Numbers 3

Nuer Bible © Bible Society in South Sudan 1998,2012

← Chapter 2 Jump to: Chapter 4 →

1Ti̱ti̱ kɛ kuay Ä-ron kɛnɛ Muthɛ guäth ëë ci Kuoth Nhial ruac kɛ Muthɛ pääm Thi-nay.

2Ti̱ti̱ kɛ ciööt gan Ä-ron Na-dab gatdɛ min kɛ̈ɛ̈ kɛ Ä-bi-ɣu, kɛ, Ɛl-a-dhar kɛnɛ I-ta-mar,

3kɛ kɛn gaat Ä-ron tin la bööth palä.

4Duundɛ ɣöö Na-dab kɛnɛ Ä-bi-ɣu cikɛ li̱w nhiam Kuɔth Nhial mëë cikɛ wäl in kɔp mi /ka̱n la̱r kɛ thöp nhiam Kuɔth däärdɔaar Thi-nay, kä thilɛ kɛ gaat. Ɛ ni ɣöö ci Ɛl-a-dhar kɛnɛ I-ta-mar lät ala bööth palä kɛ ni̱n teekä Ä-ron gua̱ndiɛn.

5Kä cu Kuoth Nhial Muthɛ jiök i̱,

6“No̱o̱ŋni thok duëël Lii-bay thiekä, läthnikɛ nhiam Ä-ron bo̱o̱th palä, kɛ ɣöö bikɛ jɛ lät ikä.

7Bikɛ jɛ lät kä lät amäni duɔl kɛɛliw nhiam kɛmɛkä ro̱mä ce̱tkɛ lätkiɛn rɛy luaak.

8Bikɛ kuak kɛmɛkä diaal la̱t, kä bikɛ ji̱ I-thɛ-rɛl lät ikä ce̱tkɛ min lät kɛn rɛy luaak.

9Käm ni ji̱ Lii-bay Ä-ron kɛnɛ gaatkɛ, kɛ ɣöö kɛ muc ti ba ka̱m ɣä ti rɛ̈l kɛ rɔ̱ rɛy ji̱ I-thɛ-rɛl.

10Kä kuany Ä-ron kɛnɛ gaatkɛ, kɛ ɣöö ba lät bööthni la̱t. Duundɛ ni ɣöö mi wä radɔ̱diɛn ben thiekä, ba jɛ näk.”

11Kä cu Kuoth Nhial Muthɛ jiök i̱,

12“Nɛn ɛ, ɣän ka̱nä ji̱ Lii-bay rɛy ji̱ I-thɛ-rɛl kɛ gua̱a̱th keyni tin dapkɛ kɛ nhiam rɛy ji̱ I-thɛ-rɛl. Ji̱ Lii-bay bi ka nyinkä,

13kɛ ɣöö key diaal kɛ nyinkä, cäŋ ëë na̱kä ni key rööl I-jëp, cua rɔ lëy key ji̱ I-thɛ-rɛl diaal, ke̱y nath kɛnɛ le̱yni kɛ nyinkä. Ɛ ɣän Kuoth Nhial.”

14Kä cu Kuoth Nhial ruac kɛ Muthɛ rɛy dɔaar kä Thi-nay i̱,

15“Kuɛn gaat Lii-bay, kɛ gua̱nikiɛn kɛ dho̱rkiɛn. Kɛn tut diaal tin runkiɛn ni kä pay kɛl a wä nhial gɔ̱rkɛ.”

16Cu Muthɛ jɛ la̱t ce̱tnikɛ ruac Kuɔth Nhial, ce̱tnikɛ min ca la̱r jɛ.

17Ti̱ti̱ cukɛ a kɛn gaat Lii-bay kɛ ciöötkiɛn, Ger-con kɛnɛ Kɛ-ɣath kɛ Mɛ-ra-ri.

18Kä cu ti̱ti̱ a ciööt gan Ger-con kɛ dho̱rkiɛn, Lib-ni kɛnɛ Cimi.

19Kä gaat Kɛ-ɣath kɛ dho̱rkiɛn cua Am-ram kɛnɛ Yidh-ɣar kɛ Ɣɛb-ron kɛnɛ U-dhi-el.

20Kä ti̱ti̱ kɛ gaat Mɛ-ra-ri kɛ dho̱rkiɛn. Mali kɛnɛ Muci, ti̱ti̱ kɛ kɛn dho̱r ji̱ Lii-bay kɛ thuk duëli gua̱nikiɛn.

21Cu Ger-con tekɛ ji̱ Lib-ni kɛnɛ ji̱ Cimi, cukɛ cua ji̱ dhɔaar Ger-con.

22Kä cu pekdiɛn kɛn wutni a känɛ ni kä pay kɛl a wä nhial a nɛy ti bathdɔɔri bärɔw wi̱cdɛ kur da̱ŋ dhieec.

23Ɛn thok duëël Ger-con la puɔ̱t kɛ jɔk kɛmɛkä kui̱ käny ca̱ŋ.

24Kɛ Ɛl-ya-thap gat La-el min la wut gɔaal ji̱ Ger-con,

25min la bo̱o̱th gan Ger-con thok kɛmɛkä ro̱mä, ɛn kɛmɛkä kɛnɛ kumdɛ, kɛ bi̱i̱ thuɔkdɛ,

26kɛ ŋääpni geelä, kɛ bi̱i̱ thuɔk geelä min wil kɛmɛkä kɛnɛ yi̱k kɛ depkɛ, kɛ kuak diaal tin papkɛ jɛ ɛ la̱tdiɛn.

27Kuay Kɛ-ɣath cukɛ a Am-ram kɛnɛ Yidh-ɣar kɛ Ɣɛb-ron kɛ U-dhi-el, kɛ kɛn kuay Kɛ-ɣath.

28Cu pek wutnikiɛn a känɛ ni kä pay kɛl a wä nhial a nɛy ti bathdɔɔri bädäk wi̱cdɛ kur bäkɛl tin lät luak Kuɔth.

29Kɛn kuay Kɛ-ɣath la puɔ̱tkɛ cuëëc kɛmɛkä.

30Kä cu bo̱o̱th kuayni gan Kɛ-ɣath a Ɛli-dha-pan.

31Kä cu la̱tdiɛn a thanduk matdä ruac, kɛnɛ kɔm mi̱thni, kɛ cuuŋ lɛmbärä, kɛ yi̱k kɛ kuak kɛmɛkä diaal tin la bo̱o̱th palä kɛ a lät, kɛ geel. Kɛ kuak diaal tin la la̱t kɛ ni tɔ̱tɔ̱.

32Kä kuay Ɛl-a-dhar gat Ä-ron bo̱o̱th palä, ba kuäär bööthni ji̱ Lii-bay, kä bɛ nɛy tin tekɛ lät rɛy kɛmɛkä guic.

33Kä kuay Mɛ-ra-ri cukɛ a ji̱ Mali, kɛnɛ Muci, cua kɛn dho̱r Mɛ-ra-ri.

34Cu pekdiɛn nikɛ pek wutni a känɛ ni kä pay kɛl a wä nhial a nɛy ti bathdɔɔri bäkɛl wi̱cdɛ kur rɛw.

35Kä cu bo̱o̱th dhɔaar Mɛ-ra-ri a Dhu-ri-el gat Ä-bi-ɣa-yil, la puɔ̱tkɛ kui̱c caam kɛmɛkä.

36Kä cu la̱tdiɛn in ca kuënykɛ a kuak rɛy kɛmɛkä thääk, ri̱i̱wni, cuɔ̱ɔ̱k kɛ kuakiɛn, kɛ tin diaal tin la̱t kɛ kɛ.

37Kɛ jiɛɛn kal tin gölkɛ jɛ kɛ depkɛ kɛn löckɛ.

38Kä la puɔ̱t kɛn Nhiam kɛmɛkä kui̱c käny ca̱ŋ, kä Muthɛ kɛnɛ Ä-ron kɛnɛ gaatkɛ la̱tdiɛn ni la̱t rɛy kɛmɛkä kɛ kui̱ nath. Kä ram mi wä rɔ thieek kɛ kɛmɛkä ba näk.

39Kɛn diaal tin ca kuɛn kä ji̱ Lii-bay ɛ Muthɛ kɛnɛ Ä-ron kɛ ruac Kuɔth Nhial, kɛ dho̱rkiɛn, kɛn wutni diaal a känɛ ni kä pay kɛl a wä nhial, cukɛ a bathdɔɔri ti jiɛɛn rɛw wi̱cdɛ rɛw a juc.

40Kä cu Kuoth Nhial Muthɛ jiök i̱, “Kuɛn ke̱y diaal tin dhɔɔl kä gaat I-thɛ-rɛl, a känɛ ni kä pay kɛl a wä nhial kuɛn kɛ ni ciöötni.

41Kä bi ɣä ka̱m ji̱ Lii-bay, kɛ gua̱a̱th keyni gan I-thɛ-rɛl diaal, kä bi ɣä ka̱m key ɣɔ̱ɔ̱k ji̱ Lii-bay kɛ gua̱a̱th keyni ɣɔ̱ɔ̱k ji̱ I-thɛ-rɛl ɛ ɣän Kuoth Nhial.”

42Ɛ jɛn cu Muthɛ key gan I-thɛ-rɛl diaal kuɛn ce̱tkɛ min ci Kuoth Nhial ɛ la̱rɛ.

43Kɛnɛ tut tin la key nikɛ ciöötkiɛn, a känɛ ni kä tin tekɛ pay kɛl a wä nhial, cukɛ a bathdɔɔri ti Jiɛɛn da̱ŋ rɛw wi̱cdɛ rɛw wi̱cdɛ kur rɛw wi̱cdɛ jiɛɛn bärɔw wi̱cdɛ diɔ̱k.

44Cu Kuoth Nhial Muthɛ jiök i̱,

45“Käni ji̱ Lii-bay rɛy ji̱ I-thɛ-rɛl kɛ gua̱a̱th keyni gan I-thɛ-rɛl diaal kɛnɛ ɣɔ̱ɔ̱kiɛn kɛ gua̱a̱th ɣɔ̱ɔ̱k ji̱ I-thɛ-rɛl, kä ji̱ Lii-bay bi ka nyinkä. Ɛ ɣän Kuoth Nhial.

46Kä kɛ kui̱ luël keyni gan I-thɛ-rɛl ti kur rɛw wi̱cdɛ Jiɛɛn bärɔw wi̱cdɛ diɔ̱k tin te wi̱i̱ gan ji̱ Lii-bay tin wutni,

47bi yio̱w da̱ŋ dhieec ka̱n ti ce̱tkɛ yio̱w luak Kuɔth, yio̱w ti jiɛɛn rɛw.

48Kä bi yio̱w tɔ̱tɔ̱ tin luɛ̈lkɛ ni gaat ka̱m Ä-ron kɛnɛ gaatkɛ.”

49Cu Muthɛ yio̱w luël ka̱n kä nɛy tin cieŋ wi̱i̱ni ji̱ Lii-bay.

50Kä key gan I-thɛ-rɛl cuɛ yio̱w ka̱n ti bathdɔɔr kɛl wi̱cdɛ kur diɔ̱k wi̱cdɛ jiɛɛn bäkɛl wi̱cdɛ dhieec ti päär kɛ yio̱w luaak Kuɔth.

51Cu Muthɛ yio̱w luël ka̱m Ä-ron kɛnɛ gaatkɛ ce̱tnikɛ min ci Kuoth Nhial ɛ la̱r jɛ.

← Chapter 2 Jump to: Chapter 4 →

Recommended Reading

Commentary Numbers Commentaries → Devotional Numbers Devotional Guide → Get This Bible Nuer Bible © Bible Society in South Sudan , Study Bible →