Numbers 28

Nuer Bible © Bible Society in South Sudan 1998,2012

← Chapter 27 Jump to: Chapter 29 →

1Kä cu Kuoth Nhial Muthɛ jiök i̱,

2“Läri jɛ ji̱ I-thɛ-rɛl i̱, ‘Mucdä, muc mi̱ethdä min waŋkɛ, min tɛɛth lɔcdä, bia jɛ thöp ɣä kɛ gua̱thdɛ.’

3Kä biɛ la̱r kɛ bä, nɛmɛ ɛ jɛn muc in thöpkɛ kɛ mac min bia thöp Kuoth Nhial, rueeth rɔɔmni da̱ŋ rɛw ti gur kɛli kä thil diw, ala ti waŋkɛ, muc ciɛŋä tin wen bakɛ thöp ciaŋ.

4Bi ruath rɔɔmä kɛl thöp kɛ runwaŋ, kä bi min dɔ̱ŋ thöp kɛ thiaŋ.

5Kä biɛ thöp kɛɛl kɛ wäl lieeri nuɔ̱p mi ca lia̱a̱p kɛ liɛɛth.

6Ɛ mi ba thöpkɛ ciaŋ, ce̱tkɛ mëë ca kɔn thöp pääm Thi-nay, ala ŋuäny mi gɔaa, mi thöp kɛ Kuoth Nhial kɛ mac.

7Kä bi ruath rɔɔmä min dɔ̱ŋ thöp kɛ thiaŋ. Kä ce̱tnikɛ muc bɛɛl ruɔ̱nwaaŋ, kɛ kɔaŋdɛ, bikɛ thöp kɛ mac, ala ŋuäny mi gɔaa kä Kuoth Nhial.

8Thäk dɛ̈ɛ̈l in dɔ̱ŋ bi jɛ thöp kɛ thiaŋ kɛɛl kɛ muc bɛɛl kɛ muc kɔŋä ce̱tnikɛ muc ruɔ̱nwaaŋ. Bi jɛ thöp ɛla muc mi waŋkɛ mi la ŋuäny mi gɔaa kä Kuoth Nhial.”

9“Kä kɛ cäŋ lɔ̱ŋä bi rueeth rɔɔmni da̱ŋ rɛw ti gur kɛli kä thil diw, kɛ rɛw wäli lirä nuɔ̱p mi ko̱k ko̱k mi ca lia̱a̱p kɛ liɛɛth, thöp kɛɛl kɛ kɔaŋdɛ.

10Ɛn nɛmɛ ba muc ca̱ŋ lɔ̱ŋni diaal mi waŋkɛ, gekä mucä min wen in la waŋkɛ kɛnɛ kɔaŋdɛ.”

11“Kɛ tuk päthniku lap ni Kuoth Nhial a tho̱pi muc in waŋkɛ. Thääk da̱ŋ rɛw, ruath dɛ̈ɛ̈l böwä kɛl, rueeth rɔɔmni da̱ŋ bärɔw ti gur kɛli kä thil diw.

12Kɛ diɔ̱k wäli nuɔ̱p mi ko̱k ko̱k mi ca lia̱a̱p kɛ liɛɛth, ti bi thöp kɛɛl kɛ thäk ɔ. Kɛ rɛw wäli lirä nuɔ̱p mi ko̱k ko̱k mi ca lia̱a̱p kɛ liɛɛth biɛ thöp kɛɛl kɛ ruath dɛ̈ɛ̈l böwä kɛl.

13Kä bi wäl wäli lirä nuɔ̱p mi ko̱k ko̱k mi ca lia̱a̱p kɛ liɛɛth thöp kɛɛl kɛ thäk dɛ̈ɛ̈l rɔɔmä mɔ. Ala muc mi thöpkɛ kɛ mac ala ŋuäny mi gɔaa kä Kuoth Nhial.

14Kä bi thäk kɛl tekɛ liɛɛr kɔŋä, kä bi ruath dɛ̈ɛ̈l tekɛ diɔ̱k diɔ̱ɔ̱kni lieeri kɔŋä, kä bi thäk dɛ̈ɛ̈l ɔ tekɛ ŋuaan ŋuaani lieeri kɔŋä. Bi nɛmɛ a muc path mi waŋkɛ rɛy päthni runä.

15Kä bi thäk dɛ̈ɛ̈l böwä kɛl thöp Kuoth Nhial kɛ kui̱ dui̱rä. Ba thöp kɛ gëk mucä ci ciɛŋä min wen in la waŋkɛ kɛnɛ kɔaŋdɛ.”

16“Kɛ cäŋ kä wäl ŋuaan kä pay in jio̱l, ɛ cäŋ bälä Kuɔth Nhial.

17Kä kɛ cäŋ kä wäl dhieec kä pay ɛ mɔ ɛ cäŋ ŋarä. Kä ba cam ni juray mi thil thuɔp.

18Kä cäŋ in nhiam ba cäŋ dolä mi rɛl rɔ, /cia bi lät thi̱n.

19Duundɛ ɣöö bia Kuoth Nhial thöp muc thi̱n kɛ mac. Bia rueeth thääkni da̱ŋ rɛw, kɛ ruath dɛ̈ɛ̈l böwä kɛl, kɛ thääk deet rɔɔmni da̱ŋ bärɔw ti gur kɛli, ti thil diw thöp.

20Kä bia kɛ thöp kɛɛl kɛ muc nuɔ̱p mi ko̱k ko̱k mi ca lia̱a̱p kɛ liɛɛth. Bi diɔ̱ɔ̱k wäli lirä nuɔ̱p thöp kɛɛl kɛ thäk, kɛ rɛw wäli lirä nuɔ̱p thöp kɛɛl kɛ ruath dɛ̈ɛ̈l böwä.

21Kä bi wäl wäli thöp kɛɛl kɛ dɛy rɔɔmni da̱ŋ bärɔw.

22Kɛ thäk dɛ̈ɛ̈l böwä kɛl kɛ kui̱ dui̱rä, mi luɛli ni rɔ.

23Bi kɛn tɔ̱tɔ̱ thöp kɛ gëk mucä ruɔ̱nwaaŋ in waŋkɛ, min la waŋkɛ ni wen.

24Kɛ jɛn duɔ̱ɔ̱p ɛmɔ bi jɛ a tho̱pi ni ciaŋ kɛ ni̱n bärɔw, ala muc mi thöpkɛ kɛ mac, ɛ ŋuäny mi gɔaa kä Kuoth Nhial. Ba thöp kɛ gëk mucä min waŋkɛ kɛnɛ kɔaŋdɛ a wee wä.

25Kä kɛ bärɔw ni̱ni ba duɔl mi rɛl gɔɔydɛ rɔ. Thilɛ mi bia la̱t thi̱n.”

26“Kɛ cäŋ in tho̱pi Kuoth Nhial muc bɛɛlku tin nhiam, kɛ cäŋ ŋarä ŋër, ta̱yɛ kɛ duɔl mi rɛl rɔ. Kä /cuarɛ lät thi̱n,

27thöpɛ ni Kuoth Nhial muc, ala ŋuäny mi gɔaa. Rueeth thääkni da̱ŋ rɛw, kɛ ruath dɛ̈ɛ̈l böwä, kɛ rueeth rɔɔmni da̱ŋ bärɔw ti gur kɛli.

28Kɛɛl kɛ nup mi ko̱k ko̱k mi ca lia̱a̱p kɛ liɛɛth, diɔ̱ɔ̱k wäli lirä nuɔ̱p kɛɛl kɛ thäk, kɛ rɛw wäli lirä nuɔ̱p kɛɛl kɛ ruath dɛ̈ɛ̈l.

29Kɛ wäl wäli nuɔ̱p kɛɛl kɛ dɛy rɔɔmni da̱ŋ bärɔw bikɛ thöp.

30Kɛ thäk dɛ̈ɛ̈l böwä kɛl mi bi luɛl ni rɔ.

31Bikɛ thöp kɛ gëk mucä min waŋkɛ ni ciaŋ, kɛɛl kɛ muc bɛɛl, kɛnɛ kɔaŋ, ala ti thil diw.”

← Chapter 27 Jump to: Chapter 29 →