Numbers 35

Nuer Bible © Bible Society in South Sudan 1998,2012

← Chapter 34 Jump to: Chapter 36 →

1Kä cu Kuoth Nhial ruac kɛ Muthɛ rɛy tɔ̱ɔ̱rä Mo-ab kui̱ yiëër Jɔr-dɛn kä Jɛ-ri-ko i̱,

2“Jio̱kni ji̱ I-thɛ-rɛl akɛ muɔckɛ ji̱ Lii-bay kä wi̱i̱kiɛn tɔ̱ bikɛn kɛ wä ciɛŋ tɔ̱ wi̱i̱ ti bikɛ cieŋ thi̱n. Kä bia kɛ moc gua̱th la̱k ɣɔ̱ɔ̱k gekä wec.

3Bi ka wi̱i̱ ti bi kɛn kɛ ciɛŋ kɛnɛ gua̱th la̱k ɣɔ̱ɔ̱kiɛn kɛnɛ leykiɛn diaal.

4Kä ɛn mun la̱k ɣɔ̱ɔ̱k in bia ka̱m ji̱ Lii-bay ɔ a känɛ jɛ ni puɔ̱ɔ̱ny wec ba jua̱th tetni ti bathdɔɔr kɛɛliw a wi̱i̱nɛ.

5Kä a tɛmɛ jɛ raar wec kui̱c käny ca̱ŋ ala jua̱th tetni ti bathdɔɔri rɛw, kä kui̱c cuëëc ala bathdɔɔri rɛw, Kä kui̱c konyä ca̱ŋ ala bathdɔɔri rɛw, kä kui̱c caam ala bathdɔɔri rɛw, bi wec ku lɛ te däär. Ba gua̱th la̱k ɣɔ̱ɔ̱k wecdiɛn.

6Kɛn wi̱i̱ bäkɛl tɔ̱ bi ka̱m ji̱ Lii-bay tɔ̱, bi ka kɛn wi̱i̱ luäkä, tin bi ram mi ci raan näk rɔ la̱ny thi̱n. Kä repkɛ kɛ wi̱i̱ ti jiɛɛn ŋuaan wi̱cdɛ rɛw ti kɔ̱ŋ.

7Bi wi̱i̱ diaal tin bi ka̱m ji̱ Lii-bay a wi̱i̱ ti jiɛɛn ŋuaan wi̱cdɛ bädäk kɛɛl kɛ gua̱th la̱k ɣɔ̱ɔ̱k.

8Kä kɛn wi̱i̱ tin bi thöp kä wi̱i̱ ji̱ I-thɛ-rɛl, bi wi̱i̱ ti ŋuan ka̱n thok duëël mi di̱i̱t, kä bi wi̱i̱ ti tɔt ka̱n thok duëël mi tɔt. Bakɛ ka̱n kä thok duëëlɔ.”

9Kä cu Kuoth Nhial Muthɛ jiök i̱,

10“Läri jɛ ji̱ I-thɛ-rɛl, mi wä yɛn yier Jɔr-dɛn jiɛth wiaa muun Kɛ-naan,

11ba rɔ lieny wi̱i̱ ti bia̱ wi̱i̱ luäkä kɛ kui̱dun. Kɛ ɣöö dëë ram mi ci raan näk kɛ guäc rɔ bar thi̱n.

12Bi ka wi̱i̱ luäkädun kä gua̱n tɛ̈r, kɛ ɣöö ci ram in ci raan näk dëë li̱w amäni mi cɛ ben nhiam dolä kɛ luk.

13Kɛn wi̱i̱ tɔ̱ bi thöp tɔ̱ bi ka wi̱i̱ luäkädun da̱ŋ bäkɛl.

14Bi wi̱i̱ diɔ̱k ŋun kui̱ yiëër Jɔr-dɛn, kä bi wi̱i̱ diɔ̱k tin kɔ̱ŋ te muun Kɛ-naan ala wi̱i̱ luäkä.

15Kɛn wi̱c bäkɛl tɔ̱tɔ̱ bi ka wi̱i̱ luäkä ji̱ I-thɛ-rɛl, kɛ ram mi jääl kɛ ram in cieŋ rɛydiɛn, kɛ ɣöö bi ram mi näk raan kɛ guäc rɔ la̱ny thi̱n.

16“Duundɛ ɣöö mi wä raan raan wä yɔ̱t kɛ yiëëth a bɛ li̱w, näkɛ ni jɛ. Ba ram in näk raan näk.

17Kɛnɛ mi te ni tetdɛ kɛ päm mi dëë raan näk, kä cɛ raan näk, näkɛ ni jɛ. Ba ram in ci raan näk näk.

18Kä mi yɔ̱tdɛ ni jɛ kɛ kɛɛt, kä ci raan li̱w, cɛ näk. Bä ram in näk raan näk.

19Bi ram in col raan, ram in näk raandɛ näk, mi cikɛ röm.

20Kä mi wä raan raan wä ɔak Kä duɔ̱ɔ̱r kiɛ bɛ jɛ bo̱k a bɛ li̱w,

21kiɛ cɛ jɛ yɔ̱t kɛ ɣöö tekɛ kɛ tɛr a cɛ li̱w, ɛn ramɔ yɔ̱ɔ̱t raanɔ ba näk. Cɛ raan näk. Bi ram in col raan ɛ näk mi cikɛ röm.

22“Duundɛ ɣöö mi cɛ jɛ ɣɔk a /cɛ lot ni jɛ, kiɛ cɛ jɛ pi̱m a kui̱cɛ,

23kiɛ cɛ bo̱k kɛ guäc a /kenɛ jɛ nɛn, kä cɛ li̱w, kä thilɛ kɛ tɛr.

24Inɔ bi duɔl kam raam in ci raan näk kɛnɛ ram in cool jɛ luk kɛ ŋuɔ̱t ti̱ti̱.

25Bi duɔl ram in ci raan näk gaŋ kä ram in dëë jɛ col, kä bɛ jɛ luɔc wi̱c luäkä min cɛ rɔ la̱ny thi̱n. Bɛ tëë wi̱ni amäni lia̱a̱ bo̱o̱thä palä min di̱i̱t ëë ca yi̱r kɛ liɛɛth mi rɛl rɔ.

26Duundɛ ɣöö mi wä ram in ci raan näk key wec luäkä min cɛ rɔ lua̱k thi̱n wä bäl.

27Kä bi gua̱n tɛ̈r ɛ jek kui̱ këth wec luäkä min cɛ rɔ la̱ny thi̱n, kä cɛ jɛ näk, cɛ bi tekɛ duer kɛ riɛmdɛ.

28Kɛ ɣöö ɛn ram in ci ran näk bɛ te rɛy wec luäkä amäni mi ci bo̱o̱th palä min di̱i̱t li̱w. Duundɛ ɣöö kɛ kɔr li̱eth bo̱o̱thä palä min di̱i̱t, bi ram in ci raan näk loc wi̱i̱dɛ min ciɛŋɛ.

29“Kä kɛn ti̱ti̱ bi ka ŋuɔ̱t kä ri̱ckun gua̱th cieŋnikun diaal.

30Kä ram ɔ bi raan näk ɔ ba näk kɛ nën nath. Kä /ca raan bi näk kɛ nën raam kɛl.

31Kä cu kök nhɔk kɛ kui̱ teekä raam mi ci raan näk. Ba jɛ dhil näk.

32Kä cu kök nhɔk kä ram mi ci rɔ bar wi̱c luäkä, kɛ ɣöö bɛ ben cieŋ wi̱c ɛ /ken bo̱o̱th palä min di̱i̱t ni li̱w.

33Kä /cuarɛ mun in cieŋ yɛn thi̱n yär. Kɛ ɣöö riɛm yärɛ mun, kä thilɛ mi dëë mun luɛl kä riɛm in ca wuɔ̱th thi̱n, ɛ ni mi ɛ riɛm raam min wuth riɛm thi̱n.

34/Cu mun in ciɛŋi yär, gua̱th in cieŋä thi̱n. Kɛ ɣöö ɣän Kuoth Nhial cieŋä rɛy ji̱ I-thɛ-rɛl.”

← Chapter 34 Jump to: Chapter 36 →

Recommended Reading

Commentary Numbers Commentaries → Devotional Numbers Devotional Guide → Get This Bible Nuer Bible © Bible Society in South Sudan , Study Bible →