1 Corinthians 9

Nyankole 1964

← Chapter 8 Jump to: Chapter 10 →

1Tindi ow'obusingye? Tindi entumwa? Tindareebire Yesu Mukama waitu? Timuri omurimo gwangye omuri Mukama?

2N'obu ndaabe ntari ntumwa aha bandi, kwonka ahariimwe ndi entumwa; ahabw'okuba imwe muri akamanyiso omuri Mukama k'okuhamya ku ndi entumwa buzima.

3Eki nikyo ndikwetonganira ahari abo abarikumpakanisa.

4Titurikwikirizibwa kuheebwa eby'okurya n'eby'okunywa?

5Titurikwikirizibwa kutwara abakazi baitu, baaba bari ab'eishe-emwe, n'okugyenda nabo, nk'entumwa ezindi, na barumuna ba Mukama waitu, na Keefa?

6Nari nyowe na Barunaba niitwe twenka abatarikwikirizibwa kureka kukora eby'okwehwera?

7Ni muserukare ki oza aha rugamba, haza akeegurira eby'okukoresa? N'oha obyara omusiri gw'emizaabibu, atarye ha bijuma byayo? N'oha oriisa amasyo atanywe mate gaago?

8Ebi nimbigamba nk'oku abantu bagamba? Nari Ebiragiro byo tikwo bigamba?

9Nimumanya ku kyahandiikirwe omu biragiro bya Musa ngu: Otariboha akanwa k'ente, yaaba neejunga oburo. Noogira ngu ente nizo Ruhanga asaasibwa zonka?

10Nari shi tarakigambire buzima ahabwaitu? Eego, kikahandiikwa ahabwaitu, ahabw'okuba omuhingi ashemereire kuhinga aine amatsiko; kandi omuhuuzi ashemereire kuhuura aine amatsiko g'okutwara aha bi yaahuura.

11Itwe ku turaabe twababibiremu eby'Omwoyo, nimugira ngu nikiremeera munonga kubagyeshamu eby'okuhwera omubiri?

12Abandi ku baraabe baine obwo bushoboorozi obu; kureka tukeemera byona, ngu turekye kuzibira engiri ya Ruhanga kubuga.

13Timurikumanya ngu abakora emirimo y'omuri hekalu, batungwa ebya hekalu? N'abaheereza aha itambiro, batunga omugabo aha birikutambwaho?

14Na Mukama waitu nikwo yaaragiire ati: Ababuurizi b'engiri batungwe engiri.

15Kwonka nyowe ahari ebyo tindakoreiseho na kimwe; kandi tinaahandiika ebi ngu mbone kukorerwa ntyo; ahakuba haakiri nyowe okufa, okukira omuntu weena kuhindura busha okwehimbisa kwangye oku.

16Ku ndaabe nimbuurira engiri, tiinyine ki ndikwehimbisizaho, ahabw'okuba nimbuurira ngyemesereziibwe; kandi ku naakuba ntabuuriire engiri, nkaareeba enaku.

17Ahakuba ku ndaabe nimbuurira engiri nyeyendeire, nyine ebihembo; kwonka ku ndaabe ningibuurira ngyemirwe, na mbwenu nshemereire kubuurira ahabw'okukwatsibwa engiri egyo.

18Mbwenu ebihembo byangye niki? Nibyo ebi ngu, ku ndaabe nimbuurira engiri, ngibuurire ahabw'embabazi, ndekye kukoresa obushoboorozi bwangye bwona obu nyine omu murimo gw'engiri.

19N'obu ndaabe ntarikutegyekwa muntu weena, nkeehindura omuhuuku wa boona, ngu nkireho kubona baingi.

20Aha Bayudaaya nkatwaza nk'Omuyudaaya, ngu mbone Abayudaaya; aha barikutegyekwa Ebiragiro nkatwaza nk'orikutegyekwa Ebiragiro, (n'obu biraabe bitarikuntegyeka) ngu mbone abarikutegyekwa Ebiragiro;

21n'aha bataine Biragiro, nkaba nk'otabiine, ngu mbone abataine Biragiro; (ti nk'otaine biragiro ahari Ruhaga, kureka nk'orikutegyekwa ebiragiro bya Kristo).

22Aha bataine maani, nkahinduka otaine maani, ngu mbone kutunga abataine maani. Ahari boona mpindukire byona, ngu omu miringo yoona mbone kukiza bamwe.

23Kandi ebyo byona mbikora ahabw'engiri, ngu ntungye aha migisha yaayo.

24Timurikumanya ngu omu mpaka z'okwiruka boona bairuka, kwonka oheebwa ebihembo aba omwe? Naimwe mube nikwo mwairuka, mubone kuheebwa ekihembo.

25Omuntu oyezirika omu mizaano egyo ayerinda omuri byona. Kandi abo babikora ahabw'okuheebwa ekirunga ekirikusiisikara, kwonka itwe ahabw'ekitarikusiisikara.

26Nikyo nyirukira ntyo, ti nk'otarikumanya i arikuza; nteera entomi, ti nk'orikuteera busha;

27kureka nteera omubiri gwangye ogu ngutegyekye, bwanyima ku ndiheza kubuurira abandi, nyowe ahabwangye ntarishangwa ndi otarikwikirizibwa.

← Chapter 8 Jump to: Chapter 10 →