kä.

8Kä bikɛ wi̱c, kɛ thiɔl kɛ ri̱ŋ la̱th maac wi̱i̱ yi̱kä.

9Kä ɛn ram min thöp muc bɛ jia̱cdɛ kɛ kockɛ lak, kä bi bööth palä kɛ waŋ kɛn diaal wi̱i̱ yi̱kä ala muc mi waŋ, bi ŋuänydɛ cua mi gɔaa kä Kuoth Nhial.

10“Kä mi wä muc ran a kɛl kä detkɛ, ɛ rɔam kiɛ ɛ böw, ala thäk dɛ̈ɛ̈l mi thil diw.

11Kä a jɛ näkɛ kui̱c caam yi̱kä nhiam Kuɔth Nhial, kä bi gaat Ä-ron tin bööth palä riɛmdɛ kiɛth kui̱ni, yi̱kä da̱ŋ ŋuaan.

12Kä bi ram in thöp muc mucdɛ ŋuɔ̱k kɛ li̱w, wi̱cdɛ kɛnɛ kockɛ, bi bööth palä kɛ car maac jiɛɛn wi̱i̱ yi̱kä.

13Kä bɛ jia̱c kɛnɛ koc dɛ̈ɛ̈l lak, kä bi bööth palä jɛ thöp Kuoth Nhial, kä bɛ jɛ cu waŋ kɛ li̱w wi̱i̱ yi̱kä, kä bi ŋuänydɛ cua̱ mi gɔaa kä Kuoth Nhial.

14“Kä ram mi wä mucdɛ wa̱a̱ muc diɛɛt mi waŋ, ala guuk kiɛ dɔw kunöör.

15Kä bi bööth palä jɛ ben thöp wi̱i̱ yi̱kä kä bɛ ŋuäkdɛ dan kä bɛ jɛ cu waŋ wi̱i̱ yi̱kä, kä bɛ riɛmdɛ nhiac pëkni yi̱kä da̱ŋ ŋuaan.

16Kä bɛ jicdɛ kɛnɛ juätkɛ wä yiäk nhiam yi̱kä gua̱th in la ŋɛ̈th a di̱erkɛ thi̱n.

17Kä a bak jɛ däär, kä a /ci jɛ bak piny, kä bɛ cu waŋ kɛ li̱w wi̱i̱ yi̱kä ala muc mi waŋkɛ. Kä bi ŋuänydɛ cua̱ mi gɔaa kä Kuoth Nhial.”

Jump to: Chapter 2 →