Leviticus 14

Nuer Bible © Bible Society in South Sudan 1998,2012

← Chapter 13 Jump to: Chapter 15 →

1Cu Kuoth Nhial Muthɛ jiök i̱,

2“Ti̱ti̱ kɛ kɛn luɔ̱ɔ̱tni kɛ kui̱ raam mi tekɛ juey gupä cäŋ in ba lak ni jɛ, kä banööŋ ni jɛ bööth palä.

3Bi bööth palä jɛ naŋ jɔk wec kä bɛ jɛ wä guic. Mi wee jɛ wä nɛn i̱ ci buɔ̱ɔ̱t jua̱th gɔw,

4bi bööth palä diit ti gɔw ti tëk da̱ŋ rɛw thi̱ec kɛ kɛ jiath ŋuër kɛ lath mi dɛ̈ɛ̈r kɛnɛ ithɔp kɛ kui̱ raam in baben lak.

5Kä bi bööth palä kɛ jiök i̱, na̱kɛ dit kɛl rɛy dhar wi̱i̱ pi̱ ti tekɛ lony.

6Kä bɛ dit in dɔ̱ŋ in daan ka̱n kä bɛ jɛ cua̱th kɛ kɛnɛ jiath ŋuër kɛ lath mi dɛ̈ɛ̈r kɛ ithɔp rɛy riɛm diɛɛt in ca näk.

7Kä bɛ riɛmdɛ kiɛth puɔ̱ny raam min baben lak kɛ juey gupä, kä bɛ jɛ cu lar i̱ cɛ gɔaa, kä bɛ dit ɛ tëk ɔ cu jak kä wä rɛy ka̱a̱ni.

8Kä ɛn ram ɛmɔ bɛ bieyni kɛ lak, kä bɛ mi̱emkɛ diaal muɔ̱t raar, kä bɛ rɔ cu puɔk kä bɛ cu gɔaa kä kɛ kɔrɛ bɛ cu ben wi̱c, duundɛ ɣöö bɛ cieŋ raar kɛmɛkädɛ kɛ ni̱n bärɔw.

9Kɛ kɔr ni̱ni da̱ŋ bärɔw bɛ mi̱emkɛ diaal muɔ̱t raar, bɛ wi̱cdɛ mud kɛnɛ ti̱kdɛ kɛ mi̱em waŋdɛ kɛ duɔth mi̱eem tin kɔ̱ŋ, kä bɛ bieyni kɛ lak, kä bɛrɔ puɔ̱k kä bɛ cu gɔaa.

10“Kä kɛ bädäk ni̱ni bɛ rueeth de̱e̱t rɔɔmni da̱ŋ rɛw ti gur kɛli kɛ nac dɛ̈ɛ̈l rɔɔmä ti thil diw, nööŋ kɛ kɛ tok nupä da̱ŋ diɔ̱k ti kök köök ti ca liɔm kɛ liɛɛth ala luur bɛɛl kɛ ɣök liɛɛth.

11Bi bööth palä min bi la̱t ɛmɔ lät kä raam ɛmɔ kɛnɛ muckɛ nööŋ nhiam Kuɔth Nhial thok kɛmɛkä ro̱mä kɛ Kuoth Nhial.

12Kä bɛ kɛl ka̱n kä rueeth deet tin kɔn ala luur cutdä kɛ kɛnɛ ɣök liɛɛth, bɛ kɛ ben ŋuaŋ nhiam Kuɔth ala muc ti ŋuaŋ.

13Kä bɛ jɛ ben näk guäth in la na̱kɛ muc dui̱rä kɛnɛ muc in waŋ thi̱n, bɛ jɛ la̱t inɔ kɛ ɣöö muc cutdä cärɛ kɛ muc dui̱rä, kɛ nyin bööth palä, rɛl gɔɔydɛ rɔ.

14Kä bi bööth palä tha̱a̱ŋ riɛm dɛ̈ɛ̈l muc cutdä ka̱n kä bɛ jɛ bat go̱kä ji̱th cuëëc raam min lak kɛ kɛnɛ yiat tëtdä cueecdɛ in diit kɛ yiat ciökä cueecdɛ in di̱i̱t.

15Kä bɛ rɔ muc kä liɛɛth, bɛ jɛ wuɔ̱c tëtdä caamdɛ,

16bɛ yiat cueecdɛ cua̱th rɛy liɛɛth in te tëtdä caamdɛ, kɛ yiat cueecdɛ, bɛ tha̱a̱ŋ liɛɛth cu kiɛth kä bärɔw nhiam Kuɔth Nhial.

17Bi ɛn bööth palä duɔth liɛɛth in te tëtdä caamdɛ bat go̱kä ji̱th cuëëc raam in lakkɛ kɛnɛ yiat tëtdä cueecdɛ in di̱i̱t kɛ yiat ciökä cueecdɛ in di̱i̱t, ba jɛ bat wi̱i̱ riɛm mucä cutdä min ca bat ni wen.

18Bɛ duɔth liɛɛth in te te̱tädɛ cu wuɔ̱c wi̱i̱ raam in lakkɛ ala mi luɛl kɛ ni jɛ nhiam Kuɔth Nhial.

19“Inɔ bi bööth palä muc dui̱rä thöp luɛlɛ jɛ ram in lakkɛ jiääkdɛ raar, kä kɛ kɔrɛ bɛ muc in waŋkɛ cu näk.

20Kä bɛ jɛ cu thöp wi̱i̱ yi̱kä kɛ kɛ muc bɛɛl, bi bööth palä jɛ cu luɛl, kä bɛ cu gɔaa.

21“Kä mi ɛn ram ɛmɔ ɛ can a /cɛ ti̱ti̱ bi jëk, a jɛ kän thäk dɛ̈ɛ̈l rɔmä kɛl ala muc cutdä mi ŋuaŋ kä luɛɛl kɛ ni jɛ kɛ kɛ wäl wa̱a̱li tokä nupä mi ca lia̱a̱p kɛ liɛɛth ala muc bɛɛl, kɛ ɣök liɛɛth,

22kɛ guɔ̱kni rɛw kiɛ kunnööri rɛw tin dɔ̱ŋ derɛ luäŋ kɛ jek, dëë kɛl a luur dui̱rä kä dëë min dɔ̱ŋ a luur mi waŋkɛ.

23Kɛ bädäk ni̱ni bɛ kɛ nöŋ bööth palä kɛ kui̱ la̱kdɛ thok duëël ro̱mä nhiam Kuɔth Nhial.

24Kä bi bööth palä thäk dɛ̈ɛ̈l min mɔ luur cutdä ka̱n kɛnɛ liɛɛth, kä bɛ kɛ ŋuaŋ ala muc ti ŋuaŋ nhiam Kuoth Nhial.

25Kä bɛ thäk dɛ̈ɛ̈l mucä dui̱rä näk, kä bɛ tha̱a̱ŋ riɛmdɛ ka̱n, kä bɛ jɛ bat go̱kä ji̱th cueecdɛ kɛnɛ yiat tëtdä cueecdɛ in di̱i̱t kɛ yiat ciökä cueecdɛ in di̱i̱t.

26Kä bi ɛn bööth palä liɛɛth wuɔ̱c tëtdä caamdɛ.

27Kɛ yiat tëtdä cueecdɛ bɛ jɛ kiɛth ni kä bärɔw nhiam Kuɔth Nhial.

28Kä bɛ tha̱a̱ŋ liɛɛth bat bä go̱kä ji̱th cuëëc raam in lakkɛ, amäni yiat tëtdä cueecdɛ in diit kɛnɛ yiat ciökä cueecdɛ in diit, guäth in ca riɛm muc cutdä kɔn bat thi̱n.

29Kä duɔth liɛɛth in te te̱tkädɛ wuɔ̱c wi̱i̱ raam in lakkɛ, luɛl kɛ ni jɛ nhiam Kuɔth Nhial.

30Kä bɛ kɛl thöp kä guɔ̱kni kiɛ kunnööri,

31kɛl ala luur dui̱rä cukɛ a min dɔ̱ŋ ala luur mi waŋ, kɛn duɔ̱p ɛmɔ bi bööth palä raam ɛmɔ cu luɛl nhiam Kuɔth Nhial.”

32Ti̱ti̱ kɛ kɛn ŋuɔ̱t kɛ kui̱ raam mi tekɛ dhɔp min /ci muc dëë luäŋ kɛ jiäk kɛ kui̱ la̱kdɛ.

33Ɛ jɛn cu Kuoth Nhial Muthɛ kɛnɛ Ä-ron jiök i̱,

34“Mi wä yɛn wec muun Kɛ-naan, min cä ka̱m yɛ ala duŋdun, kä cä dhɔp la̱th duëël rɛy muɔ̱ndun.

35Ɛn ram ɔ ci duel ka̱n ɔ a jɛ bëë ben la̱r bööth palä i̱, ‘Ce̱tdɛ kɛ mi te duelä kɛ dhɔp.’

36Bi bööth palä wee ka̱mɛ kuak raar rɛy duëël a /kenɛ ni coth ɛn duëël kɛ ɣöö bɛ jɛ wä guic, kɛ ɣöö bɛ cu thil mi ba lar i̱ jiäk rɛy duëël. Kɛ kɔrɛ bɛ rɛy duëël cu wä guic.

37Bɛ juey guic, puɔ̱ny duëël, mi wee jɛ wä jek i̱ te juey thi̱n a tëë biɛl mi dɛ̈ɛ̈r kiɛ mi tɔ̱c mi jɔc, kä cɛ cuit puɔ̱ny duëël,

38bi bööth palä ben raar duëël, kä bɛ thi̱i̱k thok duëël lëk thi̱n kɛ ni̱n bärɔw.

39Kɛ kɔr ni̱ni da̱ŋ bärɔw bɛ luny jɔk, bɛ jɛ ben guic, mi cɛ juey jek a cɛ rɔ rëp kɛ biɛɛl ti ŋuan puɔ̱ny duëël

40bɛ kɛ cu jiök i̱ ka̱mɛ pääm tin te biɛɛl jua̱th thi̱n raar kä wiaa yia̱kɛ kɛ jɔk wec guäth in jiääk.

41Kä bɛ ro̱o̱dh duëël kuek raar ni kɛɛliw, kä bɛ mundɛ wa yiäk jɔk wec guäth in jiääk.

42Kä bɛ pääm kɔ̱kiɛn ben la̱th guäth päämni tin ca ka̱m raar, kä bɛ duel nyɔk kɛ rödh.

43“Kä mi ci juey rɔ nyɔk kɛ jɔac puɔ̱ny duëël kɛ kɔr kä min ca pääm ka̱m raar kä ca kɔ̱k kä ca rɔth.

44Bi bööth palä jɛ ben kui̱c, mi cɛ jek a rëp biɛl jua̱th ni rɔ puɔ̱ny duëël, ɛ dhɔp mi bɛc, jiäkɛ.

45Bɛ duel däk, mundɛ nikɛ jiɛɛnkɛ amäni ro̱o̱dhdɛ, kä bɛ kɛ naŋ raar jɔk wec guäth in jiääk.

46Kä niɛ ram ɔ bi wä duëël ɔ guäth in ca thokdɛ lëkɔ, bɛ jiääk amäni thiaŋ.

47Kä ram ɔ ci tɔ̱ɔ̱c duëël ɛmɔ a lak bieynikɛ, kä ram ɔ ci mi̱th thi̱n ɔ a jɛ lak bieyni kɛ bä.

48“Mi ci bööth palä ben i̱ bëë juey ben guic, kä cɛ jek a /cɛ rɔ rëp puɔ̱ny duëël guäth in ca rɔdh, bɛ jɛ lar i̱ gɔaa ɛ ɛn duel kɛ ɣöö ci juey gɔaa.

49Kɛ kui̱ la̱k duëël bɛ diit ti tiatni da̱ŋ rɛw ka̱n kɛ kɛ jiath ŋuër kɛnɛ lath mi dɛ̈ɛ̈r kɛ ithɔp,

50bɛ kɛl näk kä diit rɛy dhar wi̱i̱ pi̱i̱ni ti te lony

51bɛ jiɛɛn ɛ ti ka̱n kɛ kɛ dit in tëk, kä bɛ kɛ cua̱th rɛy riɛm di̱et in ca näk kɛnɛ pi̱ tin te lony kä bɛ duel ben kith ni kä bärɔw.

52Bɛ ɛn duel cu lak kɛ riɛm di̱et kɛnɛ pi̱ ti lony, kɛ dit in tëk, kɛ jiath ŋuër, lath mi dɛ̈ɛ̈r, kɛ ithɔp,

53kɛ kɔrɛ bɛ dit in tëk pa̱l wä rɛy ka̱a̱ni dɔɔr, bɛ duel cu luɛl Kä bɛ cu gɔaa.”

54Ti̱ti̱ kɛ kɛn ŋuɔ̱t kɛ kui̱ raam ɔ bi tekɛ dhɔp kɛnɛ wuɔ̱ɔ̱k,

55kɛ kui̱ dhɔpä mi te rɛy biey kiɛ duel,

56ɛ pia̱a̱r kiɛ kuuk, kiɛ waŋ

57ba nyoth mi jiäkɛ kiɛ gɔaa ɛ, ɛ jɛn ŋuɔ̱t kɛ kui̱ dhɔpä.

← Chapter 13 Jump to: Chapter 15 →

Recommended Reading

Commentary Leviticus Commentaries → Devotional Leviticus Devotional Guide → Get This Bible Nuer Bible © Bible Society in South Sudan , Study Bible →