Leviticus 19

Nuer Bible © Bible Society in South Sudan 1998,2012

← Chapter 18 Jump to: Chapter 20 →

1Kä Cu Kuoth Nhial Muthɛ jiök i̱,

2“Ruac nikɛ duɔl ji̱ I-thɛ-rɛl diaal, jiök nikɛ i̱ ɛ gɔɔydun rɛl rɔ, kɛ ɣöö ɣän Kuoth Nhial Kuothdun rɛl gɔɔydä rɔ.

3Kä yɛ ɛ raan luth man kɛnɛ gua̱n, kä tiɛtdɛ cäŋdä, bärɔw ni̱ni. Ɛ ɣän Kuoth Nhial Kuothdun.

4Kä /cuarɛ rɔ rit kuth guäyni kä /cuarɛ rɔ täth kuth ciikni. Ɛ ɣän Kuoth Nhial Kuothdun.

5“Kä mi wi̱i̱ muc malädu nöŋ Kuoth Nhial, thöp ni jɛ kɛ duɔ̱p in dëë nhɔk ni jɛ kä ji̱.

6Kä ba jɛ cam ɛn cäŋ in thöpɛ ni jɛ amäni cäŋ in rɛwdɛ. Mi wec tekɛ mi ci duɔth kɛ cäŋ in diɔ̱ɔ̱kdiɛn ba jɛ waŋ.

7Kä mi tëë kɛ mi wa cam thi̱n kɛ cäŋ in diɔ̱ɔ̱kdiɛn, cɛ jiääk ɛn muc ɛmɔ, /ca bi lɛ nhɔk.

8Kä ɛn ram ɔ ci jɛ cam ɔ bariɛkdɛ, kɛ ɣöö cɛ min ca le̱y Kuoth Nhial ya̱r, ba jɛ tuɔ̱k raar ɛn ram ɛ mɔ rɛy nɛɛnikɛ.

9“Kä mi wä yɛn bɛl ka̱a̱nikun wä ŋɛ̈r, /cuarɛ cup gëëkni kä /cuarɛ kuaanykiɛn kuany.

10Kä /cu loc rɛy kak walku kɛ kui̱ kɔaŋ kɛ ɣöö bi tin ci rueec wä kuany, kiɛ bi tin ci pɛ̈n wä ma̱a̱t, bäny nikɛ can kɛnɛ nɛy tin guä. Ɛ ɣän Kuoth Nhial Kuothdu.

11“/Cu kue̱l kä /cu kac kac kä /cuarɛ rɔ kaŋ.

12/Cu rɔ yac kɛ ciötdä kɛ kac bi ciöt Kuɔthdu yär. Ɛ ɣän Kuoth Nhial.

13“/Cu gua̱n thiekädu mac kiɛ kual. Kä /cu mi ci kɔk ni raan bi jak kä ni̱n kɛ ji̱ mäni runwaŋ.

14/Cu ram mi miŋ kue̱th kä /cu päm läth nhiam cɔar, luthni Kuothdu. Ɛ ɣän Kuoth Nhial.

15“/Cuarɛ thuɔ̱k pen rɛy luɔ̱ɔ̱knikun. /Cuarɛ can mac kä /cuarɛ dual kɛ nɛy tin riäŋ, luk gua̱n thiekädu kɛ thuɔ̱k.

16/Cu kac lat rɛy nɛɛniku, kä /cu tëk gua̱n thiekädu bi bath. Ɛ ɣän Kuoth Nhial.

17“/Cu dämuɔɔr lok kɛ lɔcdu, liɛŋɛ rɔ yɛnɛ gua̱n thiekädu, kɛ ɣöö ci duer bi jek kɛ kui̱dɛ.

18/Cu tɛr tër raan kä nɛɛku, kä cu jɛ rɔm kɛ lɔcdu, nhɔk ni gua̱n thiekädu ce̱tkɛ puɔ̱nydu. Ɛ ɣän Kuoth Nhial.

19“Tit ni luëëkä. /Cu ɣɔ̱ɔ̱ku jak kä tekɛ dör ti kɔŋ, cu kaakdu pith kɛ bɛl ti gööl, kä /cu bi̱i̱ mi ca kɔc kɛ bieyni ti gööl bi la̱th puɔ̱nydu.

20“Mi ci wut tɔ̱ɔ̱c kɛ ciek mi ja̱ŋ nyaal mi ca ka̱m wut mi dɔ̱ŋ kä ɛn wut ɛmɔ thilɛ mi cɛ thöp kɛ kui̱ nyaamɔ kä /kenɛ jɛ lony, ba kɛ kum, duundɛ ɣöö /ca kɛ bi näk, kɛ ɣöö /ka̱n nyaamɔ kɔn lony.

21Kä kuɛ la ɣöö ɛn wut ɛmɔ bɛ thäk dɛ̈ɛ̈l rɔmä nööŋ thok duëël ro̱mä ala muc cutdä Kuɔth Nhial.

22Kɛn thäk dɛ̈ɛ̈l rɔmä muc dui̱rä mɛmɛ bi bo̱o̱th palä jɛ luɛl ni duerɛ nhiam Kuɔth kɛ kui̱ dui̱rä min cɛ la̱t, kä bacu pa̱l duerɛ.

23“Kä mi wä yɛn wä ben mun Kɛ-naan, kä bia jiɛɛn dɛɛni mi̱eth pith, ŋa̱cɛ jɛ ɛn ɣöö dɛykiɛn jiäkɛ. Kɛ run da̱ŋ diɔ̱k /cikɛ ro̱ŋ kɛ mi̱eth.

24Kä kɛ ŋuaan runi bi dɛykiɛn diaal a ti gɔw ti ba thöp Kuoth.

25Kä kɛ dhieec runi bia dɛykiɛn cam. Kɛn duɔ̱p ɛmɔ bi jiɛɛnkun dɛy ti ŋuan kuir. Ɛ ɣän Kuoth Nhial Kuothdun.

26“/Cu ri̱ŋ mi tekɛ riɛm cam. Kä cu kuth pal.

27/Cuarɛ wi̱cdun gëk kä /cuarɛ mi̱em ti̱ekdun yup.

28/Cuarɛ pua̱nykun te̱m kɛ kui̱ li̱ëth kä /cuarɛ pua̱nykun moc biɛl. Ɛ ɣän Kuoth Nhial.

29“/Cu nyaadu moc jiath lɔaac kɛ jakdu kɛ jɛ kä lër, kɛ ɣöö /ci naath bi le̱e̱r a bikɛ cu thil lua̱ŋ.

30Tit cäŋ lɔ̱ŋä cäŋdä kä luɔ̱thɛ luaakdä. Ɛ ɣän Kuoth Nhial.

31“/Cu com wä go̱r kä raan kiɛ yiey kä jɔɔk, kɛn tɔ̱tɔ̱ ba ji̱ yär. Ɛ ɣän Kuoth Nhial Kuothdu.

32“Jiɛc rɔ luthä nhiam di̱tni, nyuth nikɛ luthdu, kɛ dualu kɛ Kuothdu. Ɛ ɣän Kuoth Nhial.

33“Mi cieŋ juɔ̱r kɛ kɛ yɛ, /cuarɛ jɛ ciɛŋ a jiäk.

34Ɛn juɔ̱r ɛ mɔ a jɛ cieŋ ala raan wec rɛydun, kä nhɔakɛ jɛ ce̱tkɛ pua̱nykun, kɛ ɣöö ci yɛn kɔnɛ jur muun I-jëp. Ɛ ɣän Kuoth Nhial Kuothdun.

35“/Cu bi duer mi thɛmi bär kä duɔ̱ɔ̱r kiɛ pëkdɛ kɛnɛ di̱tdɛ.

36A te ni ji̱n kɛ theemni ti päär, pëk ti päär, took ti päär. Ɛ ɣän Kuoth Nhial Kuothdun, mëë käm yɛ raar kä I-jëp.

37Luthni ŋuɔ̱tkä kɛnɛ lueekä diaal kä guuri kɛ. Ɛ ɣän Kuoth Nhial.”

← Chapter 18 Jump to: Chapter 20 →